نەوزاد ئامێدی
گەلەک جارا هزر دکەم، کو ئێدی ڤی باژێری سویندا خاری رێکێ نەدەتە کەسێت رەوشەنبیر و بلیمەت و خودان هزر و بیر.. یان ئەڤ باژێرە ژلایێ خوداوەنداڤە یێ هاتیە نەفرەت کرن، کو بمینیت هەردەم لدوماهیێ.
کێم جاران من دیتییە دهۆکێ بڤان هەمی نڤیسەر و رۆناکبیر و رەوشەنبیراڤە، شیای ببیتە جهێ گوهورینێ یان جهێ کارتێکرنێ. نزانم بوو؟ ئایا ئەگەر ژ بەرپرسانە یان ئەگەر ژ خەلکێ وێیە یان رەوشەنبیرێت وێنە؟؟ ئەز گەهشتم وێ باوەریێ، رەوشەبیر و رۆناکبیرێت وێ ئەگەرێ سەرکی یێت هەمی نەفرەتێت ڤی باژێرینە!! بوو؟ ئەگەر گەلەکن، لێ دێ چەند تێبینەیەکا لڤێرە دەمە دەست نیشانکرن وەک دەرگەهەک بوو دانووستاندنەک مەزنتر. یا ئێکێ، من نەدیتییە رەوشەنبیرێت دهۆکێ شیابن، جارەکێ کۆمەکا کاری درۆستکەن یان بنە یەک دەست ژبۆ گەهاندنا پەیامەکێ یان کارکرن ل سەر پرۆژەکی یان پشتەڤانیا ئێک دوو بكەن، بۆ گوهورینێت مەزن. بێ گومان ئەگەر ب کەت کەت کاربکەن، دەنگێ وا ناگەهیت و دێ هێنە راوەستاندن ژلایێ پارتێت کوردی. لێ ئەگەر ب کۆم کاربکەن، ئەز باوەرم دێ شێن بنە سەنگەکێ گران د هەمی لایێت ژیانێ و دێ شێن کارتێکرنەک مەزن پەیداکەن. دو، ئەزێ ب هزارەها گوتار و نڤێسین و هوزان و رۆمان و چێرۆکا ل دهۆکێ دبینم دهێنە بەڵاڤکرن، لێ بمخابنیڤە کارتێکرنا وان گەلەک یا کێمە و باهرا پتر دبێ مانانە و دبێ پەیامن!! بوو، ئەگەر چنە؟؟ دوو ئەگەرێت سەرەکی یێت ڤێ چەندێ ئەون، یا ئێکێ، کونترۆلکرۆنا پارتێت کوردی یێت سیاسی بوو دەزگەهێت راگەهاندنێ و پویتەپێنەدانا سەرنڤیسەر و کارمەندێت ڤان دەزگەها بەرامبەر نڤیسەرا و هزارا ئازاد، بوویە ئەگەرەک سەرەکی بۆ کوشتنا نڤێسینێت باش و تژی پەیام. ئەگەرێ دووێ، یا ب رەوشەنبیر و نڤێسەرانڤە گرێدایە. بۆ نموونە ئێکەتیا نڤیسەرێت کورد و سەندیكا رۆژنامەڤانا و دەزگەهێت راگەهاندنا ئازاد و ڤێرا هەرە، هەتا ئەڤرو نەشیاینە رۆژەکێ دەستنیشانکەن بۆ باشترین رۆمانا ساڵێ، یان لێکولینێ یان گوتارێ، یان چیرۆکێ یان هوزانێ یان و یان... هیچ دەستخۆشی بۆ کەسێن زیرەک و خودان هزرێت باش نینە. گرنگیا ڤێ رۆژێ و ڤێ دیاریا رەمزی ئەوە، دێ بیتە پاڵدەرەک مەزن بۆ پێشکێشکرنا بەرهەمێت باشتر و ساخکرن و بەڵاڤکرنا بەرهەمێ باش و بناڤ و دەنگییا نڤیسەرێت دەڤەرێ.
من جارەکێ هەوڵدا دگەل برادەرەکی دیاریەکا بڤی رەنگی دروستکەم، بۆ باشترین چێرۆک و رۆمان و گوتار و لێکولین و هوزان و رێپورتاژ و بەرنامە... و دیاریا مە لۆگویەکێ پایتەختێ بادینان (ئامێدیێ) و یەکەم قوتابخانە و زانکویا کوردستانێ(قوبەهان) بوو. لێ چەند ئاریشەک و ئاستەنگەک کەفتنە درێکێدا و نەشیاین بجێهـ بینین. لەوما ئەگەر لایەنەک بەرهەڤیا خۆ دەربریت بۆ هاریکاریێ، دێ شێین جارەکادی وی پرۆژەی ساخکەینە ڤە. ئەز باوەرم دێ بیتە دەستپێکەک مەزن و گرنگ بۆ پێشڤەچۆنا کارێ رەوشەنبیری ل دهۆکێ و کوردستانێ.
