مهاباد تاج الدین
هەڤژینی ئێك ژ پرۆسێن هەرە گرنگە د ژیانا مرۆڤایەتیێ دا و ئەو جورە پەیوەندییە، ئەوا ئایینی رێ پێدایی بۆ پاراستانا دەهمەن پاقژیا ژن و زەلامان. هەروەسا بەردەوامبوون لدەمەكی بۆ دەمەكێ دی و بەردەوامیا نفشێ مرۆڤان و ئەڤە ژی بۆ ئاڤەدانكرنا ئەردی و دروستبوونا كومەلگەهانە و ئەڤ پەیوەندییە ئارامیێ ب دل و دەروونی دا دئینیت و یا گرنك د ڤێ قوناغێ دا، هەلبژارتنا دروستە.
گەلەك سەدەم هەنە، كو ئەڤ پرۆسا هندە گرنگ و پیرۆز گیرۆ ببیت، وەك، كاودانێن ئابوری كو ب ئێك ژ سەدەمێن هەرە بەرچاڤە ژبۆ گیرۆبونا و پێكنەئینانا ڤێ پرۆسێ، چونكی دڤی سەردەمی دا بارا پترا گەنجێن مە چاڤ ل هەڤدوو دكەن و گێرانا رێورەسمێن زێدە و تێچوویێن زێدە و بێی ئەو هیچ مفایەكی ژێ وەربگرن، بتنێ بۆ چەند وێنەیەكا و ڤیدیویان بۆ بیرهاتن، بەلێ ب دروستی ئەو هزر د وێ چەندێ دا ناكەن، دێ چەند كارتێكرنێ ل ژیانا وان كەت د پاشەرۆژێدا. د ئەنجام ژیدا، كور ڤێ پرۆسێ گیرو دكەن و كچ پتر داخوازیا دكەن و ئەڤە هێدی هێدی ڤێ پرۆسێ پاش دئێخیت. ئەگەر ئەم بەرێ خو بدەینە باب و باپیرێن خو، ئەڤ چەندە بشێوەكێ گەلەك جوان یا راگرتی و تێچوویێن كێم و شەهیانێن خۆش د گێران و هەروەسا مافێ ژنێ ژی ب جوانترین شێوە ددایێ و رولێ ژنێ گەلەك یێ بەرچاڤ بوو. دڤێت ئەم ڤێ چەندێ ساخ كەینەڤە و جارەكا دی بەرەف كومەلگەها رەسەن یا كوردەواری بچین.
بارا پترا گەنجێن مە چاڤ ل هەڤدوو دكەن و گێرانا رێورەسمێن زێدە و تێچوویێن زێدە و بێی ئەو هیچ مفایەكی ژێ وەربگرن، بتنێ بۆ چەند وێنەیەكا و ڤیدیویان بۆ بیرهاتن
دیسان ئێك ژ سەدەمێن دی، مەزنبوونا ژیێ مروڤی یە. خوە ئەگەر ژیێ مروڤی چەند مەزن ببیت، بریارا پێكئینانا هەڤژینیێ بۆ هەردوو ئالییان ب زەحمەت دكەڤیت چ كچ یان كور بیت و هەر كەسەك هزر دكەت ئەو دكاریت ژیانا خو ب رێڤە ببەت بێی كەسێ بەرامبەر و ئەو وێ چەندێ ژبیر دكەن، كو ئەو ئاڤاكەرێن كومەلگەهێ نە و دەسپێكا ژیانێ و پەیوەندیێن جوانن كو خودێ یا حەژ وێ پەیوەندیێ كری. هەروەسا هندەك سەدەمێن لاوەكی ژی هەنە دبنە ئەگەر، كو هەڤژینی زوی گیرۆ ببیت یان هەر دروست نەبیت، ئەو ژی ئەڤ كاودانێن خراب یێ ب سەرێ كومەلگەها مەدا هاتین، ئەوا دبێژنێ (سوشیال میدیا) و تا راددەیەكی ڤێ چەندێ كومەلگەها مە ژ داب و نەریتێن خو یێن جوان دویر ئێخستیە، نابیت هەر تشتەكێ بهێت بتنێ ئەم خرابییان ژێ وەرگرین، هەر چەندە وێ باشی ژی هەنە، بەلێ بارا پتر كارتێكرنێن نەرێنی لناڤ كومەلگەهێ دا بەلاڤ كرن، ژ وان ژی پەوەندیێن شاش كو گەلەك د دویرن ژ داب و نەریتێن مە و ڤێ چەندێ گەنجێ مە نەباوەری ب هەڤژینیێ ما و نە ڤیان بۆ ڤێ پەیوەندیا گرنگ یا هەڤژینیێ ما.
