مستەفا دادار، ئەو هونەرمەندەی خاوەنی دەنگێكی ئەفسووناوییە

10:34 - 2023-05-23
دووتوێ
412 جار خوێندراوەتەوە

دیداری: حەمید بەدرخان - هۆڵەندا

 +هونەرمەندی نێوداری كورد مستەفا دادار موكری، دەنگێكی ئەفسووناوی نێو ئاواز و مۆسیقای كوردییە. دەنگێكە تاكو ئێستا هیچ كەس نەیتوانیووە لاسایی بكاتەوەو وەكو خۆی بیڵێتەوە، هۆكارەكەشی ئەوەیە كە دادار لە گۆرانی گوتندا بزۆز و پڕ جووڵەیە. لە كاتی چڕینی هەر سروود و گۆرانییەكدا پەیامێكی هەیە، پەیامەكانی تێكەڵ بە هەست و نەست و خولیاكانی گوێگر دەبێت و ئەفسانەئاسا دەنگی لە هزری كۆمەڵگای مرۆڤایەتییدا جێ دەگرێت.
مستۆ داداری تەمەن 62 ساڵ هەمیشە لە خەمی كۆمەڵگای كوردەواری و مرۆڤایەتییدا بووە. بە چریكەی خۆشخوانی چڕینی گۆرانی ناخی مرۆڤ و ئاسمان دێنێتە لەرزین، ستران بۆ كورد و كوردستان و نەتەوە جیاوازەكان و گەلانی ژێر دەستە دەچڕێت و هەردەم دەست لەسەر سینگ ئامادەیە بە دەنگە ئەفسووناوییەكەی گۆرانی بۆ هەوادارانی بڵێت.
لە هەر كوێیەك غەدر و چەوسانەوە هەبێ مستۆ دادار لەوێیە.
لە كارەساتەكاندا كە بەسەر گەلی كوردا هاتووە، وەكو مرۆڤێك كە هەست بە لێپرسراوێتی بكات، لە كۆڕەوی 1991 لەگەڵ رێكخراوە نێودەوڵەتییەكاندا یارمەتی كۆكردۆتەوە و رەوانەی كوردستانی كردووە، گۆرانی بۆ گەلی كوردستان و نیشتمان و خاك و نەتەوە و پێشمەرگە و كارەساتی خوێناوی قەڵادزێ و هەڵەبجە و كۆڕەو و شەنگال و گوتووە و بەشداریی كاریگەری هەبووە و دەبێت.
مستەفا دادار خۆی بە خوێندكاری هێمنی شاعیر دەزانێت و كاتێك قسە دەكات سەری زمان و بنی زمانی باسی هێمن دەكات و لە هەمانكاتیشدا تێڕوانینی قووڵی خۆشی هەیە دەربارەی ژیان و بەرهەمی نووسەران و شاعیرانی دیكەی كورد و زۆر بەوردیش ئاگاداری مێژوو و جوگرافیا و هونەر و ئەدەب و كەسایەتییەكانی هەرچوار پارچەی كوردستانە. ئاگاداری موزیكژەنەكانی جیهانیشە وەكو مۆزارت و شۆپان و بتهۆڤن. دەستەو نەزەریش لە ئاست هونەرمەندانی گەورەی كورد وەكو سێوە، عەلی مەردان، تاهیر تۆفیق، حەسەن زیرەك، ماملێ، شەماڵ سائب هتد. وەستاوە.
رۆژی هەینی 12/05/2023 لە سەردانێكدا بۆ ئەمستردام چاوم پێی كەوتەوە. لە 2013یش لە چالاكییەكی ناوەندی كوردی لە ناشفیلی ئەمریكا  بینیم و زۆر قسەمانكرد، پێشنیازی ئەوەم بۆ كرد، بۆچی تاكو ئێستا نەتوانراوە شیعرەكەی عەبدوڵڵا پەشێو بە ناوی (باركەن بڕۆن ) بەشێوەی پانۆراما پێشكەش بكرێت. پاش 10 ساڵ كاتێك یەكتریمان بینی لە ئەمستردام، پەیوندییم بە عەبدوڵڵا پەشێو و موزیكژەنی نێوداری كورد ئالان عارفەوە كرد  كە ئاواز و دابەشكردنەكەی بگرێتە ئەستۆی خۆی و ئالان عارف پەیمانی ئەوەیاندا ئەو خەونە جوانەی دادار بهێنێتەدی، چونكە من وای دەبینم تاكو ئێستا هونەرمەندانی كورد نەیانتوانیوە تەجاوزی ئەو سروودەی دادار بە نێوی نیشتمانی كورد بكەن، هەمیشە كاریگەری سروودی نیشتمان لەسەر تێكڕایی كۆمەڵگای كوردەواری زۆر زۆرە.
دادار دوور دەڕوانێت، هەمیشە لەخەمی گەلی كوردستان و تەبایی و یەكڕیزی ماڵی كوردایە، هەر بۆیە كاتێك باسی شەهیدكردنی باوكی دەكات، كە منداڵبووە و باوكی خۆی نەدییوە، باسی پەیوەندی خۆی و بنەماڵەكەشی دەكات، درۆدونگە لەبەرانبەر هەموو شتێك، هەندێكجار باجی دڵسافی و نەرمونیانی خۆشی دەدات.
دادار دەخوازێت ژیانی هاوسەری پێكبهێنێت و بەیەكجاری بگەڕێتەوە كوردستان و لە سلێمانی و لەگەڵ دولبەری دەستنیشانكراوی خۆی و بە ئاواتی ئەوەی كچ و كوڕێكی جوان پەروەردە بكات. یەك لە تایبەتمەندییەكانی ئەم هونەرمەندە ئەوەیە هەرگیز لە كاتی پەیوەندی بە تەلەفۆن پێویستە ئەو كەسەی پەیوەندی دەكات دایبخاتەوە، ئەو بە هیچ جۆرێك پەیوەندییەكە نابڕێت، پێم گوت بۆ وادەكەی؟ گوتی مرۆڤ لای من گەورەیە. 
دادار لە چەند مانگی رابردوودا دیدارێكی لە كەناڵی ئاسمانی كورد كەناڵ كرد و بووە سەرباسی قسەكردن لەسەر مێژووی مۆسیقا و هونەری كوردی هەر چوار پارچەی كوردستان. بۆیە منیش بە شانازییەوە دواندم و راز و نیازی و پڕۆژەی داهاتووی چییە قسە و باسمان دەربارەیان كرد.

* پاش 10 ساڵ یەكتریمان دیتەوە و دەكرێت زیاتر مستۆ دادار بناسین؟
 -مستەفا حوسێن لاسوورم پێدەڵێن، ناسراوم بە مستۆ دادار، لە دایكبووی 1-11-1960، لە گەڕەكی تەپەی قازی لە مهاباد  لە دایكبووم و لە گەڕەكی باخی سیسە بە كۆرپەلەیی پێمناوەتە ئەم گەڕەكە و چوومەتە بەر خوێندن و پۆلەكانی خوێندنی سەرەتاییم لە قوتابخانەی 25 شەهریوەر خەرمانان تەواو كردووە، پۆلی رێنمایی و دواتر ناوەندی كۆمەڵایەتیی ئابووریم لە قوتابخانەی پێشەوا كە لە پێشدا، ناوی حەمە رەزا پەهلەوی بوو تەواو كردووە لە ساڵی1980.
* چۆن مستۆی دادار (مستەفا حوسێن لاسوور) دەناسێنی؟
 - باوكی شەهیدم لە خۆشەویستی بۆ نەمر مستەفا بارزانی نێوی مستەفای لێناوم، كورتەی مستەفا بۆتە (مستۆ) دادار، كەسێ بەهۆی خوێندنەوەی (ئەسكەندەرنامەی نیزامی گەنجەوی) بە ئیلهام وەرگرتووە. دادار وێژەیەكی كۆنی ئاڤێستای زەرەدەشتییە كە لە زمانی سانسكریت و پارسەكاندا جێی خۆی گرتووە بە مانای (ئافرێنەر) (بەدی هێنەر) (فریادڕەس) (دادڕەس) (داهێنەر) دەدات! بەڵام (مستەفا حوسێن لاسوور)ی باوكم (حوسێن لاسوور) بە هۆی ئەوەی خاڵێكی سووری شەرابی كە بەركوڵمە و چاوی راستی گرتبوو، نێوی حوسێن لاسووریان لێ نابوو!
باپیرم (مارف) لەسەردەمی كێشەی (روس و عوسمانی) 1916 لە نێوچەی بڵباس و مامەش و پیرانان بەدەست روسان دەكوژرێت. كەوا بوو، باوكم لە نێوان كۆتایی 1916 و سەرەتای 1917 لەدایك بووە، حوسێن لاسوور سوێندخۆری كۆمەڵەی ژێكاف یەكێك لە قۆڵ سوورانی كۆماری كوردستان لە مەهاباد و یەكێك لە نزیكترین كەسانی پێشەوای نەمر بووە! نێوبراو یەكێك لە ئازاترین رۆڵە كوردەكانی نیشتمان بووە، بەندە هەرچیم هەیە لە خەزنەی دڵمدا، لە هەستی نیشتمانپەروەری و لە كوردایەتی و لە مرۆڤایەتی، لە دەنگ و رەنگدا لە بوێری و پاكی و نەجابەتدا هەمووی بەهی  باوكی شەهیدم (حوسێن لاسوور)ی دەزانم!
* مانای دادار و بۆچی موكری؟
 - وەك گوتم: ئێمە لە پێشدا پاشناوی موكریمان هەبووە، بەس بۆ ئەوەی بیری دواڕۆژی تێدابێ و بە هۆی نیشتمانپەروەریی باوكمەوە گیروگرفتی زێدی نەهێنە پێش لە ئاست «شای گۆڕبەگۆڕ» ئەم (دادار)ەی هەڵبژاردووە!
* بە منداڵی ئارەزووی خوێندنەوەت كردووە؟
 -بەڵێ هەر لە منداڵییەوە كاتێك تەمەنم 13ساڵان بووە، خەریكی چیرۆك خوێندنەوەبووم و خەریکی ئەم كتێبە زل و گەورەیەی (ئەسكەندەرنامەی نیزامی گەنجەوی) بوومە كە باوكی شەهیدم بۆی بە میرات بەجێ هێشتبووم، كە شاكارێكی ئەدەبی و حەماسەییە و ئێستاش چەند تاكە شیعرێكی (نیزامی گەنجەوی) كە تێیدا بوو، لە بیرم ماوە و كردبوومە كوردی:
 ((چوار شت لە یەكتر هەرگیز نابن تێر
زەوی لە ئاوی باران چاو لە نەزێر
ژن لە شۆرەتی پیاو، پیاو لە هۆنێر «هونەر»))
هەروەها لە تەمەنی چواردە ساڵییمدا بەهۆی گۆڕینەوەی دوو كتێب لەگەڵ هاوڕێم (عەلی خوادادی) كوڕی حاجی خوادادی نەمر كە بە رێی عیراقدا چووبووە حەجێ تووشی كتابێكی شیعر هاتم و بەهۆی ئەم كتێبە شیعرییە تێكەڵاوی (مەلا محەمەدی جەلی زادە) بووم، كە مەلای گەورەی كۆیە بوو و لەهەمانكاتیشدا ئاشنایەتییم لەگەڵ شیعرەكانی حاجی قادری كۆیی پەیداكرد، كوردی نووسین و خوێندنەوە بە كۆششی خۆم فێربووم كە ئێستاش زۆر شیعرم بیرماوە.
* چۆن ژیانی مێردمنداڵیتان گوزەراند؟
-مێرد منداڵی من وەك دەڵێن: هەژارەكان بریندارن، هەژارەكان برینەكانیان جیاوازە، خەمەكانیان رەنگاوڕەنگە، بەڵام زەنگینەكان و ساماندارەكان خەمی كیسەی زێڕەكانیانە، نیازیان بە كێشكچی زێڕ و زێوەكانیانە و دونیایان لە توورەگە ناوە! بەبێ زێدەڕۆیی، دەتوانم بڵێم ئەگەر باوكی شەهیدم چاونەبار و مست قووچاو بوایە یان خۆبەختكار نەبوایە، یان (بان بانكی نووستووی سەركۆماری زێڕ) بوایە، دەبوو بە یەكێ لە ملیۆنێرەكانی كورد و ناوچەكە!
دوای شەهیدبوونی باوكم، دەبوو زوو گەورە ببم! خۆم دەبوو پێداویستییەكانی ژیانم، قەڵەم و دەفتەر و كتێب بكڕم، هەر بە منداڵی كرێكاری كورەخانەكانی خشت بڕی و كاری قورس بكەم! هەر لە كاری گەنمەشامی برژاندن و كوڵاندن تا (بەهێ پیشاندن) تا فرۆشتنی (نۆكاو) و شیری دادە بامێ و شاگردی كاری خانووبەرە و هەتا چارەكە خشت لە پشت نان بۆ چین و نهۆمی سێ تا نهۆمی شەشی ماڵە ئاغای مۆفەقی كتێبفرۆش و رەوانشادی نەمر (عەزیمی مۆفەقی) هاوڕێی منداڵی و شارم، مخابن لەتۆم بیستووە كە كۆچی دواییكردووە.
ساڵی 1983 ئاوا مێردمنداڵی بەندە گەنجۆكەییم بەسەر فەرشی باوكی فرمێسك و كوڕی ژاندا تێپەڕ كردووە! لە چوارچێوەی پەروەردەیشدا دوای شەهیدبوونی باوكم، چەند جۆرە پەروەردەییم بۆ هاتۆتە پێش: یەكەمیان: خوشكە گەورەكەم (ئایشێ) كە دەستێكی ئاسنینی هەڵەشە و تووڕە و تۆسنی هەبوو، بەم چەشنە (كێ گوتی نەبیسە، دەسا بە مست و زللە بیبیسە!) دووەمیان : دوای مێردكردنی ئایشێ! (فاتمۆكێ)ی دایكی نەمرم بوو.
* ئێستا كێت ماوە لە خزم و كەسوكار؟
 -بەندە دوای پێنج و باشترە بڵێم كچ و كوڕێكی دیكە لە دایكە خورشیدی خەڵكی قەلەڕەشە لە سەردەشت لەدایك بوومە، كە محەمەدی كوڕیشی مردووە، ئێستا لە دایكی خۆم كە خۆی نەماوە چوار خوشكم ماوە، تاقە برایەكم بوو ئەویش مردووە، نیوە برا واتا دایك برام ماون و برازا و خزم و كەسی زۆر! بەندە زیاتر لە 37 ساڵە لە غەریبی دەژیم، لەماوەی ئەم تاراوگەییەدا چەند جارێك 3 خوشك و یەك جار خوشكێكم دیوە، خوشكەكانی دیكەم نەدیون، یەك جار دایكم بینیوە و تەنانەت نە بە گۆڕیان دەزانم نە بەگۆڕستانیان!
* لە كەیەوە ئاشنای دنیای هونەر و مۆسیقا و گۆرانیگوتن بوویت؟
 - هەر لەو كاتەوە جێ و بانم لە بانی بێشكەوە بوو، كە كورد بووم ئاشنای دەنگ و نەوای رۆڵە لای لایە بەرزە لای لایە بووم و پاشان نازناوی بەرزان و بارزانیان لێنام! هەر لەو كاتەوە رووم كردە فێرگەی سەرەتای پۆلی چوارەمەوە، لە پشوودانی مەدرەسە بەهۆی (هاندان)ی هاوپۆلان (سۆیبە باڵابەرز)ی برایانی(زیزی)م دەگوتەوە! دەستیان دەكرد بە چەپڵەڕێزان، ئاشنای هونەری دەنگ بووم، هەر لە كاتی ئێواران و شەواندا لە شاری مەهاباد ئاغای (حەسەنی مەژدی) كوڕی نەمر (مەلا حوسێنی مەژدی) چیرۆكی شەوی دەڕازاندەوە بە (ئۆپەرێت)ە كوردییەكان وەكو (لەشكری) بەدەنگی (مەحمەڵ) هۆگری هونەری دەنگ و ئاواز و سەدای بەهەشتی كوردەواری بووم!
هەر لەم ساڵانەشدا لە پێشەكی چیرۆكی شەودا كە بە سۆلۆ solo violin) كەی (ریمسكی كۆرساكۆف Rymsky Korsakof) ڤیۆلۆنیستی روسی دەستیپێكرد لە قووڵایی موزیكی كلاسیكیدا مەلەم دەكرد!
هەر لەم ساڵانەشدا 15 ساڵ دەبوو نەدەبووم، یەكەم كاسێتی موزیكی كلاسیكم بەهۆی مامۆستا (خانەی ئەحمەدزادە)ی فلوتژەن كە لەئۆركێسترای رادیۆ سەرپەرشتی دەكرد، وەرگرت و ئەم كاسێتەی ئەحمەد زادەی نەمر پێیدام كاسێتی موزیكی كلاسیكی (نیكۆلای پاگانینی Nikolay Paganini) ڤیولۆنیستی دەست و پەنجە سیحراوی ئیتالی بوو كە دوایی زانیم ئەو بەرهەمانە كە هی ئەو بوون هەمان كۆنسێرتینۆ بۆ گیتار و چەلۆ Cosertino for Guitar and Cello) ن!
* پتر لە موزیكی كلاسیكی خۆرئاوایی یان كام شێواز گوێ لە كامە موزیكیان دەگری تا دەگاتە كلاسیكی كوردی و دەنگەكان؟
 -بە دەردی مامۆستا هێمنی نەمر دەفەرموێت:
«جیلوەی جوانی لە هەرچی دا هەبێ خۆشم دەوێ
رۆژێ كوشتەی مینی ژۆپ و رۆژێ گیرۆدەی شەدەم!»
دیارە بۆ بەندە هەرچی ئەوەی پێی دەڵێن: رەسەنایەتی و (غەربییەكان) پێی ئێژن (ئۆرجینالیتە) واتە (ریشاڵ و رەگ ئاژۆ) دەخاك و ئەسڵدا بوون، نەك (بەدەڵییات و نەزۆكی) خۆشمدەوێ و پەسەندی دڵی دەربەدەری بەندەیە و كورد گوتەنی: (ماڵی قەڵب سەر وە ساحێبی!). موزیك گەلان بەیەكەوە گرێ دەدات! ئازارەكان سووكتر دەكات! گرێی دڵ چاك دەكات! هێدی و هێمن بە دیاری دێنێت! بەتایبەت موزیكی كلاسیك كە ئۆقیانووسێكە و دایكی گشت هونەرەكانە، جا هەر لە ڤیڤاڵدی Vivaldi) بیگرە تا (J. S. Bach) باخ (بارۆك) پەرەدانەر! تا بیتهۆڤێن Beethoven و شۆپین Shopen و ئێریك ساتی Eric Sati و گۆردی جێف Gurdi Jef كلاسیك و هەر لە Frank Sinatra ی Jazzەوە بیگرە و ریمسكی كۆرساكۆف بگرە تا بیتلس Betels و ئێلڤیس پرێسلی Elvis Presly و تەنانەت Michael Jackson pop و Elton Thon و Jim Morrison و Jimmy Hendrix و James Brown بلووز و... هتد، بەس خۆم زۆر گوێ لە (نیوەشەوییەكانی شۆپێن) Fredrick Shopen و (پۆلێنێزەكان Rock and Roll) دەگرم و هەروەها پیانیست Claude Debussy كلاودێ دیبوسی كۆمپۆنیست! تا Jenna chek یانا چیك (تاراس بولبا) هەر ئۆپێراكانی مۆتزاری تا ئۆپێرای كۆرئۆغلۆوی (ئوزەیر حاجی بێتیگۆف) كە یەكەم جاری كتێبەكەیم لە نەمر هاوڕێ  عوزێر و 3 انقلاب نووسینی (رحیم رئیس نیا) لە كورمانجی سەروو تا كورمانجی نێوەڕاست و خواروو، شڤانپەروەر لە دەنگە كوردییەكان هەر (عەبدوڵڵا زەینەكێ هەتا عارف جزیری، حەسەن دواوەی تا شاكیرۆ، كاوێس ئاغا تا مامۆستا سەید عەلی ئەسغەری كوردستانی تا مامۆستا رەسوڵ بێزار گەردی، حەسەن حەیران، حەسەن سیساوەیی. تا ئایشە شان، نەسیرین شیروانی، مریەم خان، دایكی جەمال، مەنیج حەیران، وڵای سنجانی، مەلا حسین عەبدوڵڵا زادە، حاجی رەشەی ئینەرفاسز، ماملێ، حەسەن زیرەك، حەسەن گەرمیانی، مەزهەر خالقی، كامەران مەتەری، فوئاد ئەحمەد، تەحسین تەها تا فارسەكان ئوستاد بنان، تاهرزادە تا قمرالملوك و هتد) پێم جوانن تا دەنگبێژانی جیهانی ئۆپێرا تیژەكان (بەیتبێژانی كورد) رەحمان بەكر تا (كاروزۆ) ئیتالی Caruso و ئێنریكۆ Enrico. 
* كوردایەتی چی پێبەخشیت؟
 - كوردایەتی رقی پیرۆزی پێبەخشیم! كۆڵنەدەری! لە خۆبوردوویی خۆشەویستی بۆ خاك و نیشتمان و نەتەوە، دایكی نیشتمان! فرمێسك رژان و ژوان و چیكڵدانەدار بوون! جوامێری، كوردپەروەری، مرۆڤپەروەری، میواندۆستی، ژیاندۆستی و ژیانخۆشی، خۆنەویستی، خاكپەرستی، جوانی دژە خۆپەرستی، دژە بێگانەپەرستی، خۆشەویستی بۆ زمانی زگماك، نەفرەت لە داگیركەر، رێز لە كوردی چاك، نەفرەت لە خائینان و جاش و خۆفرۆش و نیشتمان فرۆشان! ئازایەتی، ماندوونەناسی حیزبە شۆڕشگێڕەگان و چەشنی ئامراز سەیركردن و كردنە وەسیلە! (كوردایەتی رووگەمە، حیزبایەتی پردمە!) (ژین  ژیان  ژن  دایكی نیشتمان).
* چۆن ژیانی37 ساڵەت لە غەریبیی بەڕێكرد!
- كاتێك پرسیارم لە مامۆستا هێمن موكریانی كرد و وتم: مامۆستای گەورەم، بڕیارمداوە بڕۆم بۆ هەندەران بۆ خوێندن؟ ئەویش هێمن ئاسا لێم گرژ و مۆن بۆوە برۆكانی تێكنا و تێیڕوانیم  لە جیاتی پێمبڵێت: دادار (بۆ بەجێم دێڵی) عاقڵبە و خۆم دەردی غەریبیم چێشتووە و ناڵەی جوداییم لە خۆڕا نەنووسیوە؟
 گوتی: (دە بڕۆ ئەمما دڵنیا بە، بە كەرێتی دێیتەوە!) ئەم راوێژە كە لە زمانی خۆمەوە بڵاوبۆتەوە، هەنووكە كەوتۆتە سەرزار و زمانان، مخابن زۆر كەس لە مەبەستی مامۆستا هێمن بە هەڵە تێگەیشتوون! ناوەڕۆك (عەقڵ كاری بە خوێندن نییە!) هەروەها ئەم 37 ساڵە لە غەریبی دەمتوانی لەم (تەنیایی)یەم كە (تەنیایی تەواو)ی پێ دەڵێن 37 كتێب یان لانی كەم 3 زمان بە پاراوی فێربم،  كە مخابن نەمكرد! بەهۆی جۆراوجۆر 30 كتێب وەرگێڕم لە جیاتی 26 جار بنووسم تا 34 جار ماڵم گوێزاوەتەوە! یان 26 ژن بێنم!  زۆرم سەفەر كرد! (چیم نەدی) (هێشتا منداڵێكی بە ریش و ردێن سپی، بەبێ دەسرازە و لانكم)
* یەكەم بەرهەمی گۆرانی و كۆنسێرتت لە چ ساڵێك بڵاوكردۆتەوە؟
 -تەمەنم 15 ساڵان بوو، كە دەمویست خۆم لە ژێر ركێفی حەسەن زیرەك تا رەفیق چالاك و مەحمود حەمە لەیلێ و عومەر دزەیی بێنمە دەرەوە و هەوا و ئاوازێكم دروستكرد دوای شەرمم كرد وازم لێ هێنا!
بەڵام بە رەسمی ساڵی 1976 سەرەڕای (كەڵ بەموو بەندبوون) سەردەمی شا كە 16 ساڵ بووم مخابن وێنەكانیان فەوتاندم وەك بەڵگە بە (ئۆپەرێتی گوڵی خوێناوی) لە (خانەی جەوانانی) مەهاباد هاتمە سەر شانۆ و پاشان بابەی (رەفیق چالاك ... هتد) دوای ئەوە  لە ساڵی 1983 كاسێتێكم  بڵاو كردەوە.
* مەرجە هونەرمەند زمانێكی دیكە بزانێت جگە لە زمانی دایك؟
 - بەڵێ لە سەردەمی سۆشیال میدیای ئێستادا گرنگە، بەڵام  ئەگەر مرۆڤ 20 تا 30 زمانیش بزانێت، زمانی دایكی نەزانێت دیسان هەر زمانزانین دادی نادات! گرنگە زمانی بیانی بزانی بۆ گۆرانی و ناسینی هونەركارانی بیانی ئیلهام لێ وەرگرتنیان، بۆیە ئەوجۆرە تێڕوانینە كاریگەریی لەسەر  جوبران خەلیل جوبرانیش هەبووە و كاری تێكردووە بۆ شێوە روانینی لە (ژن) یان (فایەق بێكەس ئینگلیزی زانینی) بە وێنە ئەگەر مامۆستا گۆران زمانی (فەرەنسی) زانیبا گۆڕانكاری گەورەتری لە شێوەی ئەدەبدا دەبوو.
*  بە چەند زمان گۆرانیت چڕیوە؟
 -بەچەندین زمانی  زیندووی جیهانیی گۆرانیم گوتووە لەوانە: بە كوردی، ئازەری Azaria، ئەرمەنی Armenia، ئیتالی Italian، ئیسپانیSpanish، ئینگلیزی English.
* بەم پێیە بەچەند زمان دەتوانی گۆرانی بڵێی، بۆچی بەردەوام نەبوویت؟ 
-  ئەگەر بچینە نێو دونیای نێودەوڵەتییبوون ئینتەرناشیۆناڵ International  ، بێ ئامادەگی، هەروەكو سەعدی شیرازی شاعیری فارس دەڵێت:
«استعداد بێ تعلم دریغا- تعلم بی استعداد مخابن .
هەتا دەمتوانی نەمزانی هەتا زانیم نەمتوانی.  وتەی مەحمود پاشا جاف.
بۆیە منیش وتەی خۆم هەیە و دەڵێم: مرۆڤ گەورەترین دوژمنی خۆیەتی .
رەشبینی و خۆ لكاندن و خۆماندووكردن بە شتی بچووك و لابەلا دەمانخاتە نێۆ  گۆشەگیری و پەراوێزخستنەوە، هەربۆیە كاتێك هەستی پێدەكەین لە (مەتن و ناوەڕۆك دووركەوتووینەتەوە!) كاروانێك كاتێك دەگاتە سەر مەنزڵی مەقسود و ئاوات بە مەرجێ گوێ  نەداتە وەڕینی توولەیەك یان لوورەی گورگ!
رۆژێك كوڕێك بە دایكی گوتبوو كە لە ئەڵمانیا دەژین و ئێستا دوای خوێندنی بەرز خاوەنی شەهادە و كاری باش و خانوو و ماڵی خۆیەتی! بەدایكی گوتبوو، دایە گیان، ئەگەر من دایكی كاك مستەفای دادارم هەبوایە دەبووم بە (ملیۆنێر)! كورد دەڵێ: (كیژ) گوتوویە! ئەو عەقڵەی ئێستا هەمە، وەكو (ژن) سەت بریا بە (كچێنی) هەمبوایە!
بەندە لە داخ ئەمە كە كورد باوكمی شەهید كرد، یان چەند كوردی خۆفرۆش نەك 40 ملیۆن كورد، خۆشەویستیەكەم لە نێوان ماچكردن و گەزتندا خولی خواردو لە (بازنەی) گۆڕخانەی رابووردوومدا مامەوە (داهاتوو)م لە  كیس دا! جا نازانم منیش بە خیانەتكردن بە (توانام) خیانەتم بە كوردستانی پیرۆز و كوردە بەشەرەفەكان كردووە یان نا! دەنا بەم دەنگە بەرزە چڕە (High Tener) تێنۆری بەرز و ئۆپێراییە ئاوێتە بە  رەگئاژۆی (حەیران و  لاوك و بەیت)ی سۆران و موكریان و خۆشناوەتی و پشدەر دونیایەك و شۆڕشێكم ئینشا دەكرد، هەیهات!
(دوو كەس ئەنگوستی حەسرەتیان دەزاریان ئاخی و گەستیان! یەكێكیان ئەو كەسەی كە دەیزانی و نەیكرد، یەكێكیشیان كە كردی و نەیزانی).
*  ئەمڕۆی دونیای هونەر و مۆزیك و رۆڵی رووناكبیران چۆن دەبینی؟
 - هەر چەمكێكی هونەری ئەگەر داهێنان و هەرمان و مانەوەی بۆ مێژوو تێدا بێت رێزی لێدەگرم،  موزیكی كوردی لە مێژوو تووشی پشوو بڕی و تەنگەنەفەسی بوو لە نێو گێژاوی بازیكردنی لاساییكەرەوەیی لە روومەتێكی بەڕواڵەت سوور بۆوەی بەر زللەی بیژوویی و نەزۆكی و لە خۆنامۆبوون لە جیاتی خۆدیتنەوە و خۆناساندن و رەهابوون لەنێو بازنەی كێشەی بێ ناسناوییدا! هەژارێتی شیعریی تایبەت بۆ گۆرانی، هەژارێتی (ریتم Rhythm) بە زانستیكردنی موزیك و ئەو موزیكە و رووناكبیرییە بێجگە لە جوانكارییەكانی پێشەكییەكانی دیكەی ئەوان ( عبدالصمدی و مجتبی میرزادە و مامۆستا قادر دیلانی داهێنەر و موزیكی بێ وێژە وەك سكاڵا و  دەمی راپەڕین ... هتد ) تا دڵشاد حەمە سەعید و عەبدوڵڵا جەمال سەگرمە چەند كارێكی (ئاكۆ عەزیز مینا، لەگەڵ چەند هونەرمەندێكی كرمانج) هەر لە بازنەی لاساكەرەوە دەخولێتەوە و حەیف و مخابن شتی نوێ و تازەگەرییان لا نییە، هەر لە خولگەیەكی كۆندا دەخولێتەوە.
* لەسەردەمی سۆشیال میدیا هەست ناكەیت، كاروباری هونەری و بڵاوكراوەكانی هونەری رووەو داكشانە!
 -بێگومان لەسەردەمی سۆشیال میدیا موزیكی كوردی پتر فرچكی زۆڵێتی و موزیكێكی بێ دایك و باب و لە خۆنامۆ و نەزۆكی (وەجاخ كوێری) بە خۆوە گرتووە، (ئۆرجینالیتە) و رەسەنایەتی و  رەگئاژۆیی دەخاكدا مانای نەماوە! بەچكەیەك پەروەردەكراو كردنە فوودانە لە پژدانێك دەچێت بە دەرزییەك دەتەقێتەوە. (كەس لە پڕێ نابێ بە كوڕێ!) (هەر دار بەڕووەكان بەرگەی رەشەبا بەهێزەكان و زریانی دڕ دەگرن).
* چۆن دەڕوانیتە گوێگر و ئاوازدانەران، لەسەردەمی جیهانگیری و سۆشیال میدیا؟
 - (زەوی قاقڕ و شۆرەكات، جاڕەگوڵ و سونبوڵ و گوڵ و موڵ دەخۆوە ناگرێت) وەكی نەمر سوارەی ئیلخانی زادە گوتوویەتی: (گوڵم هەرێمی زۆنگ و زل چلۆن دەبێ بە جاڕەگوڵ) بۆ ئەم سەردەمی جیهانگیری مرۆڤی موزیكزانی  كورد (دەشێت) تێبگات: وێڕای سەردەمی پەلەپروسكەی دیجیتاڵ و چركە فڕییەكان و سنوورە پەڕیوەییەكان كورد هێشتاش (كیانی)نییە، روومەتی نییە! 100 ئای دی تی تی ناسنامەی نییە! پاسپۆرتی تایبەت بە خۆی نییە! شەرمە بۆ ئێمە هێندە بژین بێ ناونیشان و بێ شوناس! لە مرۆڤایەتیی دەپاڕێمەوە ئێمەش وەكو گەل و نەتەوە بەشمەینەتەكان ببین بە خاوەنی دەوڵەتی خۆمان!
* چ بەراوردێك دەكەی لە نێوان كاری دەنگبێژانی پێشتر و ئێستای دەنگبێژانی كورد؟
-(بەبێ كۆنێكی زێڕین، نوێیەكی زێڕین وجودی نابێت!) ئێمە (وەجاخ كوێرین) هەر نەوەیەك بەبێ كارتێكاری كۆنێكی زێڕین، نوێیەكی زێڕینی بۆ نایەتە دی). هەر بەرهەمێكی نوێ كاتێك داهێنەرانەیە و دەتوانێت مۆركی هەرمان لە سینگی بدات كە رەگئاژۆی رابردوویەكی زێڕین بێت! چ لەسەر بنەمای ئەفسانەیەكی زێڕینی نیشتمان بێت یان شیعرێكی سروشتی بەبێ عەبدوڵڵا زەینەكی و كاوێس ئاغا، شاكیرۆ نەدەبوون بەبێ ڤیڤاڵدی و باخ نەدەبوو! بەبێ مامۆستا سەید عەلی ئەسغەری و سێوە و رەشۆڵ و ساڵح دیلان و خەلیل سدیقی و هتد نەدەبوو.
*  لە هیچ كارێكی هونەریت پەشیمانی؟
 - بەڵێ لەسەر لینین Lenin ساڵی 1989 بەهۆی پێوەندی لەگەڵ یەكێك لە كۆمۆنیستەكان واتا ئیتحادیە كۆمۆنیستەكان ماوێستەكان لە Sportzal هۆڵی (تەبیب بدنی) وەرزشكاری،  جڤین و  لێدوانێ ساز كرا لەسەر (روانینی ماركسیزم و لینینیزم) لەسەر ئەحزابی بۆرژوازی كوردی بە روانینی شەیدایان و زانا و ماركسی موهەندیس ( كاك سەڵاحەدین بورهان) بووە ئامۆزای خزمی نیزیكی مامۆستا هێمن واتا مەبەستی كاك سەڵاح (حدكا) و حزبە كوردییەكان و فەشەلیان! لەوێ منیان دەڕوو هاوێشت سەرەڕای زۆر گەنجیم سروودێك كە شیعری نەمر مامۆستا عەبدوڵڵا گۆران بوو بۆ (لینین) بڵیم، من (لینین)م خۆش نەدەویست. بۆیە لەو سروودەی گوتم بەسەر لینین زۆر پەشیمانم!
* لە فیستیڤاڵە نێوەدەوڵەتییەكان بەشداریت كردووە بەڕای تۆ گرنگی ئەو فیستیڤاڵانە لە چیدایە؟
 -سازكردنی ئەو فێستیڤاڵانە روومەتی كوردی لەنێو ئاوێنەی بێگانەدا دەرخست! لەو رێگایەدا هەوڵدانێكە بۆ هەمیشە سەری كورد بەرزبكات لەنێو سەرانی عالەمدا! وەك جگەرگۆشەی كورد و مرۆڤی هۆشیاری كورد رۆحی نەتەوەی كورد بەرزڕاگرتنی بۆ رێزلێنان لە كەرامەتی مرۆڤی كورد وەك پێداویستی مێژوویی و پشتگیرییەك لە  (مەزڵومیەتی) كوردستان!
* بیستوومە پێش ئەوەی بگەڕێیتەوە كوردستان بە یەكجارەكی، دەخوازیت ژن بهێنیت. 
- بەڵێ راستە، ژنم نەهێناوە، بۆیە دەڵێن : بێ ژن و ددان جیهانە زیندان!
پیاوی بێ ژن لە پاڵتۆیەك دەچێت،  قۆڵێكی نەبێت! 44  ساڵە بێ ژن و بێ ماڵم! ژن و ماڵیان گوتووە! حەزم لە كراسی بێ گیرفان نییە! هەم پارەت لێ دەكەوێت هەم عەقڵ و هەم بەخت! گۆرانییەكانم جگەرگۆشەكانی منن! پەرتەوازە و دەربەدەرن و بێ دەرپێ و بێ پۆشتەو بێ بەرگ وەك هەتیووی سەرمابردوو دەخولێنەوە! كەوابوو پەشیمان نیم كە تاكو  ئێستا كوڕ و كچی 44 ساڵەم نین! پەژیوانیش نیم ژنم نەهێناوە! چونكە هەرگیز بۆ ژن هێنان درەنگ نەبووە! لەبەرئەوەی هەر قابلەمەیەك سەرە قابڵەمەیەكی بۆ پەیدا دەبێت! 33 ساڵ زیاترە بەتەنێ دەژیم! كۆرۆناشم راونا! بەرگەی هەموو ژانەكانم گرتووە! غەیری بێ كوردستان ژیان و بێ وڵاتی. نەخێر نەهێناوە! بەس هەر ژنێ دێنم (لە پشت هەر پیاوێكی سەركەوتوو ژنێكی عاقڵ و بەهێز هەبووە!) بۆیە بڕیارمداوە بەیەكجاری بچمە كوردستان و  شاری سلێمانی بكەمە دوا مەنزڵگای خۆم، بۆ منداڵیش بەو تەمەنەوە هەر حەزی پێدەكەم، چونكە وەجاخكوێریش خۆی لە خۆیدا خەمێكی گەورەیە .
* مۆسیقا و ئاوازی كوردی لە كوێی ئاواز و مۆسیقای جیهانیدایە؟
 - هەروەك گوتم: لێدوان و ئاخاوتن و پەیڤین لەسەر ئەم پرسە لە هەویرێك دەچێت ئاوێ زۆر بكێشێت! مەرج نییە خەڵكانی دیكە بەپێی Dialogue بیر جیاوازی جیا چێژە لە روانینی بەندە جیاواز بڕوانن و پێشم خۆشە بەپێی زانستی بە بێ دەمارگرژی بەرپەرچم بدەنەوە، بەس هەر بەر لەوە ئاماژەم بە مامۆستا قادر دیلان و مامۆستا سەید عەلی ئەسغەری كوردستانی تا سێوە و شاكیرۆ و زیرەك و ماملێ تا گشتیان نوێی زێڕین Avangerdist رچە شكێنی دژە باوێكیان كرد كە رەگئاژۆ بوون لە چاخی دێرین!
* بۆچی مێژووی موزیكی كوردی نەنووسراوەتەوە! بۆچی مێژووی ئەدەبی كوردی و شەڕكەری خەباتی خوێناوی كوردی لە شەڕگەی خەباتی ئەدەبی پیرۆز جوداخواز نییە؟
 - لەبەرئەوەیە كە دەڵێم: كورد بەهۆی ئەم لاساكەرەوەییە تووشی قەیرانی مێژووی خۆنەناسی بووە، تووشی (ئاڵزابڕی) مێژوویی بووە، تووشی قەیرانی ناسنامەیی (وەچاخكوێری)بووە، بە بڕوای بەندە دەبێ شۆڕشیكی نوێی كەلتوری دەستپێبكرێت! هەروەك لە پێشدا ئاماژە بە ئەمڕۆی دونیای هونەر و موزیكی بیانی كرد! پرسیارێكی باڵكێش لەسەر باس و ئاستی دیتنی بەڕێزتانم لەسەر بە زانستكردنی موزیكی كوردی لە كوێی موزیكی جیهانی لە سەردەمی جیهانگیری كۆن بەبێ سۆسیال میدیا تا سەردەمی جیهانگیری نوێ بە هۆی شۆڕشی دیجیتالیزایۆن و سۆشیال میدیاوە چۆن دەبینن؟
وەك لە پێشدا چارەنووسی موزیكی كورد و مرۆڤە موزیك زانەكانیم كرد جا بە هەچ هۆیەكی پشووبڕی خەمی نان یان ژیان یان تاسەباری نیازخوازی زۆرەوە یان بێ دڵگەرمی و دڵساردی زۆر و بێ عیشقی و بێ ئەڤینی لە راست ئامانجەكانیاندا، لە خەمخۆری بۆ دواڕۆژی موزیك دووركەوتوونەتەوە یان یەكێ لە هۆیەكانی هەژەنگ و (Stress) هەڵپەی ژیانی هەڵەشەیی جیهانی خۆرئاوا و مرۆڤە ساردەكانی خۆرئاوا و باكوری ئەوروپا و هتد یان  بە (دیجیتال)كردنی گشت چەمكەكانی هونەر و ئەدەب بۆتە هۆی كزكردنی خۆزگەكانی پڕ لە ئەڤینی جاران و چوار وەرزی دڵی شەیدایانی موزیك و هونەرە جوانەكانی بەرەو پێدەشتی بەژی و ویشكاڕۆی ژینی بە پەرۆش و سەحرای قاقڕ و هەوای بێ پشتێن و نەزۆك بۆ جاڕەگوڵ بوونە! بە واتەیەكی دیكە زیاتر لە (800) ساڵ لەمەوبەر بەبێ هەبوونی سۆشیال میدیا و كارەبا و ئینتەرنێت (بە كورد و رەچەڵەك) ناوێك و مەزنە مرۆڤێكی موزیكوان بە نێوی (عەبدولقادر مەراغەیی) هەبووە ئەم بلیمەتە نادرەی دەوران و هەڵكەوتەی چاخی خۆی و ئێستاشە! چەند كتێبی نووسیوە، بەناوبانگەكەیان (مقاصد الحان) بووە كە باس لە هارمۆنی و بە هارمۆنیكردنی موزیك دەكات و نێوبانگی خۆی و بەرهەمەكانی نۆتاسیۆنی  و بەهرەواری گەیشتۆتە دەرەوەی وڵاتی ئەو كاتی بە نێوبانگی (Persian Rich) پاشماوەی ئیمپراتۆری فارس! كە مخابن ناتوانن قبووڵی بكەن كە مەراغە شارێكی بەتەواوی كوردنشین بووە،ئێ خۆ هەموومان دەزانین كە  مامۆستای مەزن (عەبدولقادر مەراغەیی) كوردە! واتە تەنیا موزیكزانێك بووە كە لە سەردەمی دەسەڵاتدارێتی میری فارسدا، میر كچی خۆی پێشكەش كردووە بەو مەرجەی كە سروودێك و چەند ئاوازێك دابنێ بۆ 30 رۆژەی مانگی (رەمەزان)! (عەبدولقادر مەراغەیی) قۆڵی هیممەتی لێ هەڵدەماڵێ لەسەر دەستگاكان و رێگاكانی مەقاماتی نێوچە و  ئێرانی بۆ هەر رۆژەی ڕەمەزان ئاوازێك دادەنرێ بە چێژ و شێوەیەكی جوان! دێت لەسەر دەستگاكان و رێگاكان و مەقاماتی بەربەرینتری ئەو كات لە دەزگا و گۆشەكانی كە حجاز و حجازكار و مەقام و حشاق و پەنجەی كوردی و نەورۆزانە و كوردانە، هەوشار و ئەبوعەتا و (همایون) و (سێ گا)  و  (چوار گا) و ئیسبەهان و نەهاوەند (ماهور) عجم  و بەیات كورد و بەیات زەند و (راست پێنج گا) (نەوا) و ئاوازەكان و  ردیف گەلی ئێرانی دادەمەزرێنێ كە بۆ هەر رۆژە ئاوازێك دادەنێ لەسەر جیلوە و شێوازێكی جودا و چێژێكی جیا لە چەشنی فرە چێژی پێخۆر و خۆراكی رۆح! (میر ناچار دەبێ ملكەچ بێ لە ئاست بەڵێنەكەی و كیژەكەی خۆی لێ مارە دەكات!) ئەوە لەم كاتەدا جیهانگیری ئیمپراتۆری فارس لەوپەڕی بەهێزی خۆیدابووە!
دوای (عەبدولقادر مەراغەیی) ئەوەی سەرەڕای بێ دەفتەری ون نەبوون و فانی (نەمر خدر كوێسنجاقی)یە كە كتێبەكەمان دەبەردەستدا نییە و ئەویش خۆی بلیمەتێك بووە! لە چاخی كۆنتریش تا پاشازادەی ساسانییەكان (خوسرەو پەروێز) و نێوبانگی زەنگینی و دەسەڵاتدارێتی تا دوورە دەستەكان رۆیشتووە چەندین (پیل) و (فیل)ی هەبوون دەیان هەزار سوارە و ئەسپچی  و كاروانچی و خاوەنی ئەسپی (شەودێز) بووە كە (تووشی خەمۆكی هاتووە بەهۆی مەرگی ئەم ئەسپە رەسەنە بەحرییە!) هەرلەو سەردەمەدا (بارەبەد) كە (بەربەت) (بربط)ی ژەنیوە واتا دایكی مەزنی ئامێری (عود)ی ئێستا و بە پەنجە سیحراوییەكانی (سەوز لەناو سەوزا) شینگێڕی بۆ (ئەسپی شەودێز) دادەنێو دوایە لە نێو لق و پۆپی دارەكاندا دەكەوێتە خوارەوە و كێشكچییەكان دەیگرن و  دەیكوژن ئەم (موزیكوانە) كوردە دوو رەقیبی خۆشخوانی دەنگبێژ و موزیكوانی تر هەبوون بە نێوی (سەركێش) و (نكیسا) ئەمانە بەهۆی ئێرەیی پێبردن (بارەبەد) لە نێوەندی خانای قوبادی شاعیری بەرزەوێژی بە رێچەڵەك جاف و سەردەمی ترۆپكی حوكمڕانی ئەردەڵانە بە زاری هەورامی سروتگەیەكی لەسەر (بارەبەدی) كورد هۆنیوەتەوە كە دەڵێ: (ئامان بارەبەد چۆن بوڵبوڵ سەردەست) .
بەڵام زەریاب ماندوو نەناس و رۆڵەی كوردی كۆڵنەدەر زانیویە هەرزەكار و هونەرمەند پێی بگاتە هەر شوێنێ كە سەدری مەجلیس جێی دەگرێتەوە و رێزی دەخەنە سەر سەران عیزەت و كەرامەتی دەپارێزرێ، ئەگەر بەڕاستی خاوەنی داهێنان بێت و خۆشی خاوەن حورمەتی نەفسێكی رەها بەرز بووە كە وەك (هونەروەر) و خودای مۆسیقا وەك ژەنیارێكی پەنجە سیحراوی خۆی لە (سەرووی دەسەڵات) بینیوەتەوە تا لە بن دەسەڵات و (چاوشۆڕی دەسەڵات!).
زەریاب خۆی زۆر جاران بەهۆی  هێز و تین و ویقارێتی ژەنین تەلەكانی زەنگی شیكاری و زەبرەكان هێند تووند بوون لە ژێر پەنجەی سیحراویدا پچڕاوە و پساون و هەربۆیەش خۆی (تەلی 5) بنجی بۆ (ربگ) عودی كۆن دروستكردووە.
زەریاب و زەنگە زڕباوەكەی زەریایەكەی و پچڕاوەكە وەها بووە كە پاش چەند سەدە كاردەكاتە سەر (میرزا عەبدولڕەحیم سابڵاخی - وەفایی) شاعیر كە بەدڵدارییەكەی مامۆستا سەعید عەلی ئەسغەر كە (شێخی نەهری) بڵێ:
(چریكەی بولبول) كوردستان گوتویەتییەوە:
بۆ تۆ شێت و شەیدا بووم
بۆ تۆیج دەیری و ریسوا بووم
بۆ تۆ زەنگی زریاب بووم
بۆچی تۆ رەحمت نەماوە!

زەریاب هەر  موزیكزان و موزیكژەن نەبوو، بەڵكو (decorator)ێكی رازێنەوەیەكی مەزن بوو، پارچە ناس و قوماش ناس و  بەرگدروویەكی مەزن بووە، كابانێكی مەزن بوو، دەرمان ناس (بەهارات ناسێكی) مەزن بووە و ئەو بوو (fashion)  بەشێوەی نوڵی پارێنەرەو (جڕك و جڕێس) (كەوچك و چنگاڵی) بردە شیمالی ئەفریقا.
ئەو بۆ گەشت و مەقامات و دەزگاكانی ئێران و هیندی بوو (باكووری ئەفریقا) هەربۆیەش حكم بن هشام ابن عبدالرحمن داخل، ئەمیری (ئەندەلوس)ی ئسپانیا بە  باوەشی گەرمی ئەڤینییەوە وەریدەگرێت و دە ئامێزی وەرێناو ساڵیادی خەڵاتی كرد و كۆشا، دایەر لە (سەردەمی مەجلیس دانا!) هەر بەهۆی (وریاییەوە) مۆسیقا (ئیسپانیا) گەشە و نەشەی فرەی كرد تا رۆژئاوای  دوروردرێژ، تائێستاش بەرهەمەكانی هونەرمەندی گەورەی كورد زەریاب هەر گەشاوەیە .
* پڕۆژەی ئایندەت چییە؟
 - پڕۆژەی هونەرییم زۆرە، هەتا لاوك و حەیران و بەیتە كوردییەكان بمێنن، بەندە لێناكەوم! هەتا كوردستان هەبێت هەر لە كوركە و لەرە وچریكە ناكەوم! دوا  پڕۆژەم بەشدارییكردنە لە فێستیڤاڵی نێودەوڵەتیی شانزدەیەمینی بەدرخان لە فینلەندا كە لە Helsinki بڕیارە مانگی ئابی 2023 سازبدرێت، چەند گۆرانییەك بۆ قەڵادزێ و كوردستان، شیعری (باركەن بڕۆن)ی كاكە پەشێو و لە شێوەی پانۆرامایەكی كوردی پێشكەش دەكەین! ئاگركردنەوە لەسەر پشتی داگیركاران چەند پڕۆگرامی تەلەفزیۆنی و چەند بەرخودانی كەلتوری و بەرزەچڕی!

 

        

مستۆ دادار لە تافی منداڵی و گەنجیدا

مستۆ دادار لەگەڵ هێمنی شاعیردا

   مستۆ دادار   

             مستۆ دادار لەکاتی گۆرانی وتندا

مستۆ دادار

بابەتە پەیوەندیدارەکان