ئیمان ئامێدی*
نۆ ساڵ دەربازبوون بسەر کارەساتا سێی تەباخێ و جینوسایدکرنا خەلکێ ئێزدیێ شنگال و وێرانکرنا وێ دەڤەرێ ژلایێ تیرۆرستێن رێکخستیا داعش ڤە.
*هێشتا چارەنڤیسێ بهزاران کچ و ژن و زەلام و زارۆکێن هاتینە رەڤەندن و سەبیکرن یێ، دیار نینە.
*هێشتا بدەهان گۆڕێن بکۆم ئاشکرا نەبووینە، یێن ئاشکرا ژی بووین نە هاتینە راکرن و روفاتێن قوربانیان نەهاتینە ڤاڤارتن و دووبارە ڤەشارتن د گۆرستانێن ئاساییدا.
*هێشتا بدەهان هزار ئاوارەیێن شنگال دناڤ کەمپ و خیڤەتگەهاندا ژیانەکا پری ئازار دەرباز دکەن.
*بدەهان هزار ئێزدیێن شنگال و دەڤەرێن دی مشەختی وەڵاتێن رۆژئاڤا و بیانی بووینە.
*هێشتا شنگال یا چاڤەرێی دەستێ هاریکاری و ئاڤەدانیێیە و ژبلی سوز و دوریشمێن ڤالا، هیچ کارەک ژێرا ناهێتەکرن.
*زێدەباری ڤێ هەمیێ، شنگال یا بوویە مەیدانا هەڤرکیێن سیاسیێن ناڤخۆیی و ئەقلیمی و ژیان و ئارامیا وێ دەڤەرا بەرینا نۆ ساڵە مایە کارەساتبار کمباختر لێدکەن.
پشتی دەستبکاربوونا کابینا سودانی، حکومەتا عیراقێ هەوڵێن خۆ ئێخستینە گەر، ژ پێخەمەتا چارەسەرکرنا کەیسێ ئاوارا و دایێخستنا کەمپا، بەلێ ئەجێندا و بەرژەوەندیێن هندەک لایەنێن سیاسی بووینە ئاستەنگ ل هەمبەر وێ پرۆسێ و رێگریێ ل ڤەگەڕیانا ئاوارەیان بو سەر مال و دەڤەرێن وان دکەن.
ڤەگەڕیان ژی نە یا بساناهیە، ژبەرکو پێدڤیە ل پێشی هەر کارەکی شنگال ژ هەڤرکی و ململانێن سیاسی بهێتە ڤەدەرکرن، یاسا و ئارامی بەرجەستە ببن، دەلیڤێن کاری بهێنە دابینکرن، هاریکاریا ئاوارەیان بهێتەکرن، بۆ دووبارە ئاڤاکرنا مال و خانیێن وان یێن هاتینە تالانکرن و وێران بووین و خەلک بهێتە قەرەبووکرن.
پێشهاتەکا گرنگ بوو حکومەتا بریتانیا بفەرمی کۆمکوژیا ئێزدیان وەکی جینوساید دایە نیاسین، بەلێ داخواز ژ حکومەتێن بەغدا و هەولێر دهێتەکرن زێدەتر دەمی بەرزە نەکەن و لسەر ئاستێن نێڤدەولەتی بو ڤی کەیسی کاربکەن.
*ئەنداما ئەنجومەنا نوێنەرێن عیراق
