پەرلەمانێ ئیفلیج و مافێن وەڵاتیان

ئیمان ئامێدی

خەلك یێ چاڤەرێی وان سوزایە یێن كاندید و لایەنێن سیاسی د بانگەشا هەلبژاردنان دا دایینێ

بێهنڤەدانا تەشریعی یا وەرزێ بوهارێ یا جڤاتا نوونەران بدووماهی هات، بەلێ ل گورەی ئامارێن فەرمی هەر ژ ئێكەم خولا پەرلەمانی و هەتا نوكە زێدەتر ژ (150) پرۆژە یاسا و پێشنیاز ماینە هەلاویستی و لسەر ئێك عمبار بووینە.
ئیفلیجكرنا جڤاتا نوونەران ژ ئەگەرێ لادانا سەرۆكێ وێ محەمەد حەلبوسی ب بریارەكا دادگەها فیدراڵی ل چریا دوویێ یا ساڵا (2023) و نە هەلبژاردنا سەرۆكەكێ نووی بۆ جڤاتا نوونەران، بوونە ئەگەر هژمارەكا زۆر ژ پرۆژە یاسا بمیینە راگرتی، كو خواندنا ئێكێ و دوویێ ژی بۆ هندەك ژ وان پرۆژە یاسا هاتبوو كرن و هندەك پرۆژێن دی تنێ حبرێ لسەر كاغەزێ ماینە. 
ل گورەی ڤێ رەوشا جڤاتا نوونەران تێدا دەرباز دبیت، دەمەكێ درێژ دڤێت هەتا ئەو پرۆژە بهێنە پەسەندكرن و ببنە یاسایێن كارپێكەر.
بێ گۆمان ئەو پرۆژە یاسا زێدەتر دگرێدای رێكخستنا ژیان و ژیارا وەڵاتیانە و بەڕەڤانیكرن ژ مافێن خەلكی ئێكە ژ شەنگستێن دەولەتێ و پێدڤییە بەشەكێ سەرەكیێ بەرنامێ حكومەتێ بیت، ئەڤە د دەمەكیدایە هێشتا هیچ ژڤانەكێ دورست بۆ پڕكرنا پۆستێ سەرۆكێ جڤاتا نوونەران نە هاتییە دیاركرن.
گرنگە بزانین چەندین دەم دەرباز ببیت، هژمارا پرۆژە یاسایێن راگرتی دێ زێدەبن و چارەسەری ژی دێ بزەحمەت كەڤن، ئێدی پێدڤییە هەر پەرلەمانتارەك ب ئەرك و بەرپسیارەتییا خۆ رابیت لهەمبەر مافێن خەلكی و بەرژەوەندییا وەڵاتییان دانیتە پێشی هەر بەڕژەوەندیەكا حزب و لایەنێن سیاسی.
خەلك یێ چاڤەرێی وان سوزایە یێن كاندید و لایەنێن سیاسی د بانگەشا هەلبژاردنان دا دایینێ.
خەلك دخوازیت ئەو بەرنامێن ژێرا دهاتنە بەحسكرن بهێنە جێبەجێكرن.
بەروڤاژی وێ چەندێ رۆژ بۆ رۆژێ مەودایێ ڤاڵاتییا دناڤبەرا خەلكی و جومگەهێن دەستهەڵاتێدا دێ زێدە و بەرفرەهـ بیت و گەهیتە ئاستەكی ئێدی سوز و بریار و بەرنامە هیچ كاریگەریەكێ ناكەن و نابنە هۆكار باوەرییا وەڵاتیان ب پرۆسا سیاسی و جڤاتا نوونەران بمینیت، وی دەمی خودێ دزانیت دێ رەوش بەرەڤ كیژان ئاقاری چیت؟
* پەرلەمانتار