ستران عەبدوڵڵا
با هەر هیوا و ئاواتی نەورۆزی نەخوازین، هەر بۆنەی نەورۆز نەکەینە دەرفەتی قسەکردن و رازدرکاندن و زارگوتنی کوردانە، بەو گوزارشتەی نەورۆز بۆنەی نەتەوەیی و یەکێتیی ریزەکان و جەژنی بەهار و ئازادییە. تەنانەت نەورۆزەکەش چەند ساڵێکە بۆتە بابەتی مشتومڕ و باسی توانجدان لە مێژوو و لە هەموو شانازییەکانی ئەم گەلە مافخوراو و مووچەخوراوە.
ئێمە بە نرخی هەرزان هەموو بەهاکانمان دەفرۆشین. خوا دەزانێت بە پارەی بێ قیمەتی ئەم وڵات و ئەو وڵات چەند هەزار سایت و پەیج و ئەکاونت کراونەتەوە تا بەناوی کنەی مۆنتاجکراو و پشکنینی دۆبلاجکراوەوە گومان لە گەشتەکەی گەزەنفۆن و مەزنی سەڵاحەدینی ئەیوبی و شەڕی مەلازکرد و بەرخودانی قەڵای دەمدەم و رۆژنامەی کوردستانی بەدرخان و نەورۆزی پیرەمێرد بکەن؟
ئەم نەورۆزەی حاجی تۆفیقی خواناس بە چەند قەسیدە و خڕبوونەوە لە گردی مامە یارە و ئاگری گەشی بەهاری بەهێمنی و هێزی نەرمی تێکۆشانی مەدەنی کردویەتییە بۆنەیەکی خاڵسی کوردانەی بەرەنگاری دژی ستەم و داگیرکاری و لە حەشامەتی نەورۆزی میللەتانی تر جیای کردۆتەوە، دەساڵ جارێک دەکەوێتە بەر هەڵمەتی دووسەرەی ڤەکۆڵینی رووکەشانەی دەستەبژێری (عەبەسە وەتەولا) و فەتوای چینی تازە پەیدابووی (تەواو بوم بە مەلا) گوایە هی کورد نییە و هی مەجوسە، گوایە کاوە غاینەکەیە و زوحاک هەو نییە.
براگیان وا غایەنی مۆدێرن بە بەرچاوتەوە ناپاکی لە نیشتمان و لە ئازادی و لە هەموو شتێک دەکا و بە دیکۆمێنت و تۆماری ڤیدیۆییەوە هەموو شتێکی لەسەرە، کەچی قەزاوەتی لەسەر ناکەی و لەگوڵ کالتری پێ نایەژی، ئێستا باوەڕت پێبکەم گوایە دوو مارەکەی سەر شانی زوحاکی لە چاپی کۆنینەی شانامەدا دەسکردی فیردۆسییە؟
برام کوردەکە لە چوار بەشی کوردستان بە ریتمی ئاهەنگی حەسەن زیرەک و لەرەی سروودئامێزی حەمە ساڵح دیلان و بە تۆنی هاوچەرخی قادر دیلان و کۆنسێرتی باکوور و رۆژئاوا نەورۆز دەچڕێت، خێرە ئەم ساتە نەتەوەییە دەبوغزێنیت؟
نەورۆز و سروودەکانی نیشتمان و شۆڕش بانگەوازی کوردایەتییەکی بێ غەل و غەش دەکەن کەچی دوو شەپۆل یان لەبەر کورتهێنانی روانگەیان یان لەبەر پشووکورتی تێکۆشانی میللییان بەربوونەتە گیانی یەک. دەستەبژێرێک لە تاو شکستی سیاسییان بە ناوی جیاوە ئێستا تووشی دەردی نەهلستی نەتەوەیی بوون و بەراست و بە چەپدا توانج لە کوردایەتی دەدەن، چونکە تۆزێک خۆیان هیلاک ناکەن تا بزانن کێ بەناوی کوردایەتییەوە بەڵای بەسەر هێناوین و کێش لە تاو کوردایەتی هەموو نوقورچ و توانجێکی ناڕەوای قووت داوە؟ دەستەبژێرێکی تر بێکەس وتەنی، کوردایەتی بە خورما تێگەیشتووە و وا دەزانێت هەر ئەو ناوهێنانە بەسە بۆ ئەوەی هەرچی کێماسیی هەیە لەسەر خۆی بیسڕێتەوە و لای بدات. کوردایەتی خۆ چەکی غوفرانی پاپا نییە بەهەشتت بۆ مسۆگەر بکات و لە هەموو ئاوێک بتپەڕێنێتەوە و تەڕ نەبیت.
کوردایەتی خۆ خوداوەندە بە هەنجیر و خورما دروستکراوەکانی قورەیش نییە لە رێی تێری گەشت و گەڕانا بیپەرستی و لە رێی دەشتی بێ نان و زاددا بیخوێت و بیماشیتەوە. کوردایەتی خەبات و کۆششێکە کە سەد ساڵە قاڵبی گرتووە و نووسین و بەڵگە و دامەزراوەی داناوە تا دەفتەر و حیساب و راست و پرگاڵی لە هەموان و لەسەر هەموان بخاتەکار.
ئەوە گشتی لە کتێب نووسراوە و لە مەدرەسە خوێنراوە، تەمبەڵەکانی وەک ئێمە سەعی و دەوری تیاناکەین خەتای بزووتنەوە و شۆڕش و رابوونەکانی باوکە دامەزرێنەرەکان چییە؟!
جا ئەوەندە بەسە تا نەورۆزەکەمان نەشێوێت. بفەرموون با گەمارۆی بێ مووچەیی و بێ گوزەرانی درێژخایەن تێکبشکێنین و بێ ئومێدی لە قاوبدەین کە پێشەی نەیارانە و هەر رۆژی بە بیانویەکەوە داهاتوومان تەمومژاوی دەکەن وەکو چۆن رابرادوو و ئێستامانیان لێڵ کردووە.
