لە بیناسازیی یۆگادا کە دەکرێ بڵێین بیناسازیی عیرفانییە، خاڵی زۆر جێگەی سەرنجی تێدایە. بیناسازیی لە عیرفانی یۆگادا لەسەر بنەمای پێنج رەگەزەکەیە، ئەم پێنج رەگەزە بریتین لە فەزا، هەوا، ئاگر، ئاو و خاک. یانی کاتێ خانوویەک یان گوندێک یان شارێک دروست دەکەین دەبێ ئەو پێنج رەگەزە رەچاو بکەین. دەبێ لەو شوێنە هەر پێنج رەگەزەکە هەبن و بیناکان و کۆڵان و جادەکان وا دروست بکرێن کێشە بۆ لانیکەم هەوا و ئاگر (تیشکی خۆر) دروست نەکرێ. واتە هەوا لەو شوێنە بە خۆشی بێ و بچێ، تیشکی خۆریشی بەرکەوێ و...هتد.
ئەگەر بە گوێرەی بیناسازیی یۆگا بێ، دەبێ بەرزاییەکان بکرێن بە ئاوەدانی و نزماییەکان و دەشتەکان بۆ کشتوکاڵ و باخ و پارک بەکار بهێنرێن، بۆ؟ لەبەر ئەوەی یەکەم: دەبێ دەشتەکان بۆ کشت و کاڵ و بەرهەمهێنانی خۆراک و باخی گەورەی بەرهەمهێنانی میوە بۆ پارکی گەورە بەکاربهێنرێن، دووەم: ئاوەدانیی مرۆیی دەبێ لە شوێنی بەرز بێ، چونکە ئاوەدانی و بە تایبەتی شار هەوای پیس بەرهەمدێنێ، هەوای پیسیش قورسە و بەرەو شوێنە نزم و چاڵ و دەشتەکان دادەبەزێ، لەو حاڵەتەدا ئەگەر شوێنە نزم و چاڵ و دەشتەکان سەوزایی بن ئەوا بە ئاسانی هەواکە خاوێن دەکەنەوە، لە بەرەنجامدا هەوای ئەم شارە هەمیشە خاوێن دەبێ و هەوای شارەکە نابێتە ژینگەیەک بۆ نەخۆشییە کوشندەکان. لە حاڵێکدا هەوای پاکی بەرزاییەکان هیچ کاریگەرییەکی لەسەر هەوای پیسی نزماییەکان نابێ، چونکە هەوای پاک سووکەڵەیە و بەرز دەبێتەوە و دەڕوا، ئێستا لە سلێمانی کەش و هەوای داوێنی گویژە و گەڕەکە بەرزەکان هەمیشە خاوێنترن لە گەڕەکە نزمەکان، ئەگەر رەشەبای سلێمانی نەبوایە، هەوای پیسی ئەو گەڕەکە نزمانە رۆژ لە دوای رۆژ پیستر دەبوو. ئێستا دەکرێ شار بەرەو شوێنە بەرزەکان بڕوا و شوێنە نزمەکان بکەن بە کشتوکاڵ و باخ و پارکی گەورە و دەریاچەی دەستکرد. نەک ئەوەی هەم دەشت و زەوییە کشتوکاڵییەکان و هەمیش بەرزاییەکان بکەین بە شار، ئەوە هەڵەیەکی کوشندەیە و لە داهاتوودا ئەم خاک و خەڵکە باجەکەی بە قورسی دەدەن.
