پارێزگار پۆستێکی کارگێڕییە وەک هەر پۆستێکی تر، دەسەڵات و ئەرک و مافی هەر پلە و پۆستێکیش بە یاسا دیاریکراوە، ئەوەی پارێزگای کەرکوک و شێوازی کاری پارێزگاری جیادەکاتەوە لە پارێزگاکانی تر، کۆمەڵێک بابەتی مێژوویین کە رەنگیداوەتەوە بەسەر دانیشتوانەکەیدا و تایبەتمەندن.
کەرکوک لە کۆنەوە درک بە گرنگییەکەی کراوە، هەر لە دەرهێنانی نەوت و دواتر خۆماڵیکردنی و زۆر بابەتی تر، لەم رێگایەوە پرۆسەی تەعریب و تەرحیل و تەبعیس لەسەردەمی رژێمی بەعسی فاشی گەیشتە لووتکە.
لەڕووی سیاسییەوە، پێویستە پەیوەندیی نێوان لایەنە سیاسییەکانی ئەم شارە هێور بکرێتەوە و دانیشتن و گفتوگۆو راگۆڕینەوەکان بەردەوام بن و دووربکەونەوە لە جێبەجێکردنی ئەجێندای دەرەکی
ناکۆکییەکانی ئەم شارە زۆرن، قووڵن، کۆنن، کەڵەکەبوون، ناحەزی زۆر و دۆستی کەمن، چاوی زۆری نێوخۆیی و ناوچەیی و جیهانی لەسەرە، خاوەنی پێکهاتەیەکی جیاواز و جۆراوجۆرە.
هاندان و پشتیوانی و پاڵپشتیی هەر پێکهاتەیەک بەجیا و لەشوێن و لایەنی جیاوە هەبووە، ئەمەش هۆکارێکە بۆ قووڵتربوونەوەی ناکۆکییەکان و بەردەوامی کێشەکان کە وایکردووە هەموو سەرنجەکان بخرێنە سەر ئەو کەس و لایەن و پێکهاتەیەی کە حکومەتی خۆجێیی شارەکە پێکدەهێنێت و پۆستی پارێزگار وەردەگرێت. بێگومان ئیدارەدانی شارێکی لەم جۆرە زۆر جیاواز و سەختترە لەهەر شارێکی تری ئاسایی، بۆیە ئێستا کە کورد پێکهێنەری سەرەکی حکومەتەکەیە و پۆستی پارێزگاری وەرگرتووە، پێویستە بە عەقڵێکی جیاواز و بە شێواز و بیرکردنەوەیەکی نوێوە پەند لە رابردوو وەربگیرێت و سەرکەوتوانە مامەڵە لەگەڵ بارودۆخەکە بکرێت.
پێویستە پارێزگار هەنگاوی جددی و یەکلاییکەرەوە بگرێتەبەر لەڕووی خزمەتگوزارییەوە و کار لەسەر تەواوی سێکتەرەکانی شارەکە بکات بەجۆرێک لە کورتمەودادا خەڵک هەست بەوە بکەن کە پارێزگارێکی کورد جیاوازیی لە نێوان پێکهاتەکان و گەڕەکەکاندا ناکات.
بەتایبەتی کە لە چەند ساڵی رابردوودا، کەرکوک لەخزمەتگوزاریەکان بێ بەشکراوە و جیاکاری زۆر لە بەڕێوەبردن و گەیاندنی خزمەتگوزاریەکان بەدیکراوە.
لەڕووی ئاسایشەوە، پێویستە چەک تەنها لەدەستی هێزەکانی دەوڵەتدا بێت واتە هێزی پۆلیس و ئاسایشی ناوخۆی شارەکە پارێزەری راستەقینەی سەر و ماڵی خەڵک و شارەکەبن و یاسا سەروەربێت و هیچ کەسێک لەسەرووی یاساوە نەبێت، گیانی لێبووردەیی و پێکەوەژیان و ئاشتی و تەبایی دەبێت بە کردار بسەلمێندرێت و کاری لەسەر بکرێت، رق و تۆڵەکردنەوە و تەعریب و دەستبەسەرداگرتنی ماڵ و موڵکی خەڵکی هەژار و جووتیار کۆتایی پێبێت.
لەڕووی سیاسییەوە، پێویستە پەیوەندیی نێوان لایەنە سیاسییەکانی ئەم شارە هێور بکرێتەوە و دانیشتن و گفتوگۆو راگۆڕینەوەکان بەردەوام بن و دووربکەونەوە لە جێبەجێکردنی ئەجێندای دەرەکی و پابەندی دەستووری وڵات و پاراستنی بەرژەوەندیی گشتی کەرکوک و ئاشتی و پێکەوە ژیانبن، لەڕووی پێکهاتەی نەتەوەیی و کۆمەڵایەتییەوە پەیوەندییەکان بەهێزتر بکرێن.
رێز لە بۆنەو یادە نەتەوەیی و ئایینی و مەزهەبی و کەلتوورییەکان بگیرێ و پارێزگاری لە هەمووان بکرێت بەبێ جیاوازی .
کاتی ئەوە هاتووە خوێندنەوەی ورد بۆ تەواوی حکومڕانیی رابردووی ئەم شارە بکرێت و ئەزموونی لێ وەربگیرێ و هەڵەکان دووربارە نەکرێنەوە و زانستی گارگێڕی و خوێندەوەی واقیعیانە بۆ دۆخ و پێکهاتەی شارەکە بکرێتە سەنگی مەحەک و پێوەری حکومڕانی.
