کورد وەک بەهێزترین و ئامادەترین کارت دەبیندرێت بۆ هەر گۆڕانکارییەک لەم نەخشە و سیستمی حکومڕانییەی ئێستای تورکیادا
پرۆسەی ئاشتی لە تورکیا دوو سەرەیە، دەوڵەتی تورکیا و حکومەت و زۆربەی حزب و لایەنەکانیش بە گشتی درک بەگۆڕانی بار و دۆخەکە و پلانی تازەی ناوچەکە دەکەن، خوێندنەوەیان هەیە بۆ پلان و نەخشەی تازەی سیاسی و جوگرافی و هاوپەیمانێتی و ئابووریی ناوچەکە، بۆیە دەخوازن کۆماری تورکیای پاشماوەی ئیمپراتۆری و دوومەڵی شێرپەنجەی خۆرهەڵاتی ناوەڕاست و نەخشەی سیاسی ناسروشتی ئێستای تورکیا لەم باهۆزی گۆڕانکارییە ریشەیی و گشتگیر و ستراتیژ و فراوانەی ناوچەکە بێ زیان و ساغڵەم بۆی دەربچێت، چونکە خۆیان باش دەزانن یەکەمین و بەهێزترین و بەربڵاوترین(گرفت و پرس) یان خاڵی لاوازی دەوڵەتی ئێستا و 100 ساڵی رابردووی کۆماری نوێی تورکیا، بابەتگەلی تاکڕەوی و رەتکردنەوە و توانەوە و نکۆڵیکردن و لەناوبردنی نەتەوەکانی تری تورکیا بووە بە کورد و هەموو پێکهاتە جیاوازەکانەوە، چونکە بەدرێژایی مێژووی دروستبوونی ئەم دەوڵەتە بەهەر جۆرێک و هەر شێوازێک بووبێت، کورد هەمیشە هەوڵی مانەوە و بەدەستهێنانی مافی نەتەوەیی خۆی داوە و بە جورێک لە جۆرەکان لە خەبات بەردەوام بووە و کۆڵی نەداوە، بۆیە ئێستاش، کورد وەک بەهێزترین و ئامادەسازترین کارت دەبیندرێت بۆ هەر گۆڕانکارییەک لەم نەخشە و سیستمی حوکمڕانییەی ئێستای تورکیادا، هەر بۆیەش لەسەر ئاستی باڵای کەسی یەکەمی دەوڵەتی قووڵی تورکیا، لەم کاتانەدا بانگەواز و دەستپێشخەری پرۆسەی ئاشتی بێگومان ( وەک تاکتیک ) دەخرێتەڕوو و بازاڕگەری بۆ دەکرێت. ئەو چاک دەزانێت خاڵی لاوازی کۆمارەکە چییە و ئەم گۆڕانکاریانەی لە ئارادان چۆنن؟ هەربۆیەش لەگەڵ ئەو هەموو گرفت و کێشە کەڵەکەبووانەی بە درێژایی مێژووی تورکیا هەیەتی، ئەمڕۆ دێت و کورد بەکاردەهێنێت وەک بەردەبازێک بۆ خۆدەربازکردن لە گۆڕانکارییەکان و نکۆڵیکردنی زیاتر لە سەدەیەک لە بوونی نەتەوەیەکی رەسەنی وڵاتەکەو ناوچەکە.
دیارە لەبەرامبەردا کەس و لایەنی ئاڕاستەکراو بەتایبەتی ئۆجەلان و پەکەکە، بە هەستیارییەوە مامەڵە لەگەڵ ئەم دۆخە و پەیامی ئاشتی و گۆڕانکارییەکانی ناوچەکە دەکەن.
هەر بۆیە لەهەردوو پەیامەکەی ئۆجەلان و پارتەکەیدا، دیارە کە ئەوانیش سیاسەت دەکەن و خوازیاری ئەوەن سوود لەم دەرفەتە وەربگرن و دۆخی ئێستای ناوچەکە و خودی تورکیا و بانگەوازی باخچەلی و ئەردۆگان بقۆزنەوە و هەم گڕی ئاگری لوولەی تفەنگەکان بوەستێ هەمیش لەبەردەم رای گشتی کۆمەڵگەی نێودەوڵەتیدا، خۆیان وەک هێزێکی دیموکرات و ئاشتیخواز بسەلمێنن و بناسێنن، لەهەمانکاتیشدا، پێدەچێت ئەوەی ئێستا لەلای باخچەلی و دەوڵەتی تورکیا بە گشتی دەگوزەرێت، تاکتیکێکی گوماناوی بێت نەک ستراتیژی دەوڵەتەکە بۆ هێنانەکایەی ئاشتی.
