دوژمنان سڵ لە هیچ بەهایەکی ئەخڵاقی و ئایینی و مرۆڤایەتی ناكەنەوە
لەنێو هەردوو بارەگای مەڵبەندی 3 هەولێری یەکێتیی نیشتمانیی کوردستان و لقی 2 پارتی دیموکراتی کوردستان، لەیەک کاتدا بە کردەوەی خۆکوژی لەلایەن تیرۆرستانەوە کرا کە تێیدا سەدان شەهید و برینداری لێکەوتەوە. لە مێژ نەبوو پرۆسەی ئاشتی نێوخۆی هەرێمی کوردستان لەدوای رێکەوتنی (واشنتون)ی پ.د.ک و ی.ن.ک، ئەنجامی باشی لێکەوتبۆوە و خەریك بوو دەچووە بواری جێبەجێکردن و دروستبوونەوەی متمانە و کردنەوەی بارەگاکان و ئاسایاییکردنەوەی پەیوەندییەکان.
لەلایەکی تریشەوە دەتوانین بڵێین ئەم کارەساتە لەلایەک و تایبەتمەندی رۆژەکە کە یەکەم رۆژی جەژنی قوربان و رۆژی شادی و لێبووردەیی و ئاشتەوایی بوو، ئەم پەیامەی پێگەیاندین کە دوژمنانی گەلەکەمان بۆ رژانی خوێنی کورد و لەباربردنی دەستکەوتە نەتەوەییەکانمان سڵ لە هیچ بەهایەکی ئەخڵاقی و ئایینی و مرۆڤایەتی ناكەنەوە و لە هەوڵی بەدیهێنانی ئامانجە گڵاوەکانیان بەهەر شێوازیك بێت بەردەوامن.
ئەم کارەساتە جەرگبڕە کە زیاتر لە 100 سەرکردە و بەپرسی باڵای حزبی و حکومی و کەسایەتی ئایینی و کۆمەڵایەتی تێیدا بوونە قوربانی، ئەوكات ئومێدێکی گەورەی لای تەواوی گەلەكەمان و تەنانەت دۆستەكانیشمان دروستكرد کە ئیتر وەک دەرفەتێک بقۆزرێتەوە و ببێتە هۆکارێک یان خاڵی وەرچەرخانی گۆڕانکاری لە قۆناغە سەختەکانی رابردوو و دووبارە داڕشتنەوەی نەخشە رێگای کاری سیاسی پێکەوەیی و قبووڵکردنی یەکتری و رێکخستنەوەی زیاتری نێوماڵی کورد و یەکخستنەوەی گوتاری سیاسی گەلەکەمان و کاراکردنەوە و ئاوێتەبوونەوەی دامودەزگاکانی هەرێم و هەوڵدان بۆ خزمەتی زیاتری کۆمەڵانی خەڵکی کوردستان.
ئەگەرچی ئەوە جاری یەکەم نەبوو دوژمنان و داگیركەران، بێ دیاریکردنی رەنگ و ئایدیا و دروشم، بێ جیاوازی لە بیروبۆچوونی جیاوازی گەلەكەمان بە ئامانج بگرن، چونكە هەمیشە دروشمی ئەوان ئەوە بووە كە دەڵێن كوردی باش ئەوانەن كە لەنێو گۆڕدان، لێرەوە ئەوەمان بۆ روون دەبێتەوە، ئەوەی لەپشت ئەو کردەوە تیرۆرستییە بوو، هەوڵێك بوو بۆ لەباربردنی سەركەوتنی راپەڕین وئەزموونە نەتەوەییەكەمان و هەوڵی لەباربردنی پرۆسەی ئاشتی و گەڕانەوەی ئاشووبی شەڕی كورد بە كورد و تەواوی گەلەكەمان، نەک هەربە تەنها لەناوبردن و رووخانی هەردوو بارەگای مەڵبەندی سێ و لقی دوو.
ئێستاش دوای تێپەڕینی 21 ساڵ لە روودانی ئەم کارەساتە، دیفاكتۆ ئەوەمان پێ دەڵێت كە ئەرکی نەتەوەییمان هەوڵی رێکخستنەوەی زیاتر و لەخۆبردوویی زیاتری گەرەکە و بە ستراتیژگرتنی ئامانجە رەواکانی گەلەکەمان دەبێت لە پێشی پێشەوەی کار و چالاکییەکامان بێ و پاراستنی یەکڕیزی و پێکهێنانی حکومەتێکی خزمەتگوزاری هاوبەشی چالاک ئەرکی سەرکی و ئەمڕۆمان بێ و کار بۆ ئاساییکردنەوەی پەیوەندییەکانی نێوان هەرێم و حکومەتی فیدراڵی و جێبەجێکردنی مافە دەستوورییەکانمان بکەین و سەنگ و پێگەی کورد لە عیراق و ناوچەکە و جیهان بپارێزین.
