ژ هەبوونا مرۆڤایەتیێ هەتاكو نوكە، مرۆڤان پێكولا گوهورین و گونجاندنا ژیانێ كریە، هەر ئێك لدیڤ ئەو ژینگەها تێدا دژیت و ئەو ژینگەها دڤێت هەبیت تێكوشینێ بۆ دكەت. توندوتیژیی واتایا ئازاردانا جەستە و روحا مڕۆڤانە، بنپێكرنا ماف و ئازادییا كەسێ بەرامبەرە. هەر ئێك لدیڤ هزروبیرێت خوە شرۆڤەیێ ددەتە بابەتی. مە هەمیان ماف و ئەرك هەتا ڕادەیەكی ژێك جوداكرینە، لێ كریارا وان ئالوزیی و تەم و مژاویی تێدا هەیە و ل شوونا یەكسانی و وەكهەڤی بكەڤیتە دناڤبەرا ژن و زەلاماندا، ئاراستەیێ سیێ ڕەنگڤەددەت، ئەو ژی زولم و زوردارییا ب سەدان سالایە ئەو زەلامێن بەرامبەر ژنان ئەنجام ددا، وەكی (ئێشاندنا جەستەیی، بێ بها بوون، كێمكرن، بێدەنگ كرن، بێ بریاربوون، هەستێ لاوازیێ، كوشتن، پێگوهورك، نەخت، نەخوێندەواریی، كارێن گران، نە پاكی(خیانەت).... هتد). د قوناغا نوكەدا، ئاراستە دهێتە گوهورین بەرەڤ ئێشاندنا ڕەگەزێ نێر وەكی (كێمكرن، بێ بهاكرن، ئێشاندن، خیانەت، .... هتد)، ئەڤە ژی كارەساتەكا مەزنا مڕۆڤایەتیێ یە پشتی چەندین سەدەیێن دی یان چەند سالێت بهێت دێ دڕۆشمێت ئازادیی ل هەردوو لایانڤە بلند بن و چارەسەرییەكا هەردەمی ناهێتە دیتن، چونكو ل شوونا كو هەمی رێكخراو و سازیێت میری و حكومی و لایەنێت پەیوەندیدار و هشیاریا جڤاكی دڕۆشمێت مفا بەخش پێشكێش بكەن! دوو بەرەكیێ درۆست دكەن، ژن و زەلامان دكەنە دوو جەمسەرێن جودا و دوژمناتیێ و ركابەریێ دئێخنە دناڤبەرا واندا، لێ د كەتواریدا ژن و زەلام دوو ئافرێنەرن ،كو ل هەمی جهان و هەمی دەمان تمامكەرێن ئێكن، جوانییا وان د جوانییا بەرامبەر دایە، ئارامی و تەناهییا جڤاكی و پارڤەكرنا ژیانێ و ڤیانێ ب دەست وانە. لڤێرە دڕۆشمێ قوناغا دوویێ بهێتە چەسپاندن یەكسانی و دانا مافێن هەمی بوونەوەران بێ جیاوازییا ڕەگەزیی و ئاینی و تەخا جڤاكی و ژ هەمیێ گرنگتر ڕێزگرتنە ل دەسپێكێ ل ناخێ خوە، ماف و ئازادییا خوە دێ پارێزم دهەمان دەمدا مافێت بەرامبەر ژی دێ پارێزین و بن پێ ناكەین.
