ئاخاڤتن رێكەكە بۆ لێك تێگەهشتنا كەسێن بەرامبەر و گەلەك شێوازێن گەهاندنا پەیامێ هەنە، ژ وانا (زمان، دیتن، وێنە، ئاماژە... هتد)، لێ یا ژ هەمیان ب ساناهیتر و رێژا هەرە مەزنا مڕۆڤان بكاردئینن زمانە. ئەم مڕۆڤ ب رێكا زمانی ب كێمترین دەم و پر مفادارترین پەیام دگەهینن و ئەوا دناخ و مێشكێ هەر ئێك ژ مەدا دگەهیتە كەسێ بەرامبەر، لێ ئایا كەسێ ئاخاڤتنكەر چەند ژ سەدێ دشێت ب جوانی و ل جهێت گشتی پەیام و ئەركێ خوە بنەجهــ بكەت؟ هەر كەسەكی دناڤ كومەلگەهێدا جهەك هەیە كار لێ دكەت و ئەڤ جهە دبیتە مولكێ گشتی و ئەو كەسە بەرپسیار دبیت ژ وی جهی و دهەمان دەمدا، بەرپسیارە ژ شێوازێ خوە، لێ كارتێكرنێ ل وی دام و دەزگەهی یان ب شێوازەكێ گشتی بێژین ل جهەكێ دەستنیشانكریل دكەت. ل شوینا خزمەتكرنێ دبیتە جهێ بارگرانییێ و شكاندنا كەسێ بەرامبەر و كەس ژ مە نینە تۆشی ڤان جورە دلتەنگیان نەبوویی، ب مخابنیڤە ئەڤ دیاردە یا ب شێوازەكێ بەربەلاڤ دهێتە دیتن.
ل (نەخوشخانا، قوتابخانا، رەگەزنامە .....)، ئێكەم تشت دهێتە هزرا تە خواندەڤانێ هێژا، بوچی ئەڤ جهە ناڤێت وان هاتنە گوتن؟ ژبەركو: ئەڤ سێ جهە كەسێن خواندەڤان و خودان سەربۆركا زانستی و پەروەردەیینە لێ دهێنە دامەزراندن، ئەگەر لڤان جهان رێژەیا بكارئینانا زمانێ توندوتیژی و شكاندنا كەسان و خوە فەرز دیتن هەبیت، نوكە لسەر كارێت دی چ شێواز دهێتە بەرچاڤكرن. رۆژانە دێ خزمەتا كۆمەكا كەسان كەی، نە ب خێر و قەرە، بەلكو ئەركە لسەر ملێن هەر كەسەكی ب ناخەكێ جوان و لێبوردەیی و بهێنفرەهی، خزمەتەكا جوان و ژ رێزێ بكەت. ژ بەركو ئەو كەسێ ل وێرێ نەهاتیە، دا تەمەنەكی لێ بژیت، بەلكو ھندی چەند ڤەكێشیت، بلا دەمژمێرەك بیت! لێ بیردانك و ڤەگوهاستنا وێ دیاردەیا كرێت، بەلكو چەند سالا دێ هێتە گوتن. لڤێرە دوو تشت دهێنە ژدەستدان، ئێكەم ناڤێ وی جهی و دوویەم كەسایەتیا وی كەسی و دڤێت بزانین خزمەت ژ خوە بلند دیتن ژ خزمەتێ، دوو تەوەرێن دژبەرن .
