بازار یێ پرە ژ کەلوپەلێت پیس و بێ کووالتی و ژەهرا سپی، هەر تشتێ تۆ دکری بۆ جارا دوویێ دشیاندا نینە ل بازاری پەیدابکەی، چونکی شوینگرێ وی یێ بێ کووالتی ل بازارییە
وەکی چاوا ژینگەها مە ژبەر دیکێلا زێدە یا مووەلیدێن کارەبی، پانزینا پیس، کێمبوونا چاندنا دارا و هشکەسالیێ و بەرەڤ بیابانبوونێ، نەبوونا بەنداڤان بەرەڤ پیسبوونێ هەتا ئاستێ بلند چوویە و مەترسی کەفتیە سەر گیانێ وەڵاتیان، ئەڤرۆ بازارێ مە ژی بەرەڤ ڤێ مەترسییا کۆژەک چوویە.
بازار یێ پرە ژ کەلوپەلێت پیس و بێ کووالتی و ژەهرا سپی، هەر تشتێ تۆ دکری بۆ جارا دوویێ دشیاندا نینە ل بازاری پەیدابکەی، چونکی شوینگرێ وی یێ بێ کووالتی ل بازارییە. برنج و ئاهێن خارنێ، شرینی و تامخۆشیێن زارۆکا، شیر و ڤەخارنا وان هەر هەمی ئەڤرۆ مەترسینە بۆ سەر گیانێ جڤاکی و دلنیاجۆری یا حکومەتێ ژی نزانم د گوهێ گایی دایە یان ژی های ژ ڤی کاری نینە و ئەڤ بەرهەمێت پیس لدەرڤەی ئیرادە و شیانێن وان دکەڤنە ناڤا بازاری، یان ژی بەشەک ژ کاربدەستان هەڤپشکن بۆ خەندقاندنا مللەتی.
دوو کۆرتە بابەتێن ب سەرێ من هاتین دێ بۆ هەوە ڤەگۆهێزم، د تەمەنێ سەر ئێک سالیێ دا نۆژدارا جۆرە شیرەکێ هشک بۆ کچا من یا مەزن نڤیسی، ئەو جۆرە شیرە بۆ دەمێ هەیڤەکێ یێ مشەبوو پاشی شینگرێ وی هات و بێهنەکا گەنی ژ وی شیری دهات و ب نەچاری نۆژدارا ئەو شیر بۆ کچامن گۆهری، دسالا بووری دا جارەکا دیتر نۆژدارا بۆ کچا من یا دوویێ شیرەک پێشنیارکر، لێ ڤێ جارێ ب تنێ دوو هەفتیا ڤەکێشا و شینگرێ وی ژی بێهنەکا گەمار ژێ دهات و نەدشیا ڤەخۆت.
ئەڤە دوو کۆرتەچیرۆکێت منن، دگەل گەماریا بازارێ دهۆکێ و ئەگەر ژی سەمیان دەما زارۆکێن وان دچنە قوتابخانێ بەس بۆ جارەکێ سەرەدانا مارکێتا قوتابخانێ بکەن، دێ بچاڤ بینن کانێ د وان ب ناڤ مارکێتان ڤە چەند بابەتێن خارنێ یێن کۆژەک دبینن.
بازارێن کوردستانێ ئەڤرۆ یێن بووینە جهێ ساخکرنا کەلوپەلێن بێ کووالتی یێن دەولەتێن جیران و چاڤ برساتییا هندەک ب ناڤ بەرپرسێن بازرگان.
لەوما پێشنیار دکەم، د سەری دا لایەنێن پەیوەندار بهێنە سەر هێل بۆ چارەسەریا ڤێ ژەهرا کۆژەک و کونترولا بازاری بکەن و پاشان داخازکارێن گشتی ل هەموو دەڤەرا رۆلێ خۆ رابن و نەهێلن بازار د ڤی ئاستی دا بیت و خالا سیێ ژی ئەگەر چارەنەبیت، خەلک ب هشیارانە کەلوپەلان بکرن و بایکوتان بازاران بکەن.
