لەیەک دوو هەفتەی رابردوو؛ لە رێگەی (هابیل حاجی ئەحمەد) بەڕێوەبەری مۆنۆمێنتی چەمچەماڵەوە شەرەفی ئاشکراکردنی دۆسێی کچێکی ئەنفالکراو، درایە (کوردستانی نوێ) و دوای بڵاوبوونەوەی هەواڵەکە و هاوکات راپۆزتێکی پڕ زانیاریی لەگەڵیدا، کۆمەڵێک میدیای (نووسراو، بیستراو، بینراو) و چەندین رێکخراو و چالاکوان و کەسایەتی جۆراوجۆر بۆ کارکردن لەسەر دۆسێکەی (بەراء) هاتنە سەر خەت. بێگومان ئەمە مایەی هەستکردنە بە بەرپرسیارێتی و بەتەنگەوە هاتنی دۆسێیەکی تاسەر ئێسک مرۆیی و لەشوێنی خۆیدا بەرزدەنرخێنرێت.
پێش خستنەڕووی ئامانجی گۆشەکەی ئەم هەفتەیەمان؛ دەمەوێت سەرنجتان لەسەر ئەوەش رابگرم، کە چی هۆکارێکە وا لە کۆمەڵێک میدیای بەناو (گەورە) دەکات ئەوە نەکەنە تەوەری سەرەکیی کارکردنیان و هەوڵی ئەوە نەدەن کە ببێتە مەسەلەی رای گشتی لەناو کۆمەڵگەیەکی جینۆسایدکراودا؟
وەڵامی ئەم پرسیارە جەوهەری و گرنگە بابمێنێت بۆ کاتێکی تر و لە دەرفەتی گونجاودا قسەی لەسەر دەکەین. با بچینەوە بۆ لای دۆسێکەی (بەراء) و دیوەکەی تری کار لەسەرکردنی.
چیرۆکی ئەم کچە لە (مەرکەز شەبابەکەی خورماتووەوە دەستپێدەکات و لە مۆنۆمێنتی ئەنفالکراوەکانی چەمچەماڵەوە سەرهەڵدەدات) و رەنگە هەبن گلەیی ئەوە لە (هابیل) بکەن و بێژن بۆچی پێش بڵاوکردنەوەی هەواڵ و چیرۆکەکە بە ئێمەت نەوتووە؛ ئەمە قسەیەکی زۆر بێمانایە و ئەوەمان بیردەخاتەوە کە هێشتا کۆمەڵگەی ئێمە نە لە کاری دامەزراوەیی و نە لەکاریگەری میدیا و نە لە کارکردن لە دۆسێیەکی وەک دۆسێی جینۆساید و کاریگەری و رەهەند و لێکەوتەکانی تێناگەین و زۆر جاریش نامانەوێت تێیبگەین و باوەڕی تەوایشم بەوەیە (هابیل) رێگە راستەکەی لەم دۆسێیەدا گرتەبەر.
سەرهەڵدان و ئاشکرابوونی چیرۆکی (بەراء) وەک منداڵێکی ونبووی دووتوێی تاوانی جینۆسایدی ئەنفال لە چەمچەماڵ یان هەر شوێنێکی تری کوردستان و دەرەوەی کوردستان سەری هەڵبدایە، مادام (مەرکەز شەبابەکەی خورماتوو) سەرچاوەی ونبوونێتی، بۆ یەکلاییکردنەوە و پشتڕاستکردنەوەی چارەنووس و ناسنامەی راستەقینەی، دەبێت هەر لە (خورماتوو + مەرکەزشەبابەکە + ناوچەی داودە)وە تێهەڵچینەوە و جوگرافیای ناوچەکە و ئاواییەکان و دەفتەری تۆمارەکان ئەم دیواودیو بکەین، وا نەکەین، سەر لە خۆمان و ئەم کچە و چارەنووس و داهاتووشی تێکدەدەین، وەک نموونەشمان لەبەردەستە، چەندین دۆسێی هەستیاری ئاوامان خنکاندووە یان مردارکردووەتەوە!.
چۆن رێگە راستەکە بگرینەبەر و چی بکەین؟ ئاسانە و بهێنە پێشچاوی خۆت، ناوچەی داودە سێ بەشە (داودەی کوردستان، داودەی سەرچەم یان گەورە، داودەی ئەوبەر جاده)، لەداودەی کوردستان لە هەریەک لە ئاواییەکانی (عەزیزقادر، قەڵاچەرمەڵە، پیرەمەوەنی، قەواڵی) زۆربەی هەرەزۆری دانیشتووانەکەی لە قۆڵی (ملەسوورە- کەلار و سەرقەڵا و کفری)ەوە ئەنفالکراون و لە داودەی ئەوبەری جادە (هەفتەغار و ئاواییەکانی دەوروبەری ئەنفال نەکراون) و ماوەتەوە (داودەی گەورە یان سەرچەم) کە نزیکەی سەرووی (20) گوندە، لەکۆی ئەم (20) گوندە بەشێکی دانیشتوانەکەی بەهۆی جوگرافیای ناوچەکە و شەڕی پێشمەرگە و بەرگرییەوە لە تاوانی ئەنفالدا، کەوتنە دیوی داودەی کوردستان و سنووری هەم (ملەسوورە – کەلار و هەمیش قوریچایی- کفری) و ئەوانی (ملەسووره) بۆ زیندانی (قۆرەتوو) و ئەوانی (قوریچایی) بۆ خوورماتوو (مەرکەز شەبابەکە) لەگەڵ باقی دانیشتووانەکەی تری ئاواییەکانی تری (داودەی گەورە یان سەرچەم) کە لە هەمان شوێن (مەرکەز شەبابەکەی خورماتوو) کۆکرابوونەوە و تێکڕای گیراوە ئەنفاکراوەکانیش بەپێی ئامار و رووپێوییەکانی بەردەست نزیکەی (3000) کەسن و خێزانی (بەراء) یش یەکێکە لەو (3000) کەسە؟
ئێستا تێگەیشتن بۆچی دۆزینەوەی خێزانی (بەراء) و دیاریکردنی چارەنووسی و گەڕاندنەوەی ناسنامەی راستەقینە بۆی، قورس نییە و ئاسانە؟ ئاسانە ئەگەر نەیکەینە هەرکەس بۆخۆی و بهێڵرێت بە شێوەیەکی تەندروست کاری تێدا بکرێت.
