هەفتەیەک تێپەڕی بەسەر راگەیەندراوی پەسەندکراوی 12ــەمین کۆنگرەی گشتیی پەکەکە، وەک ئەوەی هێشتا هیچ هەنگاوێکی پراکتیکی لەلایەن تورکیاوە بەدینەکراوە، سەرباری ئەوەش هێشتا میدیای رەسمیی ئەو وڵاتە لەڕووی ختیابی میدیاییشەوە هیچ ئامادەکارییەکی بۆ زەمینەسازی نەکردووە بە ئاراستەی خاوکردنەوەی زمانی ئاخافتن و هێورکردنەوەی شەقام و ناکۆکیی ناو ریزەکانی گەلی تورکیا بە تورک و کورد و ئەوانی دیکەشەوە.
ئاخافتن بە ئاراستەی چارەسەر
راستە پارتی کرێکارانی کوردستان بڕیاری خۆ هەڵوەشاندنەوەی داوە و هێشتا جێبەجێ نەکراوە لەڕووی پراکتیکییەوە و بڕیاری چەک دانانی داوە و هێشتا نەچووەتە بواری جێبەجێکردنەوە، بەڵام زمانی خیتابی سیاسی ئەو حزبە و کورد بەگشتی لە قەندیل و ئەوروپا و تورکیا و بەو کوردانەشەوە کە لە زینداندان لە نموونەی سەڵاحەدین دەمیرتاش، ئێستا زمانێکی دیپلۆماسییانەی ئەوتۆیە کە بە ئاراستەی بوژاندنەوەی پڕۆسەی چارەسەری دەئاخفن.
راستە لە پەیامەکەی مانگی شوباتی ئۆجەلاندا ئاماژە بەوە کراوە کە قۆناغی خەباتی چەکداری کۆتایی هاتووە و ئەم هەنگاو و پەیامەش دوای پەیامەکەی دەوڵەت باخچەلیی سەرۆکی گشتیی مەهەپە هات کە باسی لەوە کرد (با پرۆسەی چارەسەریی کێشەی کورد لە «قەندیل و تیرۆر»ەوە بهێنرێتە ناو پەرلەمان و عەبدوڵڵا ئۆجەلان لە پەرلەمانەوە بانگەوازی هەڵوەشاندنەوەی حزبەکەی و هێزە جەنگاوەرەکەی بکات، چونکە تورکیا کێشەی لەگەڵ «تیرۆر» هەیە، نەک لەگەڵ کورد).
لە روانگەی پەیامەکەی 27ی شوباتەوە
واتە لایەنی کوردی لەو مەسەلەیەدا لە ماوەیەکی قیاسیی کەمدا بەپیر ئەو بانگەوازەوە هات و بۆ ئەوەش وەفدێکی دەم پارتی سەردانی ئۆجەلان و زۆربەی پارتە سیاسییەکانی تورکیا و رەجەب تەیب ئەردۆغان سەرۆک کۆماری تورکیا و دوای ئەوەش سەردانی هەموو حزبە سیاسییەکانی هەرێمی کوردستانیشیان کرد، چونکە هاوکات دەم پارتیش کە نوێنەرایەتیی زۆرینەی کوردی باکوور دەکات لە پەرلەماندا، لە روانگەیەکی دیکەوە هەمان بۆچوونیان هەبوو کە کێشەیەک هەیە لەو وڵاتەدا کە کێشەی کوردە و دەستبردن بۆ چەک لە ئەنجامی نکوڵی و داننەناندا بووە بە مافی کورددا وەک پێکهاتەیەکی سەرەکیی ئەو وڵاتە، دەنا ئەگەر کێشەکە بە دانوستان و دیالۆگ چارەسەر ببێت، ئەوا چەک هێندەی دیکە کێشەکان ئاڵۆز دەکات و لە دوژمنایەتیی حزبێک و دەوڵەتێکەوە دەیخاتە ئاستی دوژمنایەتیی میللی لەناو تاکەکانی کۆمەڵگەی تورکیا و 41 ساڵی رابردووی شەڕی چەکداریی پەکەکە و دەوڵەتیش ئەوەی سەلماند کە دەوڵەت لەڕێگەی تەکنۆلۆژیای نوێی جەنگی و گرتن و زیندانیکردنەوە نەک نەیتوانی دۆزەکە زیندەبەچاڵ بکات، بەڵکو هێندەی دیکە کێشەکەی قووڵ کردەوە و دەیان هەزار قوربانی لە سوپا و گەریللا و خەڵکی مەدەنیی لێکەوتەوە، بەجۆرێک دوژمنایەتیی مێژووییشی لەسەر ئاستی میللی لەنێوان کورد و تورکدا تۆختر کردەوە.
شەڕی چەکداریی ئەوەی سەلماند دەوڵەت لەڕێگەی تەکنۆلۆژیای نوێی جەنگی و گرتن و زیندانیکردنەوە، نەک نەیتوانی دۆزی کورد زیندەبەچاڵ بکات، بەڵکو کێشەکەی قووڵتر کردەوە
هیچیان نەیانتوانی ئامانجەکان بەجەنگ بپێکن
هەرچی پەکەکەشە نەک نەیتوانی بەجەنگ و کوشتار تورکیا بڕوخێنێت و پاشەکشەی پێبکات، بەڵکو لەوپەڕی باکووری کوردستانەوە شەڕ و پێکدادانەکان گەیشتەوە قەندیل لە باشووری کوردستان و چەند ساڵێکە تادێت بازنەی شەڕەکان لە دەوری ئەو ناوچانە زیاتر بەرتەسک دەبێتەوە، بەڵام لەبەرامبەردا ئەو کوردەی باکوور کە لە شۆڕشەکەی شێخ سەعیدی پیران و شێخ عوبەیدوڵڵای نەهرییەوە نووزەی کوردبوونیان تێدا نەمابوو، لەڕێگەی ئەو چەند ساڵەی شەڕی چەکداریی پەکەکەوە لە ژێر خۆڵی خۆلەبیرکردن هاتنەوە دەرەوە و بەشێوەیەکی ئازایانەتر دەنگیان هەڵبڕی بۆ داواکردنی مافەکانیان وەک هاووڵاتیی رەسەن و شەریکی راستەقینە لەو وڵاتەدا.
هاتنەدیی ئاشتی بە زمانی دیپلۆماسی
هەنووکە جیهان لەدوای راگەیەندراوەکەی 12ــەمین کۆنگرەی پەکەکەوە چاوەڕێی ئەوە نین کە ئیدی دەستبەجێ دەوڵەتی تورکیا هەموو تێڕوانین و تێزەکانی لە (کن فیکون)ێکدا بگۆڕدرێت، بەڵام چ وەک دەوڵەت و چ وەک میدیای سێبەری حزبەکانی تورکیا لە سەرەتاوە دەبێت ئامادەسازیی میدیایی بۆ بکەن، تا لایەنی بەرامبەریش جۆرێک لە دڵنیایی بەدەست بهێنێت و هەنگاوی گەورەتر و گرنگتر بنێت، چونکە ئەگەر بە وردی تێبینیی میدیای تورکیا بکەین دەبینین هەرلە لێدوانەکانی خودی ئەردۆغانی سەرۆک کۆمارەوە تا هاکان فیدانی وەزیری دەرەوە و ئیبراهیم کاڵن-ی سەرۆکی دەزگای هەواڵگریی (میت) و تا راگەیەندراوەکانی سەرۆکایەتیی کۆمار و وەزارەتی بەرگریی و کەناڵەکانی تەلەفزیۆن و رۆژنامەکان جۆرێک لە لووتبەرزیی پێوەدیارە و هێشتا وێڕای دەستخۆشییان لە پەکەکە بۆ خۆهەڵوەشاندنەوە و چەکدانان هەربە «رێکخراوە تیرۆریستەکە» ناوی دەهێنن بێباک لەوەی کە بنەماکانی ئاشتی بە زمانی نەرم و دیپلۆماسی دەچەسپێت، نەک بە زمانی زبر و خۆبەزلزانین، ئاشکراشە چەندە کورد پێویستی بە سەقامگیریی و ئاشتییە لەم قۆناغە ناوخۆییەی تورکیادا بەڕەچاوکردنی دۆخی ئیقلیمی و نێودەوڵەتی، دەوڵەتی تورکیاش هێندە و بگرە زیاتریش پێویستی بە چارەسەری کێشەی کورد و هاتنەدیی ئاشتییە.
پرۆسەی ئاشتی لە تورکیا بەکوێ دەگات؟
