بەپێی هەموو شەریعەتە ئاسمانی و زاناكانی سۆسیۆلۆژیا، مرۆڤ پێویستی بە دوو شتی گرنگ هەیە، بۆ بەردەوامبوونی ژیان و مانەوە و دابینكردنیشیان ئەركی سەرەكی هەر حكومەتێكە، ئەوانیش بریتین لە دابینكردنی: خۆراك و خواردنەوە، كە بۆ مانەوە و نەمردنی جەستەی پێویستە، چونكە مرۆڤ بەبێ خۆراك جەستەی دەمرێت، ئەویتریان ئاسایشە بەمانا گشتیی و فراوانەكەی، بۆ ئەوەی مرۆڤ پارێزراوبێت لەهەموو جۆرە مەترسی و هەڕەشەیەك بۆ سەر ژیانی.
دابینكردنی ئەم دوو پێداویستییە زۆر پێویستە بۆ تاك و كۆمەڵگەش، بە دابینكردنی ئەو دوو پێداویستییە، تاكەكانی كۆمەڵگە هەست بە دڵنیابوون دەكەن لە ژیان و گوزەران و ئایندەی خۆیان و ماڵ و منداڵ و سامان و وڵاتەكەیان، بەوەش هاووڵاتیبوونی تەندروست دێتەئاراوە كە بەرژەوەندیی گشتی وەكو بەرژەوەندیی تایبەتی خۆی دەپارێزێت، چونكە بەرژەوەندیی لە پاراستنی ئەو لایەنەدایە، كە حكومەت و دەوڵەتە و راستتر بڵێین سیستمەكەیە، كە ئەو پێداویستییە هەنووکەییانە دابین دەكات.
بڕیاری نەناردنی مووچە و بژێویی هاووڵاتیانی هەرێمی كوردستان و درێژەكێشانی، كاردانەوەی نێگەتیڤانەی بەسەر تاك و كۆمەڵگەكەماندا هەبووە، چونكە برسێتی و خراپیی گوزەران مرۆڤ دووچاری لەڕێ لادان دەكات. مرۆڤی نەبوو ناتوانێت راست بیر بكاتەوە، برسێتی توانای بیركردنەوە لە مرۆڤ دەسێنێتەوە. تەنانەت دیلیش نابێت برسی بكرێت، چونكە یەكێك لە مافە سروشتییەكانی مرۆڤ دابینكردنی خۆراكە بۆی (بە مانای دابینكردنی بژێوی) و خزمەتگوزارییەكانی تر، تەنانەت خودا كە خالقی سەرجەم بوونەوەرەكانە و لەو دەسەڵاتدار و بەهێزتر نییە، رزقی ئەو كەسانەش نابڕێت كە بێ باوەڕن.
لەلایەكی دیکەوە، برسێتی و نەبوونی و نەداریی، ئارامی و ئاسایشیش بە گشتی ناهێڵێت، چونکە بەبێ ئاسایش، مرۆڤ تووشی دڵەڕاوكێ و ترس دەبێت، ژیانی دەكەوێتە ژێر هەڕەشە و مەترسیی جۆراوجۆرەوە، هەر لە ئاسایشی سەر و ماڵەوە بگرە تا دەگاتە ئاسایشی ئابووریی و نەتەوەیی و تەندروستی.
سیستمی راست و دروستی حوكمڕانیش لەسەر ئەو دوو پایەیە دامەزراوە کە لەسەرەوە ئاماژەمان پێكرد و بە یاسا دەخرێتە ژێر تەزمیناتەوە و كاری پێدەكرێت، ئەوروپاش بە پلەی یەكەم ئەو دوو مافەی هاووڵاتیانی دابینکردووە كە ئەركی حكومەت و سیستمە، بۆیە ئینتیمایان بەرزە بۆ وڵاتەكانیان.
دابینكردنی ئەو دوو مافە سروشتییە (بژێوی و ئاسایش) بۆ تاك و خێزان لەسەر بنەمای هاووڵاتیبوون، ئۆتۆماتیكی هاووڵاتی بۆ لای حكومەت رادەكێشێت، بە پێچەوانەشەوە وادەكات هاووڵاتی رقی لە حكومەت و دەوڵەتەكەی خۆی ببێتەوە و هەوڵی رووخاندنی بدات، لەبەرئەوە پێشێلكردنی مافی بژێویی هاووڵاتیانی هەرێمی كوردستان لەم قۆناغە راگوزەرەی ناوچەكەدا، كاردانەوەی زۆری دەبێت لە هەموو ئاستەكاندا و ئامانج لێی دروستكردنی رق و كینەی نەتەوەییە بە ئامانجی دابەشكردنی عیراق لە رێگەی پێكدادانی هەرێم و بەغدا.
