كوردستان ئیسماعیل بێشكچی وتەنی كۆڵۆنییەكی نێودەوڵەتییە، هەر لەبەرئەوە بە هەڵوەشاندنەوەی سیستمی ئیقلیمی و نێودەوڵەتی، دەرگای رزگاریی و نەمانی داگیركاریی بەسەردا دەكرێتەوە. ئەوەی ئەمڕۆش دەبینرێت، لە دەنگ و سەدای كورد لە سەرەتای نەوەدەكانەوە لە ئاستی جیهاندا، بە هەڵوەشاندنەوەی سیستمی دووجەمسەریی و لە ئاستی ئیقلیمیشدا بە لێكەوتەی داگیركردنی كوێت لەلایەن عیراق و دامەزراندنی هەرێمی كوردستانی دیفاكتۆوە دەستپێدەكات، كە دواتر بە رووخانی رژیمی بەعسی سەدامی بوو بە قەوارەیەکی دەستووری لە چوارچێوەی عیراقدا.
11ی سێپتەمبەر و لێكەوتەكانی بەرەو هەڵوەشانەوەچوونی سیستمی تاكجەمسەریی، بەهاری عەرەبی لێكەوتەوە و فەزایەكی دیموكراسیی لە ناوچەكەدا بە رووخانی سیستمە دیكتاتۆرییە چل ساڵییەكانی موبارەك و بن عەلیی و قەزافیی هێنایە ئاراوە. رووخانی رژێمی ئەسەدیش، كۆڵەكەیەكی سەرەكیی سیستمی ستەمكاریی ئیقلیمی و داگیركاریی كوردستانی هەڵتەكاند و سەپاندنی ئیدارەی خۆسەریی دیموكراسیی كوردی لە رۆژئاوای كوردستان كردە ئەمری واقیع. حەوتی ئۆكتۆبەریش رەگوریشەی دەوڵەتی ئیسرائیلی دەرهێنا و سیستمی ئیقلیمیی بنیاتنراوی لەسەر دابەش و داگیركردنی كوردستان هەژاند و ئاسۆیەكی فراوانی لەبەردەم كورد و كوردستاندا كردەوە، بۆ هەنگاونان بەرەو نەمانی داگیركاریی و رزگاركردنی خاك و نیشتمان، هەر لەبەرئەوەش دەوڵەتی قووڵ لە توركیادا لە چوارچێوەی «توركیای بێ تیرۆر»دا دەستپێشخەریی دانانی چەك و هەڵوەشاندنەوەی پەكەكەی خستە بەردەم ئۆجەلان، لەلایەك بۆئەوەی پەكەكە و بیست ملیۆن كورد لە توركیا لە ململانێی داڕشتنەوەی نەخشەی خۆرهەڵاتی ناوەڕاستدا وەكو كوردی باشوور و رۆژئاوای كوردستان نەبن بە قەوارەیەکی دیفاكتۆ، لەلایەكی دیكەشەوە بۆئەوەی دۆسێی كورد نەكەوێتە دەست ئیسرائیل و ململانێی نێوان جێبەجێكردنی پرۆژەی سەدەی توركیا و ئیسرائیلی گەورەدا.
هەموو ئاماژەكان ئەوە دەسەلمێنن كە سەردەم، سەردەمی قەوارە و تەكەتولاتی گەورەی ئیمپراتۆرییەتەکانە، خۆرهەڵاتی ناوەڕاستیش بەو شێوەیە دادەڕێژرێتەوە و مۆدێلی دەوڵەتی ویشتیڤاڵی نامێنێت، لەبەرئەوەش توركیا پرۆژەی ژیاندنەوەی ئیمپراتۆریەتی عوسمانی هەیە و ساڵانێكە خۆی بۆ ئامادە دەكات. پشتیوانی كورد لەو پڕۆژەیە زۆر ژیانییە، چونكە بەپێی بەڵگە و ئەزموونە مێژووییەكان، ئەوەی كوردی لەگەڵ بووبێت بردویەتییەوە، ئەمە لە مەلازگردەوە بگرە تا دەگەیتە چاڵدێران راستە، كە هەردوو سەركەوتنی توركەكان لەسەر پشتی كورد بووە.
ئەزموونی 100 ساڵی رابردووی داگیركاریی و هەوڵەكانی پێشووی بەناو چارەسەریی و ئایدۆلۆژیا و دەستووریی ئێستای توركیا ئومێدبەخش نییە بۆ چارەسەركردنی كێشەی كورد، لەبەرئەوە چەكدانانی پەكەكە لەم قۆناغەی كە جەنگێكی سەرتاسەری ناوچەكەی گرتووەتەوە لە غەززەوە تا دەگاتە لوبنان و سوریا و یەمەن و رۆژ بەڕۆژیش زیاتر تەشەنە دەسێنێت، زەمان دروست نییە. لەو روانگەیەوە دوور نییە بە چەكدانانی پەكەكە، كە سەرگرتنی زەحمەتە، هەرێم و رۆژئاوای كوردستان زیاتر بكەونە بەر پەلامار و شاڵاوی سەربازیی توركیاوە بە ئامانجی لەباربردنی ئەو زەمینە و دەرفەتەی بۆ رزگاربوونی كورد لە بندەستی هاتووەتە ئاراوە. بەڵام ئەمڕۆ سیستمی ئەنتی كورد هەڵوەشاوەتەوە و بەپێی فاكتەرە مێژوویی و شارستانییەكانیش، سەدەكە سەدەی كوردە، نەك كەسانی دیكە.
