سەرۆک بافڵ تاڵەبانی لە یادی دامەزراندنی ی.ن.ک دا وتی: پێویست بکات دەچمە بەغدا بۆ چارەسەرکردنی مووچە
لەسەردەمی پارتیزانیدا، قورسترین و کاریگەرترین چەک کە لەدژی ئێمە بەکاردەهات (کە شوێنەکەمان ئاشکرا ببوایە) هەلیکۆپتەر بوو بەتایبەتی ئەوەی پێی دەووترا سەمتی، زۆرترین ئەو قوربانییانەش کە دابێتمان بە گروپ، بەهۆی هێرشی هەلیکۆپتەرەوە بووە بۆ سەرمان.
ئەمڕۆ لەگەڵ پێشکەوتنی تەکنۆلۆژیای سەربازییدا، فڕۆکەکانی سەدەی رابردوو، زۆربەیان، چەکی یەکلاکەرەوە نین لە هیچ جەنگێکدا، بەڵکو مووشەک، درۆن، چەکە ئەتۆمییەکان، بالیستییەکان، کیمیاییەکان، ئەمانە دەتوانن ئەنجامی جەنگەکان یەکلابکەنەوە.
لە جەنگی ئەم دواییەی نێوان ئیسرائیل+ئەمریکا بەرامبەر بە ئێران، کاریگەریی ئەو جۆرە چەکانەمان بینی، بەڵام ئەمە جەنگی ئاشکرا بوو، سەرچاوەی ناردنی چەکەکانیش بۆسەر یەکتر دیاربوو لە کوێوەیە و لێشیان دەخرایە خوارەوە پێش گەیشتنی بە ئامانج.
ئەوەی لەدوای تەواوبوونی ئەو جەنگەوە دەیبیستین، ئەو هێرشە درۆنیانەیە کە دەکرێنە سەر شوێنە جیاوازەکانی هەرێم و تائێستاش سەرچاوەکەی نادیارە.
سەیری جوگرافیای هەرێم بکەن، لە زاخۆ دەدرێت، لە سلێمانی و کەرکوک و هەولێریش دەدرێت بە درۆنی سەرچاوە نادیار (هاوشێوەی پارتیزانی) دەهاوێژرێت و شوێنەکە دەگوازرێتەوە.
ئەو گروپانەی بەم کارە هەڵدەستن گرێدراوی یەکن، هەموویان لە یەک شوێنەوە ئاراستە دەکرێن و کەسیش بەرپرسیارێتی ناگرێتە ئەستۆ، بۆیە دەتوانین ناوی تێکدەرانە و گێرەشێوێنیانەی لێبنێین، نەک گروپە ئازادیخوازەکانی وەک سەردەمی ئێمە.
عیراق فیدراڵییە، زۆرێک لە سەرکردە سیاسییە عیراقییەکان بەپەرۆشەوە باس لەسەروەریی و یەکپارچەیی ئەم وڵاتە دەکەن و لەڕووی هەر بیرۆکەیەکدا دەوەستنەوە کە باس لە جیاکردنەوەی بستێکی بکات، هەرێمی کوردستان بەپێی دەستووری عیراق دیاریکراوە، مامەڵەکانی بەغدا و هەولێر دەبێت لەژێر چەتری دەستووردا بکرێت، بەغدا هاوشێوەی هەولێر بەرپرسیارە لە پاراستنی ئاسایش و سەقامگیریی هەرێم و باقی شارەکانی دیکەی عیراق (هەڵبەتە بۆ هەرێم جیاوازترە و دەکرێت لەڕێگەی پێکەوەکارکردن و هاوکارییکردنەوە بکرێت)، بەغدا، هەولێر بەرپرسیار دەکات لەوەی کە هەر تاوانبارێک روو لە هەرێم بکات دەبێت بگیرێت و رادەستی بەغدا بکرێتەوە، بەڵام جێگەی داخە کە چەند گروپێکی نادیار، لە ناو چوارەچێوەی عیراقەوە، هێرشی درۆنی دەکەنە سەر خاڵە جیاوازەکانی دەرهێنانی نەوت و شوێنە سەربازییەکان لەناو سنووری ئیدارەی هەرێـم، کەچی بەغدا لەڕێگەی گوشار خستنەسەری ئەو گروپانەوە کە بەو کارانە هەڵدەستن، هەنگاو نانێت.
ئەو گروپانە کە بە پەنجەکانی یەک دەست دەژمێردێن و زۆریشیان لای حکومەتی فیدراڵ ناسراون، رەنگە هەندێکیشیان پاشکۆی ئەو لایەنە سیاسییانە بن کە لە حکومەتیشدا بەشدارن.
دەبێت حکومەتی فیدراڵ ئەو راستییە بزانێت، کە لە سوودی گەلانی عیراق نییە هەرێمی کوردستان ناسەقامگیر بێت، بە پێچەوانەوە، سەقامگیریی لە هەرێم، بەواتای سەقامگیرییە لە بەغدا، قووڵکردنەوەی کێشەکان پێگەی هەر حکومەتێک لە بەغدا، بەوەی ئێستا و داهاتووەشەوە لاواز دەکات، هاوکاریی ئەمنیی هەردوولا (هەولێر و بەغدا) دەستی تێکدەران دەبڕێت و ئاسایشی نیشتمانی دێنێتە کایەوە، بە جۆرێک بەڕێوەبردنی وڵات و پێشخستنی کۆمەڵگە ئاسانتر دەبێت، گەیشتن بە چارەسەری کێشەکانی نێوان هەرێم و حکومەتی فیدراڵ بەڕێگەی گفتوگۆ باشترین بژاردەیە.
دوایین هەوڵەکانی یەکێتیی نیشتمانیی کوردستان، لەسەردانەکانی سەرۆک بافڵ تاڵەبانی-ییەوە بۆ بەغدا و بەدیهێنانی ئەو بەڵێنەی لە رۆژی دامەزراندنی ی.ن.ک دا، لە یەکی حوزەیرانی ئەمساڵ لە یاریگای سلێمانی دای بەخەڵک و وتی: ئێمە هاوخەمی ئێوەین لە کێشەی مووچەدا و هەوڵەکانیشمان بەردەوامە بۆ چارەسەرکردنی و ئەگەر پێویست بکات من خۆم دەچم بۆ بەغدا، بەدوای ئەمەدا، ئەو چاوپێکەوتنانەی کە سەرۆک بافڵ لەگەڵ هەندێک لە کەسایەتییە سیاسییەکانی عیراق کردی، لەسەروویانەوە محەمەد شیاع سودانی، سەرۆکی حکومەتی فیدراڵی و بەدوایدا واژۆکردنی لێكتێگەیشتنی نێوان هەرێم و بەغدا و بڕیاردانی خەرجکردنی مووچە و خێرا پێکهێنانی هێزی تایبەت و گەڕان بە شوێن سەرچاوەی هاویشتنی درۆنەکان بۆ سەر هەرێم، لە دەشتی نەینەواو و تکریت، سەلمێنەری ئەو راستییەن کە رێگەی گفتوگۆ و لێک تێگەیشتن، دەمانگەیەنێتە کەناری ئارامی، پێچەوانەکەشی زمانی هەڕەشەیە و دوورکەوتنەوە لە گفتوگۆ و یەکتر رەتکردنەوەیە کە بەرەو نائارامی و خراپیی دۆخی ئەمنی و ئابوورییمان دەبات، پێویستە هەموان بە هەستی بەرپرسیارانەوە بدوێین و هەنگاو بنێین، چونکە پاراستنی ئەم قەوارەی هەرێمە ئەرکی هەموانە و زیرەکیی دەوێت لە مامەڵەکردن لەگەڵیدا.
