حەمەغەفور ئاغجەلەری سەرکردە شەهیدی دەستی غەدر و خیانەت

شەهیدان و تێکۆشەرە دێرینەکانی کوردایەتی و شۆڕشەکانی گەلی کوردستان، ئەو سومبولانەی خەبات و قوربانیی گەلی کوردستانن کە سەرەڕای هەموو جیاوازییە فیکریی و ئایدیۆلۆژیی و رەنگەکان، مافی ئەوەیان بەسەر ئێمەی نەوەکانی دوای ئەوانەوە هەیە بەسەریان بکەینەوە و داستان و خەبات و تێکۆشان و قوربانیدانەکانیان دەوربکەینەوە و بەبیریان بهێنینەوە، هەم بۆ فێربوون لێیانەوە و هەم بۆ پەند وەرگرتن لەو رێباز و قوتابخانەی فیداکارییەی ئەوان بناغەکەیان دانا، هەم بۆ نەوەکانی ئایندەش دیکۆمێنتیان بکەین تا لە نرخی ئازادیی تێبگەن و بزانن ئەوەی هەیە بە هەموو کەموکوڕییەکانییەوە بە هەوانتە بەدینەهاتووە، ئەگەرچی زۆرێک لە ئامانجەکانیان لەلایەن خەڵکانی هەلپەرستەوە بەلاڕێدا براوە، بەڵام با نەوەی ئێستا و داهاتوو شیلەی خەباتە پاڵفتەکە هەڵمژن و ئەوەی ئەمڕۆ دەیدەنە بەر تیری رەخنە، لە ئەنجامەکەی ئەمڕۆوە نەیخوێننەوە، بەڵکو لەو خەباتە پاک و بێگەردەی شەهیدان و زیندانیان و تێکۆشەرانی دێرینەوە دەستبکەن بە تێکۆشان و خەبات بۆ ئازادی بەپێوەرەکانی ئەمڕۆ، بەوپێیەی هێشتا خەباتی رزگاریی نیشتمانی لە نیوەی رێگەدایە و کوردستان لەخەم نەڕەخسیووە.
ئەم دۆسێیە دڵۆپێک لە دەریای وەفاداریی کوردستانی نوێیە بەرامبەر بە شەهیدان و تێکۆشەرانی رێگای کوردایەتی و رزگاریی نیشتمانی، و دیکۆمێنتکردنی خەبات و قوربانیدانی هەمووشیان بە ئەرکی خۆی دەزانێت، چ وەک رۆژنامەی حزبێکی سیاسیی پێشڕەوی خەبات و قوربانیدان و چ وەک کایە و ئۆرگانێکی رووناکبیریی نیشتمانی کە بتوانێت هەموو ئەو شەهید و تێکۆشەرانە بەسەربکاتەوە و وردەکاریی ژیان و خەباتیان دیکۆمێنت بکات، بەڵام دیارە ئەو هەوڵە ئەگەر کەمیش بێت بەبێ هاوکاریی و دەستگیرۆیی کەسوکار و هاوسەنگەرانی شەهیدان و تێکۆشەران کامڵ نابێت، بەوپێیەی زانیاریی و رووداو و حیکایەتەکانی جوامێریی و نەمریی لە سینەی ئەواندا پەنگی خواردۆتەوە، جا بۆئەوەی بە ئێمە و ئەوان بتوانین ئەو مروارییانە بخەینەڕوو بۆ نەوەکانی ئێستا و ئایندە، با ئەم دۆسێیە ببێتە دەرفەتێک بۆ هاوکاریی پێکەوەیی و نووسینەوەی مێژووی کوردایەتی و شۆڕشی نوێ. 

دۆسێ- جەمال دەروێش

نەبەز قادر محەمەد/ توێژەر 


پوختەیەك لە ژیان و خەباتی شەهیدی سەركردە حەمەغەفور ئاغجەلەری
شەهیدی سەركردە محەمەد غەفوور ئەحمەد ناسراو بە حەمەغەفوور ئاغجەلەری، لە ساڵی 1939 لە بنەماڵەیەكی كوردپەروەری عەشرەتی كەلهوڕ، لە شارەدێی ئاغجەلەری ناوچەی قەڵاسێوكە چاوی بەژیان هەڵهێناوە.
تا پۆلی دووەمی ناوەندی خوێندووە، ساڵی 1969 لەگەڵ خاتوو (وەزیرە عەبدولڕەحمان فەرەج) كە خزمی خۆی بووە، زەماوەندی كردووە و بوونەتەكە خاوەنی دوو كوڕ و سێ كچ، بە ناوەكانی: (سەركەوت، سەردار، هێرۆ، چرۆ، لەیلا).

لە شۆڕشی ئەیلولدا
ساڵی 1961 پەیوەندیكردووە بە ریزەكانی پارتی دیموكراتی كوردستانەوە، لە شۆڕشی ئەیلولدا بووە بە پێشمەرگە لە لقی دووی شەهید مەئموون.
لە ماوەی  پێشمەرگایەتییدا تا ساڵی 1970 چەندین ئەرك و بەرپرسیارێتی پێ دراوە، لە وانە: سەردەستە، سەرپەل، سەرلق لە لقی سێی كەركوك).
 بەم شێوەیە بەردەوامبووە لە پێشمەرگایەتی و لە ساڵی 1970دا پلەكەی بەرزكراوەتەوە بۆ فەرماندەی بەتالیۆن كە بەتالیۆنەكەی لە شەش لق پێكهاتبوو.
ساڵی 1972 گوازراوەتەوە بۆ (هێزی رزگاری) كە فەرماندەكەی (عەبدوڵڵا زێباری) بوو لە چوارچێوەی بەتالیۆنی دوو كە (حاجی شێخ قادری سۆتكە) بەرپرسی بوو، ساڵی 1974 دوای ئەوەی گفتوگۆی نێوان سەركردایەتی كورد و حكومەتی ئەوكاتی عیراق ئەنجامی نەبوو و حكومەت شەڕی لەدژی خەڵکی كوردستان دەستپێكردەوە، ئەو ساڵە هێزێكی زۆری رژێم هێرشی كردە سەر شاری سلێمانی، لەوكاتەدا شەهید حەمەغەفوور پلەی سەرلق بوو لە هێزی رزگاری و  بارەگاكەی لە چەمی رەزان بوو. پاشان گواستییەوە بۆ چەمی (عەلی شاڵی) لە سنووری گوندی گەڕگەڕی سەربە ناحیەی ئاغجەلەر.
 هێزێكی پێشمەرگە بە فەرماندەیی شەهید حەمەغەفوور بۆ ماوەی سێ شەو و سێ رۆژ لە دەربەندی بازیان و بە دیاریكراویش لە گوندی (گۆپاڵە) بەریان بەو هێرشە گرت.
لە ئەنجامی ئەو بەرگرییەدا زیانێكی زۆری مادی و مرۆیی بەر هێزەكەی رژێم کەوت و هەر لەو شەڕەشدا فڕۆكەیەكی جەنگیی لە جۆری مێگ لەلایەن پێشمەرگەوە پێكرا و لە سنووری گوندی گەورەدێ، كەوتە خوارەوە. 

مام جەلال و وەزیرەخانی هاوسەری شەهید حەمەغەفور

 
دوای نسكۆی شۆڕش
لە دوای نسكۆی شۆڕشی ئەیلول لە ساڵی 1975دا، لەگەڵ 103 كەس لە هاوڕێ و هاوخەباتەکانی روویانكردە ئێران، لەناو ئەو پۆلە تێكۆشەرەدا تاكە خزمی خۆی كە لە گەڵیدابوو (عادل قادر عەبدوڵڵا) بوو.
لە ماوەی رۆیشتنەكەیاندا تا گەیشتنیان بە شوێنی مەبەست لە رۆژهەڵاتی كوردستان، دووچاری برسێتی و نەهامەتی زۆر بوونەوە، لەو سەروبەرندەدا و بەهۆی دژواریی بارودۆخەكەیانەوە، هاوڕێكانی بیر لەوە دەكەنەوە چەكەكانیان بفرۆشن و پێویستی خۆیانی پێ دابین بكەن، بەڵام شەهید حەمەغەفوور رێگەیان نادات، وردتر و دوورتر دەڕوانێت و پێیان دەڵێت: «من دەمانچەكەم و دووربینەكەم دەفرۆشم، ئێوە چەكەكانتان مەفرۆشن، دواتر پێویستمان پێیان دەبێت.
ئیدی دەمانچە و دووربینەكەی بە (264) دیناری سویسری دەفرۆشێت و پارەكەی بەسەر هاوڕێكانیدا دابەش دەكات.
 كە دەگەنە شاری (مهاباد)ی رۆژهەڵات و پاش ئەوەی جێگیر دەبن، وەك باقی ئەو تێكۆشەرانەی تر بەدوای دەرفەتێكدا دەگەڕان بۆ سەرلەنوێ سەرهەڵدانەوەی شۆڕش. بۆیە لەو سەروبەندەدا لەگەڵ كۆمەڵێك تێكۆشەری دیاردا (بزووتنەوەی سۆشیالیستی كوردستان) پێكدەهێنن و لە چوارچێوەی یەكێتیی نیشتمانیی كوردستان و شۆڕشی نوێدا دەست دەكەنەوە بە خەباتی چەكدار و دەگەڕێنەوە كوردستان.
شەهید حەمەغەفوور كە ئەندامی سەركردایەتی بزووتنەوەی سۆسیالیستی كورستان و ناوی نهێنیی (پیرۆت) بوو، هاوینی ساڵی 1976 نامەیەکی لە شەهید عەلی عەسكەرییەوە پێدەگات کە بە حەمەی مامە سەلامدا نامەکە دەنێرێت بۆ شەهید حەمەغەفوور و تیایدا داوای لێكرا بوو بچێتە شاخ، ئەویش دڵسۆزی و خەمخۆری بۆ نیشتمان و نەتەوەكەی وای لێدەكات بێ سێ و دوو بە داواكارییەكە رازی ببێت و هاوكات وەزیرەخانی هاوسەریشی لەو مەبەستە ئاگادار دەكاتەوە، لەو كاتەدا كە لە ئاوارەیی و ژیانی كولەمەرگیدابوون، وەزیرەخان پێی دەڵێت: «ئەی ئێمە؟ ئەم منداڵانە چی لێ دەكەیت؟».
ئەویش یەك یەك ناوی منداڵەكانی دێنێت و دەڵێت: «خۆ هەر ئەمانە منداڵی من نین، بەڵكو هەموو منداڵانی كوردستان هی ئێمەی پێشمەرگەن و پێویستە بیان پارێزین».

لە پێناوی بەهێزكردنی شۆڕشی نوێدا
بێگومان ئەم تێڕوانینەش لە سۆنگەی بەرپرسیارێتی و دڵسۆزییەوە سەرچاوە دەگرێت، لە بەرامبەر رۆڵەی گەلێك كە شەو و رۆژ دەچەوسێنرانەوە لەلایەن رژێمی عیراقەوە.
 لێرە بەدواوە قۆناغێكی نوێ لە ژیان و خەباتی شەهید حەمەغەفوور دەستپێدەكات و بە كۆمەڵێك ئاوات و ئامانجەوە دەگەڕێتەوە بەرەو باشووری كوردستان، سەرەتاش دەچێتە شاری چەمچەماڵ و لەوێوە بۆ سلێمانی و پاشان بۆ قەڵادزێ و مەنگوڕایەتی و دواجار لە گوندی رەزگەی بناری قەندیل دەگیرسێتەوە.
لە سەرەتای شۆڕشی نوێ دەبێتە فەرماندەی مەفرەزە سەرەتاییەكانی ناوچەی كەركوك و فەرماندەی هەرێمی دوو، ئیدی هەموو هەوڵێكی دەخاتەگەڕ بۆ راكێشانی خەڵكی بۆ ناو رێكخستنەكانی یەكێتیی نیشتمانیی كوردستان و هێزی پێشمەرگە، بۆ ئەم مەبەستەش سەردانی زۆرێك لە گوندەكانی سنوورەكە دەكات و ئامانج و بەرنامە و پلانی شۆڕشی نوێیان بۆ روون دەكاتەوە و داوا لە دانیشتوان دەكات پاڵپشت و هاوكاری ئەو شۆڕشە بن، بۆ نموونە: لە رێكەوتی 17/1/1977 لە گوندی تلیانی سەربە شارەدێی ئاغجەلەر لە ماڵی (ئەنوەری كوێخا جەوهەر) لەگەڵ زیاتر لە 25 كەسایەتی سنوورەكە كۆبۆتەوە و باسی گرنگیی هاوكاری خەڵكی و پشتیوانی شۆڕشی بۆكردوون.
لە رۆژی 19/6/1977 لە گوندی قوڕاوەی سنووری ئاغجەلەر كۆبوونەوە بە خەڵك و رێكخستنەكانی دەكات، هەروەها لە رۆژی 2/7/1977 لە چەمی قوچەتاغی كە دەكەوێتە خۆرئاوای گوندی تەوەكەڵ، كۆبوونەوەیەكی گرنگ لەگەڵ هەڤاڵانیدا دەكات.
حەمە غەفوور بەهۆی لێهاتوویی و چاونەترسی و داڕشتنی پلان و نەخشەی وردەوە بۆ روبەڕوبوونەوەی دوژمن، هەمیشە لەو بەرانەی شەڕدا كە ئەو سەرپەرشتی کردوون، سەركەوتن تێیدا مسۆگەر بووە، بەو بەڵگەیەی مام جەلال تاڵەبانی دەڵێت: (هەر بەرەیەكی شەڕ  حەمەغەفوور فەرماندەی بێت، بە سەركەوتن كۆتایی دێت).
شایانی ئاماژە بۆكردنە، شەهید حەمەغەفوور لە مێژووی خەباتی سیاسی و چەكداریی لە هەردوو شۆڕشی ئەیلول و شۆڕشی نوێدا، بەشداریی زۆرێك لە نەبەرد و داستان و چالاكییەكانی كردووە، لەوانە: شەڕی كۆلكەڕەش لە سنووری گوندی چنارتوو، شەڕی قەرەسرد- دوكان ساڵی 1969، شەڕی كانی شەیتان- دەربەندی بازیان ساڵی 1974، شەڕی گوندی دانەسۆفی ساڵی 1974، لێدانی چەكدارە زێبارییەكانی سەربە رژێم لە سنووری گوندی مۆتلیجە ساڵی 1974 كە لەو شەڕەدا 85 جاش كوژراون و 25 یشیشان لێ بەدیل گیراوە، شەڕی قەرەداغ ساڵی 1974، شەڕی چەمەسوور ساڵی 1974 شەڕی سێوسێنان، شەڕی تەقتەق ساڵی 1974، شەڕی چیای توتەمر ساڵی 1974، شەڕی دارەسحاب نێوان گوندی عەسكەر و شێخان ساڵی 1974.
هاوكات لە چاندنی (مین- لوغم)دا شارەزاییەکی باشی هەبووە و لەو رێگەیەوە لە دژی هێرشی سوپای دوژمن دەیان ئەفسەر و پلەداری دوژمنی بە سزای گەل گەیاندووە.
سەرەڕای ئەوانەش چەندین جار كەوتۆتە بۆسەی دوژمنەوە، بەڵام توانیوێتی خۆی دەرباز بكات، بۆ نموونە: ساڵی 1976 لە نێوان گوندی قەڵاچۆغە و داڵاواڕووتەی سەربە شارەدێی ئاغجەلەر، کەوتوونەتە بۆسەیەكی دوژمنەوە و بە ئازایەتی خۆیان رزگاریان بووە.
 ساڵی 1977 لە گوندی باوەفەتی كەوتوونەتە ناو گەمارۆیەكی توندی دوژمنەوە و لە كاتێكدا چواردەوریان گیرابوو، بەڵام توانیان خۆیان رزگاربكەن، هەمان ساڵ لە چیای هەیبەت سوڵتان رووبەڕووی هێزی قوات خاسە بوونەوە، هێزەكەی دوژمنیان تێكشكاند و زیانێكی زۆریشیان پێ گەیاندن، هەرلە ساڵی 1977دا تەقەی لە بەڕێوەبەری ئەوكاتی ناحیەی ئاغجەلەر كردووە.

پەیکەری شەهید حەمەغەفور

خەڵاتەكەی دوژمن
بێگومان ئەو جموجۆڵ و چالاكییە پێشمەرگەییانە بوونەتە هۆی ئەوەی لە ماوەی خەباتی چەكداریدا چوار جار بریندار ببێت، بەڵام هەرگیز كۆڵی نەداوە و هەمیشە بە گوڕوتینی زیاترەوە بەردەوام بووە، بەجۆرێك لای دوژمن بە (ئاوی ئاشی شۆڕش) ناسرابوو، كە بێگومان ئەمەش مانایەكی قووڵ و فراوانی هەیە، بەو هۆیەوە حكومەتی ئەوكاتی عیراق لە رێگەی (بەڕێوەبەری مەنزومەی شمالی)، هەموو توانایەكیان خستەگەڕ بۆئەوەی حەمەغەفوور واز لە پێشمەرگایەتی بهێنێت، بۆ ئەو مەبەستەش رێوشوێنی زۆریان گرتەبەر.
 ئەوە بوو وەزیرەخانی هاوسەری كە ئەوكات دووگیان بوو، لەگەڵ چوار منداڵەكەیدا دەستگیركران و بە چەند قۆناغێك رەوانەی شاری ( ناسریە)ی خوارووی عیراق كران، پاشان لەلایەن هەمان دەزگای بەعسەوە بڕیاردرا بڕی 60 هەزار دیناری چاپی ئەوكاتەی عیراقی بدرێت بە هەركەسێك كە حەمەغەفوور بكوژێت، یان بە زیندوویی دەستگیری بكات. بێگومان ئەو بڕیارە و پێدانی ئەو بڕەپارەیە كە بۆ ئەوكات زۆر زۆر بوو، جاش و خۆفرۆشانی هاندا کە بە پاڵپشتی و هاوكاریی دەسەڵاتدارانی ئەوكاتی حكومەتی عیراق پیلانی شەهیدكردنی دابڕێژن و بەردەوام دەبن بۆئەوەی دەرفەتێكیان بۆ بڕەخسێت و شەهیدی بكەن، بەڵگەش بۆ ئەوە، ئەوەیە كە مانگی سێی ساڵی 1977 حەمەغەفوور و هەڤاڵەكانی لە گوندی گەڕاو لە ماڵی (حاجی ئەحمەد) دەبن، بكوژەكانی لەو كاتەدا لەژێر ناوی پیرۆزی پێشمەرگەدا دەچنە لای حەمەغەفوور و چاویان بەیەكتری دەكەوێت، لەو بارەیەوە هەڤاڵ (ئیسماعیل عەبدوڵڵا مستەفا) دەڵێت: من لە ساڵی 1976دا كە زیندانی بووم لای رژێم، لە زینداندا هەر جارە و كەسێك دەبوو تەنەكەی خۆڵەكە بەرێتە دەرەوە و بەتاڵی بكات، كاتێك بۆ ئەو مەبەستە چوومە دەرەوە، هاوسەری یەكێك لە جاشەكانم بینی دەستگیركرابوو، كاتێك بەرپرسی شوێنەكە چاوی پێكەوت بە سەرسوڕمانەوە وتی: ئەمەتان بۆ هێناوە بۆ ئێرە؟! تەنانەت ناوی كەسەكەشی هێنا و وتی: سەربە خۆمانە و دووری بخەنەوە لێرە.
ئەو هەڤاڵە وتیشی: كاتێك ئازادكرام و بووم بە پێشمەرگە لای حەمەغەفوور، ئەوەبوو لە گوندی گەڕاو ئەو پۆلە جاشە لە ژێر ناوی پیرۆزی پێشمەرگەدا هاتنە لای حەمەغەفوور، منیش بابەتەكەم بۆ باسكرد و وتم: «دەرفەتێكی باشە بۆ لەناوبردنیان، پیاوی چاك بە با بیانكوژین؟» بەڵام حەمەغەفوور ناڕەزایی خۆی دەربڕی و لە وەڵامدا وتی: «كەس بۆی نییە تەقەیان لێبكات و رێگە بەكەسیش نادەم هیچیان بەرامبەر بكات، چونكە ئەمانە پێشمەرگەن و هیچیان لە ئێمە كەمتر نییە و رێگە بە خۆم نادەم كەسێك بكوژم كە وەك ئێمە پێشمەرگەیە».
هەر ئەو هەڤاڵەی شەهید حەمەغەفوور لە درێژەی قسەكانیدا، وتی: «شەهید حەمەغەفوور بەقسەی نەكردین، ئەو خەسڵەتەی باش نەبوو، قسە هەر قسەی خۆی بوو، لەگەڵ ئەوەشدا پیاوێك بوو سڵی لە هیچ شتێك نەدەكردەوە و لە مردن نە دەترسا.

شەهید حەمەغەفور و پۆلێک پێشمەرگە

ناپاكی لە پەنا دۆستایەتیدا
بەداخەوە، لە رێكەوتی 23/7/1977 لە (گوندی كانی بی)ی دەشتی كۆیە، دەستی رەشی خۆفرۆشان-یان گەیشتێ و تاقمێك خۆفرۆش لەژێر ناوی پیرۆزی پێشمەرگەدا دەچنە لایان، کەڵکی خراپ لە دۆستایەتی و نیەتی پاكی حەمەغەفوور و هاوڕێكانی وەردەگرن و دەیاندەنە بەر دەستڕێژی گوللە، لەئەنجامدا هەریەك لە: حەمەغەفوور ئاغجەلەری، ئەنوەر كەریم عەلی بەیانی، ئەحمەد محەمەد عەلی بەیانی، عەبدوڵڵا تۆفیق چیا سەوزی، حەمید عەزیز چەمچەماڵی، رەمەزان سەعید چەمچەماڵی، حامید مەلا ئەحمەد گۆپتەپەیی، سەعید عومەر گۆپتەپەیی، رەزا عومەر گۆپتەپەیی شەهید دەکرێن.
دوای ئەو كارەساتە، عەلی عەسكەری لە نامەیەكدا هەواڵی شەهیدبوونی حەمەغەفوور دەنێرێت بۆ خانەوادەكەی و دەڵێت: حەمەغەفوور شەهیدكرا، بەڕاستی پشتم پێی شكا، هیچ گوڕوتینم نەماوە. بەو شێوەیە كۆتایی بە ژیانی ئەو شۆڕشگێڕە هێنرا و مۆمی تەمەنی كوژایەوە و چووە ریزی شەهیدانی رێگەی رزگاری كورد و كوردستانەوە، دوای شەهیدبوونیشی جانتاكەی كەوتە دەستی دوژمن، بەڵام شەهید حەمەغەفوور زۆر لەوە بە ئاگاتربوو ناوی هەموو هەڤاڵەكانی كە سەربە رێكخستن بوون بە (كۆد) نووسیبوونی، بەو هۆیەوە نەتوانرا ناوی هیچ كەس بزانرێت و ئاشكراببێت. 
هاوڕێكانی چی دەڵێن؟
لێرەوە دەگەینە ئەو راستییەی كە شەهید حەمەغەفوور ئاغجەلەری تەنها هی بنەماڵەیەك و حزبێك نییە، بەڵكو هی نەتەوەیەكە بە گشتی و سنوورەكە بە تایبەتی، ئەو كوردایەتی كرد نەك حزبایەتی، ئەو لە دوو قۆناغ و لە دوو شۆڕشی جیادا كاروانی خەباتی درێژە پێدا و مێژوو و خەباتیشی وەك لە پێشتر ئاماژەی بۆكرا گەواهیدەری ئەو راستییەن. لەو بارەیەوە هەڤاڵ ئیسماعیل عەبدوڵڵا مستەفا ناسراو بە سالار بۆگدی) هاوڕێ و هاوخەباتی شەهید حەمەغەفوور، دەڵێت: حەمەغەفوور كەسێكی ئازاو لێهاتوو چاو نەترس بوو، هیچ كات سڵی لە دوژمن نەكردۆتەوە و لە مردن نەترساوە، لەگەڵ ئەوەش تەبایی و یەكڕیزی نێو ماڵی كوردی بەلاوە زۆر گرنگ بووە و ئەم هەڵوێستەش لە گوفتار و هەڵسوكەوتی بەدی دەكرا، ئەو كەسایەتییەكی رووخۆش و لێو بەخەندە و كۆمەڵایەتی داوێن پاك بوو.
كاتێك بێ جیاوازی رەنگەكان لە توێژینەوەیەكی فراواندا لە بارەی (شارەدێی ئاغجەلەر و گوندەكانی)، دەمانپرسی حەمەغەفوور ئاغجەلەری كێیە؟ بە هەناسەیەكی قووڵەوە دەوترا  (مرۆڤی وا دووبارە نابێتەوە!)، لەبەرئەوە بە پێویستی دەزانم كە خەبات و ماندوبوونی لە چوارچێوەی بنەماڵەیەك یان حزبێكدا بچووك نەكرێتەوە، چونكە ئەو موڵكی نەتەوەیەكە، بۆ مێژوو دەڵێم پێش ئەو توێژینەوەیە زۆر كات لە خۆمم دەپرسی ئەم شەهیدە زیاد لە سنووری خۆی گەورە كراوە و رەنگە لە ئاست ئەو هەموو پێدا هەڵدانە نەبێت، بەڵام دەركەوت لە راستیدا غەدری لێكراوە و وەك پێویست مێژووەكەی نەخراوەتە بەر دیدی خوێنەران، هەموو ئەمانە وایكرد دەست بدەمە پێنووس و كاغەزێك كە ئەم پوختەیەی مێژووی خەباتی بنووسمەوە، هەرچەندە دڵنیام حەقی خۆیم پێ نەداوە.
سڵاو بۆ گیانی پاكی ئەم شەهیدە و هاوڕێكانی و سەرجەم شەیدانی رێگەی رزگاری كورد و كوردستان. 

بۆ ئەم بابەتە سوود لەم سەرچاوانە وەرگیراوە:
1-كتێبی: ئاوی ئاشی شۆڕش، شەهیدی سەركردە حەمەغەفوور ئاغجەلەری.
ئامادەكردنی: سەركەوت حەمەغەفوور ئاغجەلەری
ساڵی چاپ: 2019، چاپی یەكەم، لە بڵاوكراوەكانی كوردستانی نوێ.
2-چاوپێكەوتنی توێژەر لەگەڵ ئیسماعیل عەبدوڵڵا مستەفا ناسراو بە سالار بۆگدی- كۆیە، رۆژی هەینی رێكەوتی 24/9/2021.
3-چاوپێكەوتنی توێژەر لەگەڵ عادل قادر عەبدوڵڵا، هاوڕێ و هاوخەباتی شەهید حەمەغەفوور ئاغجەلەری- ئاغجەلەر، رۆژی پێنجشەممە رێكەوتی 20/4/2023.