داود چیچه‌ك
ئەڤ چه‌ند رۆژن بانگه‌شه‌یا هەلبژارتنێ یا پارێزگار و ئەنجومه‌نێن پارێزگه‌هان ل عیراقێ ب گشتی ده‌ستپێ كریه، لێ یا كو بالا مرۆڤی دكشینه هه‌ڤركییا مه‌زن یا ڤێ بانگه‌شه‌یێ ل باژارێ كه‌ركوكێ برێڤه دچیت كو تێده (كورد و عە‌ره‌ب و توركمان) هه‌ڤركیه‌كه خورت دكەن ژ بۆ بده‌ست خستنا ئەركێ پارێزگارێ وی باژاڕی و ئەندامێن ئەنجومه‌نا پارێزگه‌هێ.
ب درێژاهیا دیرۆكێ پلان ل سه‌ر باژارێ كه‌ركوكێ به‌رده‌وام بوونه و دوژمنان هه‌ر خوه‌ستیه ناسنامه‌یا وێ بگوهه‌رن و وێ ژ كوردبوونێ و ژ كوردستانی بوونا وێ دویرخن. لێ كوردێن باژاڕێ كه‌ركوكێ هەر ل به‌رخوه دانە و رێ نه‌دانە دوژمنان و نه‌حه‌زان ناسنامه‌یا وان بێ گوهه‌رتن، ئەو ژی ب سایا سه‌رێ ره‌وشه‌نبیر و وێژه‌ڤان و هه‌لبه‌ستڤان و شۆڕه‌شگه‌ڕێن شۆڕه‌شا نوو یا یه‌كێتیی نیشتمانییا كوردستانێ ئەو باژاڕێ دیرۆكی ژ ته‌عریبێ و ته‌تریكێ هاتیه پاراستن و هه‌تا رۆژا ئیرۆ ئەو باژاڕ ل به‌رخوه دده و كوردبوونا خوه دپارێزه.
هه‌ر چقاس ئەز ب خوه خه‌لكێ باژاڕێ عە‌فرینێ یێ رۆژئاڤایێ كوردستانێ مه و ئیرۆ عە‌فرینا مه د بن داگیركه‌ریێدا یه و ب ته‌عریبێ و ته‌تریكێ ره رووبڕوویه، لێ ئەز ب جۆشا بانگه‌شه‌یا هەلبژارتنێ و روحێ كوردبوونێ یا خه‌لكێ كه‌ركوكێ یا كو حزبا ره‌وانشاد سەرۆک مام جه‌لال تاله‌بانی (یه‌كێتیی نیشتمانیی یا كوردستانێ) ب سه‌رۆكاتیا كوڕێ وی بافل جه‌لال تاڵه‌بانی تێ مه‌شاندن، بڕاستی جۆشه‌كێ دده من ژی و هه‌موو كوردێن هه‌ر چار پارچه‌یێن كوردستانێ د وێ باوه‌ریێدانه كو كه‌ركوك وێ ل هه‌مبه‌ر هه‌موو هێرش و پلانێن دوژمنان و نه‌حه‌زان وێ ب سه‌ركه‌ڤه.
هه‌روه‌ها ئەز د وێ باوه‌ڕیێ دا‌مه ژی كو پشتی سەرکەفتنا کورد لە کەرکوکێ هێڤی و باوەریا گەلێ کورد وێ بهێزتر بیت کو عە‌فرین و سه‌رێكانیێ و هەموو دەڤەرێن کوردستانێ یێن داگیرکری ژی وێ ڤه‌گه‌رن حه‌مبێزا گه‌لێ كورد و دێ بگهێن ئازادیێ.
ب دیتنا من ب سه‌ركه‌فتنا كه‌ركوكێ و هەلبژارتنا پارێزگارێکی کورد ژ لیستا یەکێتییا نیشتیمانییا کوردستانێ، كوردستانیبوونا كه‌ركوكێ وێ بهێتە پاراستنێ، هه‌روه‌ها وه‌ك ره‌وانشاد سه‌رۆك مام جه‌لال گۆتبوو، «كه‌ركوك قودسا كوردستانێ یە» واته چاوا فەلەستین بێ قودس نابه فەلەستین، هه‌روسا ژی كوردستان بێ كه‌ركوك نابتە كوردستان.
دڤێ ئەم هه‌موو كورد پشته‌ڤانیا خه‌لكێ كه‌ركوكێ بكەن داكو بسه‌ركه‌ڤن و بگهێنە ئیرادە و ڤینا خوە. هه‌روه‌ها بافل جه‌لال تاله‌بانی سه‌رۆكێ یەکێتی ژی ته‌كی‌ز ل وێ یه‌كێ دكه و دبێژه: «مه كه‌ركوك د دلێ خوه ده هەڵگرتیه و خه‌تا سۆره ل با مه، و چاوا مه كه‌ركوك ژ داعشێ پاراست ڤێ جارێ ژی ئەمێ ب ده‌نگدانێ كه‌ركوكێ ژ ته‌عریبێ بپارێزین».
كه‌ركوكێ گه‌له‌ك قوربانی دان، هه‌تاكو كوردبوونا خوه پاراستن و هه‌یا رۆژا ئیرۆ ژی دده ل هه‌مبه‌ر زه‌ڤتكرنا ئەرد و زه‌ڤیێن وان کو دخوازن ژ كوردستانیبوونێ وێ دوورخینن، هه‌ر چه‌ندێ كورد ب براتیێ و پێكڤه‌ژیانێ بانگ دكەن لێ شۆڤینیست وێ یه‌كێ ره‌د دكەن.
ئیرۆ خەلکێ کەرکوکێ ب ده‌نگێ خوه و چووینا سه‌ر سندۆقێن ده‌نگدانێ و ب ئاوایه‌كی د‌یمۆكراتی ئەوێ بسه‌ر بكه‌ڤن و دێ كه‌ركوكێ ڤه‌گه‌رینن حه‌مبێزا کورد و كوردستانێ.
