راگەیەندراوی کۆتایی یە‌كە‌م دیداری ساڵانەی یەکێتی

10:39 - 2022-05-31
کوردستان
192 جار خوێندراوەتەوە

بەبۆنەی کۆتایی هاتنی دیداری یەکێتی، لیژنەی باڵا راگەیەندراوێکی بڵاوکردەوە کە ئەمەی خوارەوە دەقەکەیەتی:

ھەڤاڵان سڵاوی کۆتایی ھاتن و سەرکەوتنی دیداری یەکێتیتان لێبێت.

 ئەگەر ساڵان بۆ یادی دامەزراندنی یەکێتی تەنها ئاهەنگمان دەگێڕا و یادی شەهیدان و مامی رێبەرمان  دەکردەوە، ئەوە ئەمساڵ جیاوازتر پێشوازیمان لە یادی دامەزراندنی حزبە تێکۆشەرەکەمان کردەوە.

چ ئاهەنگێک لەوە خۆشتر و جوانتر و باشترە کە لەڕێگەی دیداری یەکێتییەوە بڕیاری پێداچوونەوە بە سیاسەت و داڕشتنەوەی رۆئیا و پلانی نوێ و گونجاو لەگەڵ ویست و داواکاریی کۆمەڵانی خەڵکی کوردستانمان داوە. 

چ یادکردنەوەیەکی شەهیدەکانمان لەوە شایستەترە کە بریارمانداوە دیداری یەکێتی بۆ پێداچوونەوە بە سیاسەت و هەڵوێست و داڕشتنەوەی دید و روئیامان بکەینە نەریتێکی ساڵانە بۆ ئەوەی یەکێتی وەک هەمیشە پێشڕەوی  نوێگەری بێت لە کوردستان. 

هەروەها چ رێزلێگرتنێک لە کادر و تێکۆشەرە دێرین و نوێیەکانمان لەوە راستگۆ و بەنرخترە کە لە دیداری یەکێتیدا راستەوخۆ بەشداردەبن لە دیاریکردنی سیاسەت و هەڵوێستی حزبەکەیان.

 پێمانوایە کۆتاییهاتنی سەرکەوتووانەی دیدار و چەسپاندنی دیدار وەک نەریتێکی ساڵانە نوێکردنەوەی راستەقینەی یەکێتییە و بەمەش لە لایەکەوە جەژنی  ئەمساڵمان بووە بە دوو جەژن و لەلایەکیتریشەوە بەم خۆنوێکردنەوەیە بە باشترین شێوە یادی دامەزراندنی حزبەکەمان و یادی ئەو تێکۆشەرانەمان کردۆتەوە کە گیانی شیرینی خۆیان لەپێناو ئامانجەکانی یەکێتی بەخشی، یان بە یەکێتییەوە ماندووبوون و رەنجیان بۆ کێشاوە.  

ھەڤاڵان دەمێک ساڵ بوو یەکێتی پێویستی بەوەبوو لە دەرەوەی دروشم خۆی نوێ بکاتەوە، دەمێک ساڵ بوو پێویستی بەوەبوو بۆ داڕشتنەوەی سیاسەت و روئیا بگەڕێتەوە بۆ ناو کادر و تێکۆشەرەکانی خۆی و بەشدارییان پێبکات، ئەمساڵ  لەم دیدارە رەسمییە بەسەرپەرشتی ھەڤاڵ قوباد تاڵەبانی، ئەم هەنگاوە گرنگەمان دەست پێکرد.

ئەمساڵ بە کردار سەلماندمان کە یەکێتی حزبی کادرانە و رۆڵی کادران لەمەودوا لەناو حیزبدا زیاتریش دەبێت. 

 کاتێک حزبێک دەبێتە حزبی کادران و بە هەزاران کادر لە شار و ناوچەی جیاوازەوە بەشدار دەبن لە دانانی سیاسەتی حیزبدا، بەدڵنیاییەوە ئەو حزبە دەبێتەوە بەحزبی کۆمەڵانی خەڵکیش، چونکە کادرانی یەکێتی هەڵقوڵاوی ناو جەماوەرن و هەڵگری خواست و داواکاری خەڵکن.

یەکێتی کە لەسەر بنەمای دوو چەمکی کوردایەتی و دادپەروەری کۆمەڵایەتی دامەرزاوە، لەمەودوا هەردوو بنەماکە لە خۆیدا بەهێزتر دەکات. لەم قۆناغەدا کە وڵاتەکەمان بە دەست کێشەی دادپەروەری کۆمەڵایەتییەوە دەناڵێنێت، بۆ لەمەودوا یەکێتی لە هەموو سیاسەت و هەڵوێستەکانیدا پرسی دادپەروەری کۆمەڵایەتی بەبنەما دەگرێت و پەرەی پێدەدات.

سەبارەت بە پرسی حکومڕانیش، وەک سەرۆک بافڵ جەلال تاڵەبانی رایگەیاند، پێشتر کەموکوڕی زۆرمان هەبووە و هەڵەی گەورە کراوە، بەڵام چیتر یەکێتی نەک هەر رێگە بە دووبارەبوونەوەی ئەم هەڵانە نادات، بەڵکو یەکێتی لەسەر هەردوو ئاستی کوردستان و عیراقیش دەبێتە حزبی پێشەنگ بۆ راستکردنەوەی رێڕەوەی حکومڕانی و بونیادنانی حکومڕانیی تەندروست. 

حکومڕانی تەندروست لە روانگەی ئێمەوە تەنها حکومڕانییەکی شەفاف و دەستپاک نییە، بەڵکو حکومڕانییەکی زانستیشە، بەو واتایەی نابێت بەپێی حەز و باوەڕی تاکەکەسی هیچ هەنگاوێک بهاوێژرێت، بەڵکو هەر پلان و سیاسەتێک پێشتر دەبێت لەرووی زانستییەوە لەلایەن خەڵکی پسپۆڕ و ئاکادیمییەوە داڕێژرابێت و لە ئەنجامەکەی تا رادەیەکی زۆر دڵنیابین، بۆ ئەوەی چیتر ژیانی خەڵک بەهۆی هەڵەی حکومڕانییەوە نەکەوێتە مەترسییەوە.

لە کۆتاییدا جارێکیتر یادی دامەزراندنی یەکێتی و کۆتاییهاتنی سەرکەوتووانەی دیداری یەکێتی لە هەموو هەڤاڵان و جەماوەری یەکێتی پیرۆز دەکەین و دەستی ھەموو ھەڤاڵانی یەکێتیی بەگەرمی دەگوشین و پێیان دەڵێین دەستتان خۆش و ماندوو نەبن و سوپاس بۆ ھەمووتان 
پێکەوە بەرەو جێبەجێکردنی راسپاردەکانی دیدار، دوای پەسەندکردنی لە ئەنجومەنی سەرکردایەتی، و گەشانەوەی بەردەوام و تاسەری یەکێتییە تێکۆشەرەکەتان.

دیدارتان باش و ھەمیشە سەرفراز بن 
لیژنەی باڵای دیداری یەکێتی
2022/5/31

#دیداری یەکێتی

بابەتە پەیوەندیدارەکان