ئەحمەد نەبەز - رێکخەری پرۆژە
هونه‌رمه‌ندانی به‌شدار بوو:
ئـازاد نـانـه‌كه‌لی - ئـازاد كـەریم - ئەحـمـەد نـەبـەز
ساکار سلێمان - سارا نیروبه‌خش - سه‌ما ئه‌لشیبی
هـاڤـین ســندی - وه‌لـید ســیتی - یونس محەمەد
هـه‌ولێر- گه‌له‌ری جـیـهـان
یەک شەم 15/5/2022 تا 15/6/2022
كاتژمێرەکانی کردنەوە 4 هه‌تا 8ی ئێواره
ڕۆژانی دواتر 9ی بەیـانی بۆ 6ی ئێوارە بەردەوامە.
لەم پڕۆژەیە هونەرمەندانی کورد، عەرەب، فارس، بەشدارن. پڕۆژەکە لەلایەن گەلەری جیهان و پەیمانگەی گۆتەی عێراق پشتگیری کراوە.
كۆچ پەیوەندی پچڕاوی مرۆڤە بە شوێنەوەو لەهەمانكاتدا جۆرێك لە یاخیبوونی بە ئاگا یا بێ ئاگا، لەخۆدەگرێت بەرامبەر ژیان و ژیاریی نیشتیمانەكەی. هەندێجار مرۆڤ گەر لە نیشتیمانێك بێ ماڵ بێت، هەست بە ناشوێنی پێگەی ژیانی خۆی دەكات، گەر لە ماڵ و شوێنێكیش بێت دوور لە نیشتیمانی خۆی، هەر هەمان هەستكردن بە ناشوێنی تیا ئامادە دەبێتەوە. بۆیە كۆچبەر هەڵگری ناسنامەیەكی دوو دیووە، كە لە هەردوو دیوەكەیدا نامۆ و بێگانە خۆی دەبینێت.
تاكی ڕۆژهەڵاتیی بەگشتی و تاكی كورد بەتایبەتی، خاوەن مێژووییەكی دێرینن لەگەڵ پرسی كۆچ و ناجێگیری، ئەویش بەهۆی هەژمونی جەنگ و نەهامەتی و لێكەوتەكانییەوە، ئەمە وێڕای ململانێی سیاسی و ئاینی، كە هۆكارن بۆ نەبوونی ئومێدی گۆڕانكاریی و پێشكەوتن و كەمی دەرفەتی كار و لەباربردنی ژینگەی دەرخستنی تواناكان و ئەو دۆخە چەقبەستوەی كە لە ڕۆژهەڵاتی ناوەڕاستدا بەرپایە، هەموو ئەمانە وایانكردووە تاكی ئەم ناوچەیە هەستی ئارامی تیا وون بێت و لەخاكی خۆی هەڵبێت، دەرئەنجام لێشاوێك لە كۆچبەر دروست ببێت لە هەموو ئاست و چین و توێژ و تەمەنێكدا، هەڵوێستی خۆیان بە جووڵەی كۆچكردنیان بخەنەڕوو، لەم بارەیەوە نووسەری دیاری کورد بەختیار عەلی دەڵێت: “كۆچ تێكستێكە مرۆڤی ئێمە لەبری دەست بە قاچ دەینووسێت.
بەهۆی دووباره‌بونه‌وه‌ی بەردەوامی و کۆچکردنەوە، ئێمە کۆمەڵێک هونەرمەندی هاوچەرخین کە لە ڕوانگەی ئەخلاقی و مرۆییەوە مامەڵە لەگەڵ ئه‌م پرسه دەکەین، لە ڕێگەی ئه‌زموونه هونەرییەکانمانەوە کاردەکەین بۆ ئەوەی لە ڕوانگەی جیاوازەوە چەمکی کۆچکردن چارەسەر بکەین، لە ناوخۆوە دەست پێدەکەین بۆ نه‌خشه‌یه‌كی گه‌وره‌تر كه زۆر سنوور دەبەزێنێت و زۆربەی دانیشتوانی ئەم هەسارەیە دەگرێتەوە، بۆ هەموو ئه‌و مرۆڤانه‌ی كه بەدوای خەونێکدا دەگەڕێن بۆ ئەوەی شوێنی پارێزراویان هەبێت.
هیترۆتۆپیا” وەک پڕۆژەیەکی هونەریی دەبێتە پانتاییەكی مەعنەوی و مەعریفی بۆ باسکردنی پرسی كۆچبەرە بێ شوێنەكان كە تیایدا سەرجەم هونەرمەندان ماڵێكیان بۆ نیشتەجێكردنی بیرۆكەكانیان بونیاد ناوە، هەریەك لەوێوە باس لەو ناشوێنی و نامۆبوونە دەكات لەنێوان دوو شوێن و دوو نیشتیمانی كەرتبوودا ڕوودەدات، كە زۆربەی كات كۆچبەران لەنێوان هەردووكیاندا بە هەڵواسراوی لە بۆشایی سێیەم دەمێننەوە، كە بە واتایەكی تر ئێمە بەوە ناوزەدی ئەكەین كە لە “هیترۆتۆپیا”یەكدا دەژین.
كارە هەڵبژێردراوەكانی ئەم پڕۆژە هونەرییە، خۆی لەسەر بیرۆكەی بەڕێوەبردنی سیاسی و ئاینی و كلتوری و ئاوارەبوونی كۆمەڵایەتی و سڕینەوەی ناسنامە و لێكەوتەكانی جەنگ و یاخیبوونی تاكە كەسی و بەرهەڵستی كۆمەڵگە بنیاتناوە، كە لە ڕوانگەی هونەریانەی ئێمەوە ئەمانە هۆكاری پشت دیاردەی كۆچكردنن.
هونەرمەندانی بەشداربوو زمانێكی جیاوازیان بۆ پەیوەندیكردن بە چەمكی “هیترۆتۆپیا” هەڵبژاردووە، بەجۆرێك كە لەگەڵ كەسایەتی، سەردەم، ناوەرۆك، هەروەها پەیامی پڕۆژەكە بگونجێت. بۆیە جیاوازی لە شێوازو زمانەكاندا ڕەنگدانەوەی جیاوازی بیرو بۆچوون و تێگەیشتن و ئەزموونە تایبەتییەكانی هەر یەك لە ئێمەیە. كە لەڕێگەی پیشاندانی كارە هونەرییەكانەوە بە میدیۆمی نیگاركێشان، ئینستڵەیشن، ڤیدیۆ، فۆتۆ، هەروەها ئۆبجێكت و كەرەستە دیجیتاڵیەكان، ئەزموونە بەرجەستەكراوەكانی خۆمان دەگوازینەوە، تا بەشداری لەو نەهامەتی و ئازارەدا بكەین كە تاكی كۆچكردووی كۆمەڵگەكەمان پیاگوزەر دەكات، لەهەمانكاتدا ڕەخنەیەک بونیاد دەنێین لەهەمبەر هەڵواسراویی ڕەوشی كۆچبەران و بەڕوخستنی ڕای گشتی دەربارەی ئەم پرسە.
شایەنی باسە بەشێك لە هونەرمەندانی بەشداربوو خودی خۆیان ئەزموونی كۆچیان كردووەو كارەكەیان تێكهەڵكێشی ئەو ئەزموونەیە كە بینیوویەتی “.
هیترۆتۆپیا، چەمكێكە بۆیەكەمجار لەلایەن فەیلەسوف “میشێل فۆكۆ”وە داهێنراوە لە ساڵی 1967 لە گفتۆگۆیەكدا لەگەڵ كۆمەڵەی تەلارسازان وەك جۆرێكی نوێی بۆشایی دەیناسێنێت. كە مانای “شوێنێكی تر”ە كە دەكەوێتە نێوان دوو فەزا، كە ئەوانیش بریتین لە “یۆتۆپیا” شوێنێكە كە هەموو شتێك تیا نموونەیی و جوانە، هەروەها “دیستۆپیا” شوێنێكە پڕمەینەت و دۆزەخییە.
“هێترۆتۆپیا” ئەو شوێنەیە كە دەکەوێتە نێوان هەردووكیان، كە زۆرجار پێشی دەوترێت بۆشایی سێهەم.
