گفتوگۆی دیداری یەكێتی لەگەڵ سەرۆكی یەكێتیی نیشتمانیی كوردستان

بافڵ جەلال تاڵەبانی: دەبێت وەک مام جەلال ئیش بكەین

لە دەستپێكی (دیداری یەكێتی)، گفتوگۆیەكی كراوە بە ئامادەبوونی ئەندامان و بەشدارانی دیدار لەگەڵ بافڵ جەلال تاڵەبانی سەرۆكی یەكێتیی نیشتمانیی كوردستان بەڕێوەچوو. كە تێیدا وەڵامی چەندین پرسیاری دایەوە كە لەلایەن ئەندامانەوە ئاراستەی سەرۆك بافڵ كرابوو، ئەمەی خوارەوە دەقی گفتوگۆكەیە:

*لەم دەرفەتەدا سەرۆك بافڵ، داوایان لێكردووم تۆزێك لەدەرەوەی دیپلۆماسییەت پرسیارت لێبكەم، بۆیە ئەگەر هەندێ لە پرسیارەكانم دیپلۆماسی نەبوون دەبێت بەلاتەوە ئاسایی بێت؟
بافڵ جەلال تاڵەبانی: زۆر ئاساییە منیش هەر بەنیازبووم وەڵامەكانم تۆزێك دووربێت لەدیپلۆماسی.. ئێمە لەگەڵ خوشك و برایانی خۆمان دانیشتووین و پێم باشە، زۆر بەڕوونی قسەیان لەگەڵ بكەین.
*دەڵین وازت لەوەرزش هێناوە، لەبەر ئەوەی لە رۆژێكدا 12 كۆبوونەوە دەكەیت، دوو كۆبوونەوەی مەكتەبی سیاسیی و كۆبوونەوەیەكی كارگێڕ لەبەغدا، سێ كۆبوونەوە لەهەولێر، دوو كۆبوونەوەی تر، بەڕاستی وازت لەوەرزش هێناوە؟ 

بافڵ جەلال تاڵەبانی: چاوەڕێی زۆر پرسیارم دەكرد، چاوەڕێی ئەم پرسیارەم نەدەكرد، پێموایە بە پرسیاریی ئاسان دەست پێدەكەیت دواتر قورستر دەبێت، جارێ 12 كۆبوونەوە كەمە، دڵخۆشم لە رۆژێكدا 12 كۆبوونەوە بكەین، جەنابیشت ئاگات لەوە هەیە.
بەڵێ وازم لەوەرزش هێناوە، زیاتر لەساڵێكە وەرزش ناكەم، لەبەر چەند هۆكارێك، یەكەم، دوای رووداوەكانی 8ی مانگ، دڵم تۆزێك عەزێتی بوو، پێویستم بە ئیسراحەت بوو، دوای ئەوەش خراپ كەوتم، ماسولكەیەكی قۆڵم دڕا، دوای نەشتەرگەری باشتربووم، سوپاستان دەكەم، كە نیگەرانی تەندروستی منن، ئێستا تەندروستیم زۆر زۆرباشە، هیچ كێشەی نییە، دەستیش دەكەمەوە بەوەرزش و بەڵێنتان پێ دەدەم، تا 19ی 2ی رۆژی لەدایكبوونم، 200 كیلۆ دێدلیفت دەكەم و دەیخەمە سەر ئینتەرنێت.
بافڵ جەلال تاڵەبانی: ئەمڕۆ دیداری یەكێتییە، پاش سێ رۆژی تر ساڵیادی دامەزراندنی یەكێتیی نیشتمانیی كوردستانە، یەكێتی بە سێ چوار رۆژی زۆر گرنگی دووبارە نوێبوونەوەی خۆیدا تێدەپەڕێنێت، وەكو كاك قوبادیش ئاماژەی پێكرد، وتی تەواوكارییەكانی كۆنگرە لەم دیداری یەكێتییە جێبەجێ دەكرێت، لەكۆنگرەشدا هەندێ كێشە چارەسەر بوو، هەندێ كێشەی تر دروستبوون، دەمەوێت پرسیاری ئەوە بكەم، كۆنگرە بۆ نەیتوانی هەموو ئەو گۆڕانكارییانەی كە پێویست بوو بیكات؟، ئەگەر كۆنگرە كاروبارەكانی بەباشی جێبەجێكرد ئەی بۆ پێویستمان بە دیداری یەكێتی بوو؟

45 ملیۆن كورد هەیە لە جیهاندا دەبێت ئێمە خۆمان بكەین بە خاوەنی هەموویان، كە بووین بەخاوەنی 45 ملیۆن كورد، هیچ وڵاتێك ناتوانێت بەكوردستان و بەكورد بڵێت نا

بۆچوونم هەمان بۆچوونی كاك قوبادە، بەڵێ ئەم دیدارە دەبێت بە تەواوكاری كۆنگرە بەڵام بۆچوونم تۆزێك جیاوازە، خۆتان دەزانن كۆنگرە دەمێك ساڵ بوو نەكرابوو، واقیعیش نەبوو ئێمە تەسوەر بكەین، بە كۆنگرەیەك هەموو كێشەكانی یەكێتیی نیشتمانیی كوردستان چارەسەر دەبێت، باشترین و مەزبوترین و رێكوپێكتری بكردایە، من پێموایە هەر پێویستمان بەم دیدارە دەبوو، زۆر دەمێكە پێكەوە دانەنیشتووین و پرسیارمان لەخۆمان نەكردووە بۆ ئەوەی بزانین بۆ هەرێمی كوردستان وایە، بۆ عیراق وایە، بۆ پارچەكانی تری كوردستان وان، سیاسەتی ئێمە بۆ ئەم كێشانە چی بێت، لەبەر ئەوە من دەستخۆشی لەهەموو ئەو هەڤاڵانە دەكەم، كە ئەم دیدارەیان رێكخستووە و ئەوانەی بەشداری دیدارەكەشیان كردووە، چونكە دەبوایە ئەم پرسیارانە لەخۆمانی بكەین؟

*لەكاتێكدا دیداری یەكێتی دەكرێت،  كۆنفرانس بكرێت كۆبوونەوە بكرێت، هەر شتێك بۆ نوێبوونەوەی یەكێتی بكرێت، هەندێجار هەندێ گومان و ترس دروست دەكات لەدڵی ئەو كادرانەی ساڵانێكی زۆرە كە خزمەت دەكەن، هەندێكیان وا پێناسەی دەكەن كە یەكێتی لەم جۆرە دیدارو كۆبوونەوەو رێكخستنەوەی هەیكەلی كارە لەوە دەچێت ئەوان پشتگوێ بخرێن، ئایە بەراستی سیاسەتێك هەیە بەناوی پشتگوێخستنی ئەو كادرانەی كە خاوەنی ئەزموونێكی زۆرن، با راستیش بڵێین وەكو سەركردایەتیەكانمان وەكو مەكتەب سیاسییەكانمان، دواتریش بۆ ئەو كادرانەی لەناو مەڵبەندو كۆمیتەكاندا هەن؟
-بافڵ جەلال تاڵەبانی: ئەگەر كادرە بەتەجروبەكانمان وابیر دەكەنەوە، ئەوە هەڵەی ئێمەیە، كە نەمانتوانیوە تێیان بگەیەنین، چەند رێزیان لێدەگرین، چەند پێویستمان بە تەجروبەكەیانە، چەندیش خۆشەویستن لەلای ئێمە، كە باسی یەكێتی دەكرێت زۆرجار گوێم لێ دەبێت، یەكێتی تازە و یەكێتی تازە، من بەراستی حەزم لەوە نییە، یەكێتی با ببێتەوە بە یەكێتییەكەی مام جەلال با ببێتەوە بە یەكێتی ئێمە، من پێموایە پێویستمان بەوەیە كە كۆمەڵێك لایەنی یەكێتی تازە بكەینەوە، بەڵام شان بە شان كادرە كۆن و بەتەجروبەكانمان، پێموایە بەیەكەوە دەتوانین ئەم حزبە زیاتر ببەینە پێشەوە، كە خۆی هەر بەرەو پێش چووە؟
*باسی خوێنی تازەت كرد، لە ماوەی مانگی رابردوودا، كۆمەڵێك كۆبوونەوە و دیدارت هەبوو لەگەڵ گەنجان ئیتر لەگەڵ زانكۆ و پەیمانگاكان بووبێت یان كاسبكاری ناو بازاڕ، بە راستی چۆن خوێندنەوە بۆ ئەو گەنجانە دەكەیت، كە ئەمڕۆ جەنابتان دەبینن و حەزێكت هەیە بۆ ئەوەی ئەم گەنجانە لەیەكێتی نزیك ببنەوە، چۆن یەكێتی دەتوانێت هاوكاریان بێت، لەحزبەكە و لەدەرەوەی حزبەكە هاوسۆزبن لەگەڵ ئەم حزبە بۆ بەرەو پێشەوە؟
-بافڵ جەلال تاڵەبانی: هەڤاڵان وابزانم هەر خۆم سی و یەك سەعات و نیو دانیشتنم لەگەڵ گەنجەكانی كوردستان كردووە بە گشتی نەك هەر گەنجەكانی سلێمانی، بەراستی یەكەمجار كە دانیشتم لەگەڵیان پرسیارەكەم بۆ ئەوان ئەوەبوو، بۆ خۆپیشاندان ئەكەن، بەڵام دوای یەكەم كۆبوونەوە پرسیارەكەم گۆڕی، پێویستی كرد بڵێم، بۆ خۆپیشاندانتان نەكردووە تاكو ئێستا،  بەو خوایە من ئەو رۆژانەی كە دانیشتبووم لەگەڵ ئەو خوێندكارانە شەرمم دەكرد كە ئێمە لە حكومەتێكین كە توانیویەتی بەمجۆرە ئەم گەنجانە پەراوێزبخات، كە دانیشتم لەگەڵیان زۆر زوو تێگەیشتم كە ئێمە زۆر شت هەیە كە دەتوانین لێیانەوە فێرببین، زۆر زیرەك و بەتوانان، بەڵام بەداخەوە خەریكە بی هیوا دەبن، ئێمە دەبێـت هیوایان پێ ببەخشینەوە، ئەم گەنجانە ئەم حزبە بۆ پێشەوە دەبەن،  ئەم گەنجانە ئەم وڵاتە بۆ پێشەوە دەبەن، كە من ئەم گەنجانەم بینی زۆر زوو تێگەیشتم، ئەوەی ئێمە هەمانە نە نەوتە نە  غازە ئەوەی ئێمە هەمانە ئەم گەنجانەن، ئێمە ئەبێت رێگا ئاسان بكەین بۆ ئەم گەنجانە، بێنە ناو حزبەكەمان و بێنە ناو حكومەتەوە هاوكارمان بن چونكە دڵنیابن ئەم نەوەیە، شتێكی زۆر عەجایبن من كە دانیشتم لەگەڵیان زۆر شت فێربووم، لەبەر ئەوە داوا ئەكەم لەگەنجان كە متمانەیان بەخۆیان هەبێت، ئەوان دەریانخستووە كە دەتوانن شت بگۆڕن،  بەڵام نابێـت گەنجان بەوە رازی بن، من حەز ئەكەم گەنجان بێنە ناو یەكێتیی نیشتمانیی كوردستان یان هەر حزبێك كە خۆیان قەناعەتیان پێی هەیە، چونكە بەو جۆرە دەتوانن وەزعەكە بگۆڕن، نموونەیەكتان بۆ باس ئەكەم زۆرجار، ئەڵێن ئێوە ئەگەر ئەوەنە ناڕازین لەم حكومەتە وەكو یەكێتی بۆ لەم حكومەتە دەرناچن، ئێمە گلەییمان هەیە لەحكومەت بەڵام لەناوەوە ئەتوانیت شتەكان چاك بكەیت نەك لەدەرەوە، بۆیە داوا لەگەنجان ئەكەم با بێنە ناو كۆمەڵەی خوێندكارانەوە چونكە ئێمە بەرنامەیەكی تازەمان هەیە بۆ ئەو رێكخراوە بە جۆرێكی تازە زیندووی ئەكەینەوە، برۆنە مەڵبەندو كۆمیتەكانمان گفتوگۆ لەگەڵ برادەرەكانتان بكەن لەناو یەكێتی انشالله ئەتوانین قەناعەت بەیەكتری بكەین كە بەیەكەوە وەزعی كوردستان و بەتایبەتی وەزعی گەنجان و ژنان باش بكەین.
*ئێمە مەبەستمان تەنها ئەو كچ و كوڕانەی ناو زانكۆ نییە، هەموو ئەوانەی لە ئافرەتان و لەژنان ئەیانەوێ نزیك بنەوە لەیەكێتی، هەروەكو بەرچاوروونیەك بۆ ئەو بەرێزانە، لێرە پرسیارێكی تر دێتە پێشەوە، تا رادەیەك ئەچینە دەرەوەی ناوخۆی حزبەكە، ئەویش ئەوەیە زۆر دەمێكە یەكێـتی لەبەرەیەك نەبووە و ئۆپۆزسیۆن و حزبەكانی تر كە لەناو حكومەتدا نیین وەكو یەكێتی، بەیەكەوە بن، حزبێكی تر لەوبەر بێت لەسەر یەك مەسەلە كە پێی دەوترێت هەڵبژاردن و رێكخستنەوەی كۆمسیۆن، ئەمە شتێكی دژە باوە؟ ئەم شتە چاوەڕوانكراوبوو، یان بۆ ئەكرێت حزبە ئۆپۆزسیۆنەكان لەگەڵ یەكێتیدا هاوڕابن، چی گەیاندنی بەو قەناعەتە؟
-بافڵ جەلال تاڵەبانی: ئەمە زۆر روونە لای من، بۆ بارودۆخەكە وایە، من پێموایە زۆربەی خەڵكی كوردستان هەموو حزبەكان بێجگە لە یەك دوو حزب كە رەنگە رازی نەبن، بەجۆری حوكمڕانی لەو وڵاتە، با راستگۆبین لەگەڵ یەكتر، ئێمە وەكو یەكێتی ئەمڕۆ سیاسەتی خۆمان هەیە، پاشكۆی هیچ لایەنێك و هیچ وڵاتێك نابین، ئێمە سیاسەتی خۆمان هەیە، دۆستەكانمان بەجێناهێڵین، زۆر دانیشتنی جددیمان كردووە، لەگەڵ هەموو حزبەكان بەپارتی دیموكراتی كوردستانیشەوە، توانیمانە تێبگەین، كێشەكانمان لەم هەڵبژاردنە چییە، خۆشبەختانە زۆربەی حزبەكانیش بۆچوونیان وەكو ئێمەیە، رەنگە زووبێت بڵێین لەگەڵ ئێمەن، من داوا لەو حزبانە ئەكەم تێبگەن لەیەكێتی، ئێمە بەجددیمانە دەمانەوێت خزمەتی ئەم وڵاتە بكەین ئێمە دەزانین، لەبەر كێشەكانی ناوخۆمان هەڵەمان هەبووە وەكو پێویست بۆ هەندێ مەسەلە ئیشمان نەكردووە، بەڵام دڵنیابن یەكێـتی ئەمڕۆ ئەو یەكێتییەیە كە دێت ئیشی خۆی دەكات بۆ خەڵكی ئەم وڵاتە، ئینجا بۆ حزبەكەی خۆی، بۆیە داوا لەو حزبانە دەكەم ئەگەر بەم حوكمڕانییە رازی نین وەرن با چەترێك دروستبكەین بەیەكەوە ئیشێكی وا بكەین كە لەم هەڵبژاردنە بتوانین گۆڕانكارییەكی راستەقینە بكەین  لە حوكمڕانی كوردستان.
*باسی هەڵبژاردنم كرد، كۆبوونەوەیەكتان كرد لەگەڵ جێنی بلاسخارتی نێردەی نەتەوە یەكگرتووەكان بۆ عیراق، تاڕادەیەك ناوەڕۆكی كۆبوونەوەكە نەگەیشت بە هاووڵاتیانی هەرێمی كوردستان، چی گوزەرا لەو كۆبوونەوەیە؟
-بافڵ جەلال تاڵەبانی: ئەوەی من تێگەیشتم لەو كۆبوونەوەیە، دوو سێ شت بوو، یەكەمیان نەتەوە یەكگرتووەكان زۆر نیگەران بوو لەوەی لایەنە كوردییەكان لەگەڵ یەكتری قسە ناكەن، ئەوەی من تێگەیشتم بەبیانووی هەڵبژاردن ئێمەیان كۆكردەوە، لەبەر ئەوەی بزانن ئەوە چەند خراپە، ئێمە پێویستمان بە نەتەوە یەكگرتووەكانە كە بێن كورد پێكەوە كۆبكەنەوە! بەڵام كە دانیشتین و قسەمان كرد، باسی كێشەكانی هەڵبژاردنمان كرد، مەسەلەی كۆمسیۆن و بازنەكان و یاسا و دابەشكردنی كورسییەكان بوو، هەروەها كۆتای كەمینەكان، لەگەڵ چەند مەسەلەیەكی تر، پێموایە ئەم یەكەم كۆبوونەوە بوو، ئاخر كۆبوونەوە نابێـت، ئامانجی ئێمە ئەوەیە بۆچوونەوەكان لەیەك نزیككەینەوە، تا بتوانین گۆڕانكارییەكی جددی بكەین، لەیاسای هەڵبژاردن و كۆمسیۆن و مەسەلەكانی تر كە باسمكرد، بۆ ئەوەی بەزووترین كات هەڵبژاردنێك بكەین كە باڵانسی هێز لە كوردستان راست بكەینەوە.
*بە جددی ئەو هەڵە گەورانە چییە لەناو سستمی هەڵبژاردندا هەیە، كە یەكێتی گەیاندووە بەو قەناعەتەی سووربێت لەسەر ئەوەی كە ئەبێت گۆڕانكاری بكرێت، چ شتێك وایكردووە كە ئەم ناباڵانسییە، دروستبێت لەدەنگدانەكانی پێشوودا؟
-بافڵ جەلال تاڵەبانی: من شتە گشتییەكانم باسكرد و ئەگەر وردەكاری بڵێم لێرەدا بوار نابێت، بەڵام ئەوانەی باسمكرد وەكو یاسای هەڵبژاردن  و كۆمسیۆن و دەنگدەران و چەندین شتی تر هەن و كێشەكان زۆرن،  لەبەر ئەوە حەز ناكەم بچمە ناو وردەكارییەكانەوە.
*لەبەغدا رۆژ هەبوو 18 كۆبوونەوە كراوە، لەگەڵ لایەنە جیاوازەكان و لەگەڵ پەرلەمانتاراندا و ئاڵۆزییەكی زۆر لەبەغدا دروست بوو، دەمانەوێت بزانین، یەكێتی ئیمزای لەسەر هیچ رێككەوتنێك كردووە، بە ئاشكرا یا بە نهێنی، ئەگەر نەیكردووە هۆكارە سەرەكییەكە چییە؟
-بافڵ جەلال تاڵەبانی: قسەی دوور لە دیپلۆماسیی لێرەوە دەستپێدەكات، حزب و لایەنێكی كوردی رێككەوتنێكی كردووە، زۆرجاریش پرسیار لە ئێمە ئەكرێـت ئێوە ئاگات لەو رێككەوتنە هەبوو، ئەتانتوانی بەشێك بن لەو رێككەوتنە، وەڵامی من بە روونی پێتان بڵێم، درەنگ ئاگامان لە رێككەوتنەكە بوو، بوار هەبوو ئێمەش ئەو رێككەوتنامەیە ئیمزا بكەین، بەڵام نەماكرد و بەو جۆرەش نایكەین، مەسەلە سەرۆك كۆمار نییە، مەسەلە پرنسیپە كە ئێمە وەكو یەكێتیی نیشتمانیی كوردستان پێمانوایە، هەڵەیەكی ستراتیژییە ئێمە ببین بە بەشێك لە كێشەی ناوخۆی برا شیعەكانمان، برا سوننەكانمان، ئەگەر بڕیارە لەم مەسەلانە قسە بكەین، دەبێت قسەی خێر بكەین، هەقە ئێمە ئیشێك بكەین كە ئەم لایەنانە نزیكی یەك بكەینەوە، بەدەر لەوەش ئەو رێككەوتنە هیچی تیا نەبوو، كە بۆ كوردستان و ئێوە باش بێـت، سەیرمان كرد، نەباسی هێزی پێشمەرگە كراو نە باسی مووچە كراوە، باسی هیچ شتێكی گرنگ بۆ ئێمە نەكرابوو، لە هەمووی گرنگتر كەركوك و ناوچە دابڕاوەكان هەر باس نەكرابوو لەو رێككەوتنە، ئێمە پێش ئەوەی بچین بۆ بەغدا تیمەكەی كاك قوباد، كاغەزێكیان ئامادەكردبوو كە 22 خاڵی تێدابوو، كە مەسەلەی زۆر باشی تیابوو، بۆ كوردستان و بۆ عیراقیش باش بوو، بەڵام بەداخەوە كە لایەكی كورد چوو، ئەوەی پەراوێزخست و رێككەوتنێكی ئیمزا كرد، كە نرخی ئەو كاغەزەی نییە، كە ئیمزای لەسەر كرابوو، ئێمە دەبێت هەوڵ بدەین مام جەلال ئاسا ئیش بكەین، ئێمە دەبێت خەڵك كۆكەینەوە لەگەڵ یەك نەك جیایان بكەینەوە، پێموایە سیاسەتی یەكێتیی نیشتمانیی كوردستان دروستە، پێموایە هەم لەمەسەلەی سەرۆك كۆمار سەركەوتووئەبین هەمیش لە هەڵبژاردنەكانی كوردستان سەركەوتوو ئەبین.

كوردستان هەر غازی ماوە، دەبێت سیاسەتەكەمان بۆ غاز دروست بێت، دەبێت سیاسەتێك بێت خەڵكی كوردستان قازانج لەو غازە بكات

*ئەگەر مام جەلال لێرە بوایە، ئەم كێشانەی چۆن چارەسەر ئەكرد؟
-بافڵ جەلال تاڵەبانی: چۆن چارەسەری ئەكرد، داوای لێبوردن ئەكەم، مام جەلال لێرەبوایە، قەت نەئەگەیشتین بەو قۆناغەی ئەم كێشانە وایان لێبێت، دانیشتنەكانی خۆی ئەكردو برادەرەكانی كۆئەكردەوە، قەناعەتی پێئەكردن بەزمانە گوڵەكە و هەندێ جار بە توڕەبوونێك، خۆتان باش ئەزانن قەت نەئەگەیشتینە ئەمڕۆ، بۆیە قورسە من وەڵامی ئەم پرسیارە بدەمەوە.
*با بچینە بەشەكانی تری كوردستان، یەكێتی بەوە ناسراوە، كە لەرووی سیاسییەوە بەشداری ناكات لە پارچەكانی تری كوردستان، بەڵام كە پێویستیان بەهاوكاری بووبێت، لەرووی مرۆیی و لەرووی سەربازی، هاوكاری كردوون، ئەم سیاسەتەی یەكێتی بەردەوام دەبێت، بۆچی ئێمە وامان كردووە؟
-بافڵ جەلال تاڵەبانی: ئیجازەم بدە، یەكێتیی نیشتمانیی كوردستان، داش عیراقی تیا نییە، بەڵێ ئێمە یارمەتی هەموو كوردێك دەدەین لەهەر چوار پارچەی كوردستان، ئێمە ئامادەین یارمەتی براكانی خۆمان بدەین، دەبێت سیاسەتیشمان بگۆڕین، ئەبێت یەكێتی زیاتر لەو وڵاتانە ئیش بكات، بۆچی ئێمە دەبێت لەم عەقڵیەتە كۆنە، بێینە دەرەوە، زۆنی سەوز و زۆنی زەرد و وەكو كاك عومەریش فەرمووی زۆنی شین، ئەبێت ئێمە لەمە بێینە دەرەوە، 45 ملیۆن كورد هەیە لە جیهاندا دەبێت ئێمە خۆمان بكەین بە خاوەنی هەموویان، كە بووین بەخاوەنی 45 ملیۆن كورد، نە ئەمریكا و نە ئێران و نە هیچ وڵاتێك ناتوانێت بەكوردستان و بەكورد بڵێت نا، داواتان لێئەكەم هاوكارمان بن، با بڕۆین لە هەر چوار پارچەی كوردستان ئێمە سیاسەت بكەین، دەڵێم سیاسەت بكەین، پێموایە ئەمڕۆ یەكێتی بە روونی بە دۆستەكانی دەڵێت نەوەڵا بەجێتان ناهێڵین و كەی پێویستان بە هاوكاری ئێمە بوو، ئێمە هاوكارتان دەبین.

*پرسیارێك لەدەرەوەی پارچەكانی كوردستان، دێێنەوە بۆ مەسەلەی غاز، چونكە وتت گەنجەكانمان لەنەوت و غازیش گرنگترن، بەراستی بابەتێكی سروشتی ئەم وڵاتە كە غازە بۆ ئەبێت ئەوەندە كێشەی سیاسیی لەسەر دروست ببێت، بۆ ئەبێـت میدیاكارەكانمان ئەوەندە راپۆرت لەسەر بابەتی غاز دروست بكەن، بەراستی ئەوەی كە وتت، غاز ئەبێت بەسەر لاشەی مندا بڕوات، بە جددیتە غاز ئەبێت وا بڕوات؟
-بافڵ جەلال تاڵەبانی: بۆ ئەوەی ئەوە روون بكەمەوە، گلەیی لەو شتانە ناكەم كە پێشتر روویداوە، بەڵام سیاسەتی نەوت و سیستمەكەی، كە لەكوردستان بەكاردەهێنرێـت، رازی نیم لێی، رەنگە هەندێك لەژمارەكانم هەڵەبن، ئەگەر هەڵەم با كاك قوباد بۆم راست بكاتەوە، بەڵام نموونەیەكی بچوكتان پێ ئەڵێم، ئەوەی من تێگەیشتووم لەسیاسەتی حكومەتی هەرێم بۆ نەوتی كوردستان ئەوەیە كە نزیكی 60% داهاتی ئەگەڕێـتەوە بۆ كۆمپانیاكان كە نەوت دەردەهێنن و ئەوانەی كە نەوت دەكڕن و  ئەفرۆشن و ئەو كۆمپانیایانەش كە نەوت دەگوازنەوە، پرسیارەكەی من ئەوەیە ئێمە نەوتی كوردستان لەم خاكە جوانە كە ئەو هەموو خوێنەی بۆ رژاوە، ئێمە دەریدەهێنین بۆ ئەوەی چەند كۆمپانیایەكی پێ دەوڵەمەند بكەین، یان بۆ ئەوەمانە خزمەتی خەڵكی خۆمانی پێ بكەین، زۆرجار لەگەڵ جەنابتان دانیشتووم باسی عیراقم بۆ دەكەن، ئەڵێن عیراق شكاوەو وەزعی خراپە و عیراق واو وایە، بەو كێشانەی عیراق رێوشوێنەكە پێچەوانەكەیەتی، سی و شتێك داهاتی نەوت دەچێت بۆ كۆمپانیاكان و 70% ئەگەرێتەوە بۆ حكومەتی عیراق، راستە كابینەی ئێستا ئەڵێ ئەوە ئیشی من نییە، من ئەوەم نەكردووە، ئەوە ئاساییە، وەرە با چاكی بكەین، مەبەستم ئەوەیە كوردستان هەر غازی ماوە، ئەبێت سیاسەتەكەمان بۆ غاز دروست بێت، ئەبێت سیاسەتێك بێت خەڵكی كوردستان قازانج لەو غازە بكات، هەڵە تێمەگەن ئێمە دژی ئەوە نین، غاز بەكار بێـت و بڕوات بۆ ئەوروپا، بە پێچەوانەوە دۆستەكانمان زۆربەیان لەئەوروپان ئێمە دژی تیرۆر لەگەڵ ئەوان شان بەشان شەڕمان كردووە، لەگەڵ هێزەكانی ئەوروپا ئەوان پشتیوانمان بوونە، ئێمە دەمانەوێت غازی كوردستان بەو جۆرە بەكار نەهێنرێت پێویستمان بە سیاسەتێكی روون و شەفافە، سیاسەتێك كە باش بێت بۆ ئەم كوردستانە، بۆ عیراق و بۆ ئەو وڵاتانەش كە قازانج لەو غازە ئەبینن، ئێمە باوەڕمان بەوەیە ئەگەر هەر لایەك بیەوێـت بە جۆرێكی تر ئەو غازە بەكاربهێنێـت من ئەو وتەیە دووبارە ئەكەمەوە.
*پارتی و یەكێتی رێكەوتنێكی ستراتیژییان هەبوو، بەبێ ئەوەی رابگەیەنرێت لە میدیاكانەوە باسكراوەو هەندێك لەسەركردایەتیەكانیان باسیان لەوە كردووە كە ئەم رێكەوتنە هەڵوەشاوەتەوە، وا بۆ دوو خول ئەچێت، پارتی دیموكراتی كوردستان كاندیدی هەیە بەرامبەر بەسەرۆك كۆمار، كە یەكێتی چەندین ساڵە لەرێی عورفێكی سیاسییەوە ئەو پۆستەی هەبووە، ئەگەر ئەمە بەردەوام بوو هەموو جارێك یەكێتی لەرێگەی پەرلەمانەوە و لەرێی رێكەوتن لەگەڵ حزبەكانی ترەوە ئەم پۆستە یەكلایی بكاتەوە، ئایە لەكوردستان لەهەڵبژاردنی داهاتوو یەكێتی كاندیدی ئەبێت بۆ پۆستی سەرۆك وەزیران و سەرۆكی هەرێمی كوردستان؟
-بافڵ جەلال تاڵەبانی: یەكێتیی نیشتمانیی كوردستان، كاندیدی ئەبێت بۆ پۆستی سەرۆك وەزیران و سەرۆكی هەرێم، بەڵام دوای ئەوەی سەرۆكێكی یەكێتی دەبێـت بە سەرۆك كۆمار، بەڵێ ئامانجی ئێمە ئەوەیە ببین بە حزبی ژمارە یەك، ئەمە روونە، ئەی بۆ ئێمە ئەمانەوێـت لایەنەكان كۆبكەینەوە گەنج و ژنان كۆبكەینەوە و سیاسەتی روونمان هەبێت، بارودۆخەكە بگۆڕین لە كوردستان، لەبەر ئەوەیە ئێمە دەمانەوێت، ئەمجارە گۆڕانكارییەكی جددی بكەین لە كوردستان و لە حوكمڕانی كوردستان تەئكید بە، ئێمە هەوڵی خۆمان ئەدەین بۆ بەدەستهێنانی ئەو پۆستانە، كاندیدەكانیشمان كاندیدی باشن و پێموایە شتێكی باش ئەكەین لە كوردستان.

ئێمە وەکو یەکێتی  دەمانەوێت، ئەمجارە گۆڕانكارییەكی جددی بكەین لە كوردستان و لە حوكمڕانی كوردستاندا

*كەواتە ئەو كۆبوونەوەی نێوان هەردوو مەكتەبی سیاسیی یەكێتی و پارتی كرا  سێ رۆژ لەمەوبەر پەیامتان هەبوو بۆ پارتی دیموكراتی كوردستان سەبارەت بەم بابەتانە یان هەر بابەتێكی تر، كە پێویست بكات ئەوان وەڵامتان بدەنەوە؟
-من بیركردنەوەم جیاوازە لەهەندێ كەسی تر، بەڵێ راستە ئێمە لەعیراق چەند كێشەیەكمان هەیە، بەڵام ئەوە مانای ئەوە نییە، سیاسەت لە كوردستان بووەستێت، هەڤاڵان ئەوە هەڵەیە، دەبێت لێرە دایالۆگ هەبێت لەنێوان حزبەكاندا، دەبێت تێبگەن كە یەكێتی ئەزبەنی ئەزبەنی بۆ كەس ناكات، سیاسەتی خۆمان هەیە، ئەمەیە سیاسەتی ئێمە، بۆ ئەو كۆبوونەوەیەی مە كتەبی سیاسیی پەیامێكی تایبەتمان هەبوو، كێشەیەكی ئەمنی هەبوو كە پێموایە برایانی پارتی دەستخۆشیان لێ ئەكەم، زۆر بە جوانی  هاتنە پێشەوە، بۆیە دانیشتنێكی باش بوو، پێشم وایە كە دانیشتنەكانمان بەردەوام دەبێت، بەڵام بۆ ئەوەی هیچ كەسێكتان قەلەق نەبێت هیچ لەسیاسەتی خۆمان ناگۆڕین و بەرنامەی خۆمان هەیەو ئەو بەرنامەیە جێ بەجێ دەكەین.
*یەكێتیی نیشتمانیی كوردستان هەم بە سیاسەت هەم بە بڕیار دەگەڕێتەوە بۆ پێش هەشتی تەمموز؟
-بافڵ جەلال تاڵەبانی: دەزانی چۆنە، من تەئكیدی قسەكانی كاك قوباد دەكەم، ئێمە كێشەمان هەیە وەكو حزب، حەز ئەكەم یەك دوو شتتان پێ بڵێم، لەرووی یەكڕیزییەوە لەناو سەركردایەتی و مەكتەبی سیاسیی  قەت وا یەكڕیز نەبووینە، بەڵێ ماوە كە چەند كادرێك لە پێش كۆنگرە و دوای كۆنگرە زویر بوون، ئاشتیان كەینەوە، كە ئەمە واجبی هەموومانە كە ئاشتیان كەینەوە، لە رووی هێزی پێشمەرگەوە هەرگیز وا بەهێز نەبووینە، بەڵێ بۆچوونی جیاواز هەیە لەناو حزبەكەمان، ئێمە 124 سەركردایەتیمان هەیە، ئەوەیە كە ئێمەی دەوڵەمەند كردووە، ئەوەیە كە ئێمە بۆچوونی جیاوازمان هەیە، بەڵام خۆشبەختانە ئەوەی كە من بینیومە، ئەم چەند مانگە ئەوەیە كە ئێمە توانیومانە بەیەكەوە، كۆنسێسێك دروست بكەن، بە یەكڕیزی بچینە ناو كۆبوونەوەكان، ئێستا كە دەچم بۆ لای پارتی دیموكراتی كوردستان، كە ئەچم بۆ لای جەنابی مالكی لەبەغدا و كە ئەچم بۆ لای دۆستەكانمان لە وڵاتانی دەرەوە، سیاسەتی یەكێتی روونە، بەیەك دەنگ و بەیەك رەنگ بۆ پێشەوە ئەرۆین و نەخێریش قەت ناگەڕێینەوە بۆ دواوە، بەتایبەت پێش هەشتی تەمووز، بۆ پێشەوە ئەرۆین پێكەوە، گۆڕانكارییەكی جدییش ئەكەین لە حوكمڕانی كوردستان.
*دوای سێ رۆژی تر، ساڵیادی یەكێتیی نیشتمانیی كوردستانە، لەوە ئەچێت بەرەو روو هەموو ئەم هەڤاڵانە نەبینیتەوە یان نەتوانیت هەموویان لەیەك رۆژدا ببینیت، پەیامت چییە بۆیان و پەیامت چییە بۆ نوێبوونەوەو چاكسازی وە لەكۆتاییدا ئەو تیمەی كە دیداری یەكێتیشیان رێكخستووە؟
-حەزم ئەكرد بۆ ئەم وەڵامە خۆم ئامادە بكەم، بەڵام واباشترە كە خۆم ئامادە نەكردووە، جارێ من سوپاسی هەر هەمووتان ئەكەم، زۆر زۆر مەمنوونتانم و پیرۆزباییەكی گەرمتان لێدەكەم، خۆزگە بمتوانیایە لەگەڵ هەر هەمووتان بم،  كاك قوباد باسی كرد یەكێتی چەند كێشەی هەبووە، بەراستی هەر ئێوەبوون ئەم حزبەتان هێشتەوە، چونكە زۆرجار ئەوانەی لەسەرەوە ئەو وەفایەیان نەبوو بۆ یەكێتی كە ئێوە هەتان بوو، من پیرۆزبایی گەرمتان لێدەكەم دەستخۆشیتان لێئەكەم  و سوپاستان ئەكەم، پێتان ئەڵێم بەڵێ ئێمە وەكو سەركردایەتی یەكێتیی نیشتمانیی كوردستان هەڵەمان كردووەو ئەوە دەزانین، بەڵام ئەو هەڵانە دووبارە ناكەینەوە، هاوكارمان بن زۆر سەبرتان هەبووە، یەك تۆزی تر سەبرتان هەبێـت پێكەوە، بەیەكەوە پێكەوە شان بە شان. و زۆر سوپاستان دەكەم.