پەیامی سەرۆك بافڵ بۆ یادی 20 ساڵەی مورافەعە مێژووییەكەی سەرۆك مام جەلال
«كەركوكی قودسی كوردستان بەشێكی گەورە و گرنگی خەباتی سیاسیی سەرۆك مام جەلال بوو، ئەمڕۆش ئێمە بە هەمان وزە و رۆحیەتەوە درێژە بەو سیاسەتە دەدەین و خەبات لەپێناوی سەربەرزی و سەرفرازیی كەركوك و خەڵكە تێكۆشەرەكەیدا دەكەین»
«یەكێتیی نیشتمانیی كوردستان هەمیشە لە كەركوك و لەناو دڵی خەڵكە خۆڕاگرەكەیدا بووە، خەمی كەركوك خەمی ئێمەیە و گەیشتن بە مافە یاسایی و دەستوورییەكانیشی؛ لە ئەستۆی ئێمەیە»
ئەمڕۆ بە شانازییەوە یادی 20 ساڵەی مورافەعە مێژووییەكەی سەرۆك مام جەلال لە ئەنجومەنی حوكم، دەكەینەوە، یادی ئەو رۆژەی سەرۆك و رابەرمان بە نەخشە و بەڵگەی مێژووییەوە كوردستانیبوونی كەركوكی سەلماندەوە.
كەركوكی قودسی كوردستان بەشێكی گەورە و گرنگی خەباتی سیاسیی سەرۆك مام جەلال بوو، ئەمڕۆش ئێمە بە هەمان وزە و رۆحیەتەوە درێژە بەو سیاسەتە دەدەین و خەبات لەپێناوی سەربەرزی و سەرفرازیی كەركوك و خەڵكە تێكۆشەرەكەیدا دەكەین.
