سازدانی: ئالان محەمەد جەزا
سۆزان فەرەج
سۆزان فەرەج بەرپرسی ئۆفێسی رێكخراوی تواناسازیی ئافرەت لە پاریزگاری هەڵەبجە و چالاكوانی مەدەنی لەبواری ژناندا لە دیدارێکدا كار و چالاكیی رێكخراوەكەیانی خستەڕوو لە بواری هاوكاریی و پاڵپشتیی گەنجان و ژنان و روونیشیكردەوە كە ئۆفیسیان لە هەموو پارێزگاكانی هەرێمی كوردستاندا هەیە و مۆڵەتی عیراق و هەرێمیشیان هەیە.
سەرەتا لەبارەی كار و چالاكی رێكخراوەكەیانەوە رایگەیاند: وەك پڕۆژەیەكی نێودەوڵەتی كار لەسەر بوارەكانی ژنان و گەنجان و ئاشتی و ئاسایش دەكەن كە ئەوە پرسێكی گرنگی ناو كۆمەڵگەیە لە كوردستان و عیراق و بگرە لە جیهانیشدا و وتی: بەپێی پلانی ئەمساڵمان شوێن بۆ 330 گەنجی بێكار لەناو كۆمپانیا ئەهلییەكاندا دەكەینەوە بۆ ماوەی چوار مانگ، و دەرفەتێكیشمان هەیە كە پاڵپشتی دارایی 50 گەنج بكەین تا لەو رێگەیەوە ببنە خاوەنی كاری تایبەت بە خۆیان.
مێژووی دروستبوونی رێكخراوەكە
سۆزان فەرەج وتی: رێكخراوەكەمان لە ساڵی 2004دا دامەزراوە كە رێكخراوێكی ناحكومییە و مۆڵەتی لە عیراق و هەرێمیش هەیە، روونیشیکردەوە کە رێکخراوەکەیان خۆی تەرخانكردووە بۆ بەهێزكردنی ژنان و کچان لە كایە كۆمەڵایەتی و ئابووری و سیاسییەكاندا، هەروەها بە پەرۆشیشەوە كاردەكات بۆ بەرزكردنەوەی كاریگەریی رەگەزی مێ لە بەرەنگاربوونەوەی هەموو جۆرە توندوتیژیەك، ئەمەش لە رێی پێشكەشكردنی خزمەتگوزارییەوە، وەک پشگیریی كۆمەڵایەتی و ئابووری و دەروونی و دەستگەیشتن بە دارایی سەربەخۆ و پەرەپێدانی توانای تاكەكەس، هەروەها هاوكاریی یاسایی.
گەنجانیشی فەرامۆش نەکردووە
لێپرسراوی رێکخراوەکە لە هەڵەبجە راشیگەیاند پڕۆژەیان بۆ گەنجانیش هەیە بەدرێژایی ساڵ پڕۆژە گەنجان سودمەند دەبن لەو پڕۆژانە و وتی: سەرەتایی ساڵی 2024 بە دوو پڕۆژە دەستمان پێكردووە، یەكێكیان پڕۆگرامێكی برەودانە بە دیموكراسی لە عیراق و هەرێم، بەڵام پڕۆژەیەكمان هەیە كە تایبەتە بە هەرێمی كوردستان، لە هەر چوار پارێزگاكەدا ئەویش پڕۆژەی رەخساندنی هەلی كار و پاڵیشتی داراییە بۆ گەنجان، کە وەک سەرەتا لە بواری بەگەڕخستنی گەنجانە و بۆ ئەوەش 330 گەنج بۆ ماوەی چوار مانگ لەسەر كار دەبن، بەشی دووەمی پڕۆژەکەش دەستگیرۆیی 50 گەنجە تا ببنە خاوەنی کاری خۆیان .
تائێستا چییان کردووە؟
سۆزان فەرەج وتیشی: هەندێك لە پڕۆژەكانمان لە هەر چوار پارێزگاكە هەمان پڕۆژەیە، بەڵام هەندێكیان تایبەتە بە پارێزگایەکی دیاریکراو، جگە لەوەش لە هەموو بۆنە گشتی و تاییەتەکانی گەنجان و ژناندا ئامادەییمان هەیە و لە رووی مادی و مەعنەوییەوە پاڵپشتیان دەكەین، بەڵام ئاماژەی بەوەدا کە هەندێك كات زەروورەت وادەكات شێوازی پڕۆژەكانمان بەپێی پێداویستی ئەو ناوچەیە دابڕێژینەوە کە چالاکییەکەی لێ دەکەین بۆ ئەوەش وەک پڕۆژەیەكی نێودەوڵەتی كار لەسەر كارنامەی ژنان و ئاشتی و ئاسایش دەكەین كە ئێستا بۆتە پرسێكی گشتی، هەروەها لە هەندێك شوێندا دیالۆگی كۆمەڵایەتیمان هەیە كە بە سەركردایەتیی گەنجان و ژنان دەبێت، هەروەها چالاكیی تایبەت بە رێكخراوەكان بۆ پەرەپێدانی توانای كارمەندی رێكخراوەكان.
چییان بۆ گەنجان کردووە؟
لەبارەی ئەوەشەوە کە ئاخۆ ئەو رێکخراوە چی بۆ گەنجان کردووە، وتی: لە رێگەی ئەو چالاکی و پڕۆژانەوە کە هەمانە، تا رادەیەک خزمەتمان بە گەنجانی هەرێم کردووە و چ ئەوانەی لە ئەوروپا بوون و گەڕاونەتەوە، یاخود ئەوانەی ئێستا بیر لە رۆیشتن دەكەنەوە، لەبەرئەوەی ئێستادا دۆخی سیاسی و ئابووری وایكردووە گەنجانێكی زۆرمان بێكارن، بۆیە پڕۆژەكانمان وا داڕشتووە کە دەست بەو سامانە مرۆییە نیشتمانییەوە بگرین تا گەنجێكی خاوەن بڕوانامە و بێ بڕوانامەش کە بەهرەدارن، تا بتوانین لە شوێنێکی بازرگانیدا شوێنیان بۆ بكەینەوە یاخود لە یەكێك لە كۆمپانیاكاندا بیانناسێنین بەو شوێنانە و روونیشیکردەوە کە لە ساڵی رابردووەوە تائێستا هەمان كاردەكەین، پار توانیمان سەركەوتنی باش بەدەست بهێنین لە چوارچێوەی چەند پڕۆژەیەكدا و ئەمساڵیش بە هەمان شێوە 330 گەنجی بێكار لەناو كۆمپانیا ئەهلییەكاندا بۆ ماوەی چوار مانگ دادەنێین و پاڵپشتیی دارایی 50 گەنجیش دەكەین تا لەڕێی بیرۆکەکانی خۆیانەوە ببنە خاوەن کاری خۆیان ئەمەش وادەكات ئەو گەنجە هیوایەکی بۆ بگەڕێتەوە بەوەی شوێنێك و رێکخراوێک هەیە بیر لە بژێویی ئەو دەكاتەوە و بەوەش رەنگە چیتر بیر لە كۆچکردن نەكاتەوە.
خولی بەردەوام
لەبارەی چالاکییە رووناکبیریی و رێنوێنییەکانیشەوە دەڵێت: ئێمە بەدرێژایی ساڵ خول دەکەینەوە و خولی جیاوازمان هەیە کە تایبەتە بە كەسانی ئایینی، بە گەنجان، بە خاوەن کار، بە بێكار، خاوەن بیرۆكە، یان بەپێی ئەو پێویستییەی ئێمە دەیبینین لەو رۆژەدا یاخود ئەو ناوچەیە پێویستی بەچییە، تەنانەت هەندێكجار نەك لە چوارچێوەی خولدا بەڵكو لە چوارچێوەی مێزگردێكدا بۆ گفتوگۆكردن و یان بیرۆكەیەك بۆ گفتوگۆكرن لەسەر كێشەیەك كە ئێمە بتوانین ببینە هۆكاری گەیشتن بەئامانجێك، بۆیە ناتوانم بە ژمارە بڵێم چەند خولمان هەبووە یان دەبێت، ماوەی ساڵێكە چەندین خولمان كردۆتەوە، بەڵام بە درێژایی ساڵ هەوڵ بۆ پێگەیاندن و بەتواناتركردنی ژنان و گەنجان دەیەین لە هەریەكە لە سێكتەرەكاندا.
لەبارەی چالاکییەکانیشیانەوە بۆ ئەمساڵ روونیکردەوە کە هەر دەرفەتێکیان بۆ بڕەخسێت لەبواری خزمەتکردن بە ژنان و گەنجان و منداڵان درێغی ناکەن و بەگوێرەی توانا بەدەنگییەوە دەچن و هاوکاریی مادیی و مەعنەویی دەکەن.
