ئا: لاپەڕەی ئابووری
لە دیدارێکی تایبەتی لەگەڵ کەناڵی سکای نیوز عەرەبی، خەلیفە عەبدولسادق وەزیری نەوت و غازی لیبیا رایگەیاند: دەمانەوێت دووبارە لیبیا بێتەوە مەیدانی وزەی جیهانی، ئەمەش لەرێگەی زیادکردنی بەرهەمی نەوت و غازەوە. لەم بوارەشدا کۆمەڵێک رێكەوتنیان لەگەڵ کۆمپانیا گەورەکانی جیهان لە بواری وزەدا کردووە بۆ پەرەپێدانی کەرتی نەوت و غازی لیبیا.
وەزیری نەوت و غازی لیبیا رایگەیاند: دەمانەوێت بەرهەمی نەوت بگەیەنینە دوو ملیۆن بەرمیل لە رۆژێکدا
بەرزکردنی ئاستی بەرهەمهێنانی نەوت
عەبدولسادق رایگەیاند: دەمانەوێت هەتاوەکو کۆتایی ئەمساڵ بەرهەمی نەوت رۆژانە بگەیەنینە 1.4 ملیۆن بەرمیل، ئێستا کۆی بەرهەمی رۆژانەی لیبیا 1.2 ملیۆن بەرمیلە. وتیشی: دەمانەوێت لەماوەی سێ ساڵی داهاتوودا، بەرهەمی رۆژانەی لیبیا بگەینینە دوو ملیۆن بەرمیل .
17 ملیار وەبەرهێنان
لەدرێژەی لێدوانەکەیدا، وەزیری نەوت و غازی لیبیا رایگەیاند: بۆ گەیشتن بە ئاستی دوو ملیۆن بەرمیل لە رۆژێکدا، پێویستیمان بەوە هەیە کە بڕی 17 ملیار دۆلار لە کەرتی دەرهێنان و کۆکردنەوەو گواستنەوەی بەرهەمی نەوتدا وەبەرهێنان بکەین.
کەرتی غاز
لە بواری بەهێزکردنی کەرتی غازیشدا، خەلیفە عەبدولسادق رایگەیاند: دەمانەوێت پەرە بە بەرهەمی غازی سروشتیش بدەین، لەمبارەیەوە رێکەوتنێکی بازرگانیمان لەگەڵ کۆمپانیای « ئینی» ئیتالیدا ئیمزا کردووە، کە یەکێکە لە کۆمپانیا گەورەکانی جیهان لە بواری وزەدا، بۆ پەرەپێدانی کەرتی غازی لە دوو کێڵگەی غازی سروشتی لە خۆرئاوای لیبیا. وتیشی: بەپێی ئەو رێکەوتنە بێت، ئەو کۆمپانیا ئیتالییە بڕی 8 ملیار دۆلار لەو دوو کێڵگەیەدا وەبەرهێنان دەکات، هەتا لە ساڵی 2028 بەرهەمی غازی سروشتی رۆژانە بگاتە 720 ملیۆن مەتر سێجا.
سەرچاوە: سکای نیوزی عەرەبی
