ناساندنی کتێب

سینەما و شوناس

توێژینەوەیەكی سۆسیۆلۆژی لە شوناسی كۆمەڵایەتی سینەمای كوردە كە لە لایەن نووسەر و توێژەر هەوراز محەمەدەوە نووسراوە.
كتێبێكە بۆ تێگەیشتن لە مێژوو و ئێستا و ناوەڕۆكی فیلمی كوردی و خوێندنەوەیەكە بۆ زمانی سینەمایی دەرهێنەری كورد و ئەو دنیایەی كە فیلمسازیی كورد لە رێی فیلمەكانیانەوە دروستیان كردووە، كتێبەكە توێژینەوەیەكی كۆمەڵناسییە لەبارەی شوناسی كۆمەڵایەتی تاكی كورد لەناو فیلمی كوردیدا.
 نووسەر ئاماژەی بەوەوە كردووە كە هەر گەلێك وێنە لەبارەی خۆیەوە بەرهەم نەهێنێت مەحكوم بە لەناوچوونە.
ئەم توێژینەوەیە هەوڵێكی زانستی و ڕێگەیەكە بۆ دۆزینەوەی ئەو هێڵانەی، كە دەمانگەیەنێت بە وەڵامی ئەو پرسیارەی شوناسی كۆمەڵایەتی كورد چییە و چۆن لە سینەمای كورددا دەركەوتۆتەوە؟ بەتێگەیشتن لە تیۆرییەكانی شوناسی كۆمەڵایەتی و هاوتاكردنی لەگەڵ دۆخی تاك لە كۆمەڵگەی كوردیدا و دواجاریش لەو رێگەیەوە خوێندنەوە بۆ فیلمەكان بۆمان دەردەكەوێت شوناس و كەسێتی كۆمەڵایەتی كورد چۆنە و چییە؟
نیما سەرتیپ

ناوچەی پشدەر

ئەو كتێبە لە 28 وتاری میژوویی پێكهاتووە سەبارەت بە ناوچەی پشدەر كە عومەر ئیسماعیل باوزێی لە دووتوێی 180 لاپە چاپ و بڵاویكردۆتەوە. 
نووسەر چەندین بابەت و لێكۆڵینەوەی میژوویی سەربارەت بە ناوچەی پشدەر كردووە كە لە نێوان ساڵانی 2006- 2024 لە رۆژنامەی كوردستانی نوێ و گۆڤارەكانی باشوور و خۆرهەڵاتی كوردستاندا بڵاویكردۆتەوە.
نووسەر هەوڵیداوە  بەشێوەیەكی زانستی، مێژووی ناوچەكە شەنوكەوبكات، هەروەها بەچەندین سەرچاوەی نووسراوو چاوپێكەوتنی رۆژنامەوانی، بابەتەكان پشتڕاست بكاتەوە.
 كتێبەكە لەلایەن هادی هونەر دیزاینی بەرگی بۆ كراوە و بە تیراژی 500 دانە لەچاپخانەی بەیبوون لە قەڵادزێ چاپكراوە.
ئاوات كۆكەیی

گەردەن زەردێ

ناوی دیوانێكی شیعری، شاعیر بەشدار سامی-یە كە لەلایەن دەزگای چاپ و بەخشی سەردم بە تیراژی 1000 دانە چاپ و بڵاوكراوەتەوە.

یەكێك لە تایبەمەندییەكانی ئەو دیوانە ئەوەیە كە شاعیر شێوازێكی نوێ بۆ دەربڕینی شیعر لەبەرچاو گرتووە ئەویش گێڕانەوەیەكی روون و پەخشانییە كە تێیدا سوودی لە حەیران و لاوك وەرگرتووە.
تایبەمەندییەكی دیكەی ئەو دیوانە ئەوەیە كە شاعیر تەنزی بەكارهێناوە و زۆرجار لەوپەڕی ئازارەكانی خۆی روودەكاتە تەنز، بۆ نموونە لە شیعری» گەڕانەوە بە رێگا كۆنەكەدا.
بەشداری شاعیر لە شیعرەكانیدا جگە لەوەی كە بیر لە رووداوەكان دەكاتەوە، بیر لە خودی خۆیشی دەكاتەوە، هەر بۆیە كاتێك كە باسی ئازار دەكات خوێنەر بە تەواوەتی هەست بە ئازارەكەی دەكات. 
جه‌واد حه‌یده‌ری