فەرماندەیی هێزەكانی كۆماندۆی كوردستان ئاشکرایکرد، لە ئۆپەراسیۆنێكدا دوو تونێلی رێکخراوى داعشیان خاپوور کردووە و دەست بەسەر ژمارەیەك كەرەستەی ئەلكترۆنیشدا گیراوە.
فەرماندەییەکە لە راگەیەندراوێکدا بڵاویکردووەتەوە، "تیمێكی شەڕكەر لە كوڕانی كۆماندۆ دوای دەستكەوتنی زانیاریی وردی هەواڵگری، لەگەڵ تیمێكی هاوپەیمانان لە سەعات 02:00ى شەوی پێنجشەممە لەسەر هەینی 23 لەسەر 24ى ئایارى 2024، لە سنووری گەرمیان - تاوێركەوە، دەستیان بە كێوماڵكردنی دەرچەی تاوێركەوە كرد و دوو تونێلی تیرۆرستانیان لەو ناوچەیەدا خاپوور كرد.
کۆماندۆ ئاماژەى بەوەشکردووە، لە كاتی كێوماڵ كردنەكەدا و لە یەكێك لە تونێلەكاندا، كوڕانی كۆماندۆ دەستیان بەسەر چەند ئامێرێكی ئەلكترۆنی و لاپتۆپ و پارچەی یەدەگی ئامێرە ئەلكترۆنییەكاندا گرت، كە ئامانجی ئۆپەراسیۆنەكە دەستكەوتنی ئەو كەرەستانە بوو.
روونیشکراوەتەوە، ئۆپراسیۆنەكە لە ئاسمانەوە لە لایەن هێلیكۆپتەری هاوپەیمانانەوە پاڵپشتی كرا و سەعات 09:00ى بەیانی هەینی كۆتایی هات.
