جەمالی دەلاك
هونەرمەند ناسری ڕەزازی خاوەنی ئەو مێژووەیە کە لێوانلێوە لە هەوراز و نشێو و چەشتنی ساردی و گەرما و چەشتنی ئازاری زیندانەكانی داگیركەر
هونەرمەند ناسری رەزازی، گەنجینەیەكی بەنرخە بۆ فەرهەنگ و كەلتور و زمان و هونەریی كوردی .
خوێندنەوە بۆ (45) ساڵ گوێگرتن لەدەنگ و هونەرەكەی، هاوڕێیەتی بە بۆن بەرامەی برا، دیدار و پێكەوەژیان لە (سلێمانی، هەولێر، دهۆك، رواندز، شەقڵاوە، هەڵەبجە و دوكان) بەدەیان شەو دانیشتن و باس و خواس و شەوئاهەنگ، گەلێك زەحمەتە هەروا بەسانایی لێی بدوێم! لەماوەی ئەو چەندین ساڵەدا یادەوەریی و بیرەوەی شیرینمان گەلێك زۆرە، دەترسم لەوەی هەست و خامەم غەدر لەو مێژووە جوان و لێوانلێوە لەخۆشەویستی و پەیوەندییە برایانەمان بكات.
زۆر زەحمەتە باس لەومێژووە لیپاولیپە و پڕ لەهەوراز و نشێو و پڕ بەخششە هونەرییە (ئەوینداری و نەتەوەیی و بەرگری) و خامەی باڵای لێوڕێژ لەخەمخۆری بۆ زمان و مێژووی مۆسیقا و گۆرانی نەتەوەكەی بكەم.
ناسری رەزازی هونەرمەندێكە ( 56) ساڵ زیاترە لەپێناو هونەری نەتەوەكەیدا تێكۆشاوە و هەموو ژیانی خۆی بەخشیووە لەپێناو بەرزڕاگرتنی هونەری ( مۆسیقا و ئاواز و مەقام و سروود و گۆرانی)، ئەم گەنجینە بەنرخە (56) ساڵە لەزێد و پارچەكانی دیكەی كوردستان و وڵاتانی ئەوروپا و ئەمریكا و ئاسیا و ئەسكەندەناڤی، لەسەر شانۆ گۆرانی و مەقام و سروودی خوێندووە، دەنگ و هونەرەكەی زایەڵەی خۆشەویستی و ئازار و چەوساندنەوەی گەلێكی بندەست بووە.
ماوەی(43) ساڵە دەربەردەر و ئاوارەیە لەزێدەكەی، ساڵانێكە ماندوبوون و بەخششی بێوچانی سەرەڕای ئەو هەموو لەمپەرانەی بەردەمی، بەڵام رەزازی زیاتر تێكۆشا، چەندین ساڵە كەشكۆڵە لێوڕێژەكەی لەكۆڵناوەو گۆرانی و سروود دەخوێنێ، بۆ كێی..؟.
بۆ نیشتمان و زێدەكەی، بۆ بەدبەختیی و چارەڕەشی نەتەوەكەی، بۆهەموو كارەساتە تراژیدیاكانی بەسەر نەتەوەكەیدا هاتووە، بۆ كوردستان، بۆ پێشمەرگە و شەهید و دایكی پێشمەرگە، لەگەرووە زووڵاڵەكەیەوە بەردەوام سروودی چڕی بۆ بەرزبوونەوەی رۆحی بەرەنگاری و ئاستی وشیاری نەتەوەكەی، بەسروودەكانی بەردەوام مەتەرێزەكانی بەرگری لە كەرامەتی مرۆڤی كورد پتەوتر كردووە، گۆرانی بۆ سروشت و ئەوینداری و بەهەزاران شەوئاهەنگی ئەنجامدا كە كورد لە لوتكەی نائومێدیدا دەژیا، تروسكایی نەبوو، بەڵام رەزازی داهێنانی زێدەتركرد لە تاراوگە، تاكە هونەرمەندی نەتەوەیەكی بندەستە، هەمیشە لەخەمی زمان و یەكگرتن و یەكهەڵوێستی نەتەوەكەی تێكۆشاوە، بەردەوام بە دیالێكتەكانی زمانی شیرینی كوردی لەتەواوی كوردستان گۆرانی چڕی، كام هونەرمەندی كورد هەیە وەك ناسری رەزازی خاوەن خامەیەكی باڵا و بڕشت بێت، زمانزان و مێژووزان و نووسەرێكی بەتوانا.
دوای ئەو هەموو ساڵە، هەموو وزەی جەستە و بیر و هۆشیی لەپێناو نەتەوەكەیدا تەرخان كرد، سەر و سیما بەفر لێباریوو، هەركات لێی دەڕوانم قەندیل و سەفین و پیرەمەگروون و ئاویەر و.... تاد، دێتە خەیاڵم، چونكە گەردنت ، تێكۆشانت ، خەمخۆری و دڵسۆزیی بەهێندەی ئەو كێوە بەرزانەی كوردستان بەرزە.
هونەرمەند ناسری ڕەزازی خاوەنی ئەو مێژووەیە کە لێوانلێوە لە هەوراز و نشێو و چەشتنی ساردی و گەرما و چەشتنی ئازاری زیندانەكانی داگیركەر، هەر هونەرمەندێكی دیكە بووایە لەمێژبوو نەدەما، بەڵام رەزازی كۆڵی نەدا و شێلگیرانەتر كەشكۆڵی پڕ لە خەمی خاك و نیشتمان و زمان و فەرهەنگ و كەلتوور و هونەری بەكۆڵدا داوە و بەرەو ئاسۆ هەنگاوی هەڵگرتووە.
دوای خەرمانێك لەبەخششیی هونەری (مەقام، گۆرانی و سروود) هیچ شتێك نەماوە بە هەست و گەرووی پاراوی كوردانەی گۆرانی و سروودی بۆ نەوتبێ، ئەوەندەی بەخشیوە بە هونەری ئاواز و گۆرانی و هونەری بەرگریی و خەرمانی هونەری مۆسیقا و گۆرانی دەوڵەمەندتر كردووە، هەتا كوردێك لەسەر ئەم گۆی زەوییە هەبێت هونەر و ناو و ناسناوی رەزازی هەیە، سەرەڕای ئەو هەموو بەخششە هونەرییانە هەرلەسەرەتاوە بەوپەڕی تین و هێز و بڕوا بەخۆبوونەوە هاتۆتە نێو دنیای هونەر، هەر زۆر زوو بۆتە هاوەڵی گەورە هونەرمەندانی گەورەی گەلەكەمان، هێشتا تەمەنی (24 بۆ 25) بەهاربوو، دەنگ و هونەرەكەی لەلایەنی بەهرەمەند و دەنگخۆشانی دیكەوە دووپاتە دەكرایەوە و دەستی گرتن و هێنانییەسەر رێگە پیرۆزەكەی هونەر.
هونەرمەند ناسری رەزازی دوای ئەو هەموو ساڵە لە زێد و دەربەدەری و ژیانی تاراوگە سەرەڕای ئەو هەموو لەمپەرانە نەوەستا و ئەركی سەرشانی زۆر زیاتری بەخشیی، هەركاتێك لە كۆڕ و كۆبوونەوەیەك، لە ئاهەنگ و كۆنسێرت و شەو دانیشتن و بۆنەی نەتەوەیی و نیشتمانیەكدا بوونی هەبووبێت، وەك شێرئاسا و متمانە بەخۆبوون، بوونی خۆی لەڕێی دەنگە زوڵاڵەكەیەوە سەلماندووە و تێیچریكاندووە، هەموو كورد و كوردستانییەكت سەرمەست و خۆشحاڵ كردووە.
بەختەوەرم كە توانیم كتێبێك بەدوو بەرگ بەناوی ( نەداری) لەئامادەكردنی خۆم، دەربارەی گۆرانییەكانی هونەرمەند ناسری ڕەزازی لەساڵی (2003) بەچاپ بگەیەنم و لەماوەی یەك مانگدا لەكتێبخانەكەنان نەمێنێ ، دەتوانم بڵێم كتێبی نەداری، گۆرانییەكانی هونەرمەند ناسری رەزازی تاكە كتێبە تائەو جێیەی بۆم كرابێت و زانیارییم چنگ كەوتبێت ئاوڕ لە هونەرمەندانی ژەنیار لەساڵی (1968 تا 2002) كاریان لەگەڵ رەزازی دا كردبێت ناویان لەو كتێبەدا هاتووە.
ناسری رەزازی جیا لەهەموو ئەو خەسڵەتە جوانانە، كەسێكی سادە و خاكەڕایە، زمان و لەبزشیرین و حەز و ئارەزووی تێكەڵاوبوون بەخەڵكە، خاوەنی پەیوەندییەكی فراوانە لەتەواویی كوردستاندا، هونەرمەندێكی خۆبەزلزان و منەتكەر نییە بەرامبەر نەتەوەكەی، ئەوەی تائێستا تەمەنی خۆی لەسەر داناوە، بە ئەركی سەرشانی خۆی زانیوە بەرامبەر بەنەتەوەكەی.
وەك برا و هاوڕێیەكی لەمێژینەی هونەرمەند ناسری رەزازی، خوازیاربووم رەزازی دوای بەخشینی ئەو هەموو شاكار و بەرهەمە هونەرییانە، دەبوو لە ساڵی (2010) لەدوای ئەلبومی (ئێوارەیە) وازی لە خوێندنی گۆرانی بهێنابایە، چونكە من دەزانم چ زەحمەت و ماندوبوونێكی دەروونی و رۆحی و تەنانەت باری ماڵی كێشا..؟! دەبوو لەوساڵەوە پشووی بدابایە و زیاتر خۆی تەرخان بكردایە بۆ نووسین و توێژینەوە لەسەر هونەری مۆسیقا و گۆرانی و زمانی شیرینی كوردی.
تەمەندار و پڕتەندروست بێت هونەرمەند ناسری رەزازی، پێشمەرگە، ژینگە و ئاژەڵ دۆست و خەمخۆرەكەی زمان و هونەری نەتەوەی كورد .
ناسر رەزازی لەگەڵ پۆلێک پێشمەرگە
