هەڵگری خەڵاتی نۆبڵی ساڵی 1903
بیورنسترن بیورنسنی شاعیر، لەساڵی 1832 لەگوندی کفیکیکنی لە نەرویژ لەدایک بووە و لە ساڵی 1910 لە پاریس ژیانئاوایی کردوو. لەزانکۆی ئۆسلۆ خوێندوویەتی، دواتر لە رۆژنامە لەبواری رەخنەی ئەدەبیدا کاریکردووە و بەتایبەتیش لە رەخنەی شانۆییدا قوڵبۆتەوە و هەرخۆشی شانۆنووسێکی دیار و رۆماننوسیش بووە. لەگەڵ هنریک ئیبسن بە یەکێک لە چوار ئەدیبە گەورەکەی نەرویژ دادەنرێن.
ئەم شاعیرە بە وتەبێژی چەپەکان ناوبانگی دەرکردبوو، جارێکیش بەخیانەتی گەورە تۆمەتبار کرا، لەبەرئەوە ناچار بوو زێدی خۆی بۆ ماوەیەک بەجێ بهێڵێت و لە ئەڵمانیا ببێتە پەناهەندە.
دواتر گەڕایەوە نیشتیمانەکەی و هەر ئەویش سرودی نیشتیمانیی نەرویژی نووسیی، خەڵاتی نۆبڵیشی هەر لەپای ئەو سرودەدا پێ بەخشرا. زۆر شیعری بەپێز و هەمەڕەنگ و جوانی نووسیوە کە ئاوێزانە بە بەهرەی بڵند و پاکژیی گیانێکی ناوازە.
وەرگێڕانی لە عەرەبییەوە:
ئاوات حەسەن ئەمین
گەورە یان کۆیلە
تەماشای ئەم زەوییە بکە،
کە ئەو لوتکە بەرزە ترسناکانە دەورەیان داوە،
لەکاتێکدا دەریا دڵڕەقەکانیش بە زستانە ساردەکان و
هاوینە خەمۆکەکانیان
گەمارۆ دراون.
زۆر بەکەمی پێ دەکەنێ
بەبێ سەرشۆڕیی.
ئەوە ئەو زەبەلاحەیە کە دەبێ
دەستەمۆی بکەین.
تا بەپێی خواستەکانمان
بەخێرایی کاربکات.
دەبێ بەبێ دەربڕینی بێزاریی
بەرگە بگرێت.
دەبێ رایبکێشێ و بڵاویبکاتەوە و
پیای بکێشێ بە چەکوش.
دەبێ لافاوە بەهوروژمەکان
بکاتە وزەی رۆشنکردنەوە.
بەهەموو ژاوەژاو و
بەهەموو تووڕە بوونە رقاوییەکەیەوە.
_ ئەگەر کارەکانمان جێ بەجێ کرد_
ئەوسا ئێمە،
براوەی جیهانێک دەبین لە جوانی
سەرچاوە:قصائد من شعراء جائزه نوبل
إختارها وترجمها د. شهاب غانم مارس 2009
