عەبدولڕەحمان بامەڕنی
دیموكراسی ب كورتییا پێناسا خوە، یانكو دەستھەلاتا پترییێ. پتری، یانكو ئەو لایەن دێ دەستھەلاتێ گریتە دەست، یێ باوەرییا پترترین كەس یان دەنگدەر بدەستڤە بینیت و ئەڤ چەندا ھەنێ، ل ھەمی كوژیێن دنیایێ تشتەكێ رەوایە و لایەنێن ھەڤرك، شەری ل سەر ڤێ چەندێ دكەن، دێ چاوان شێن باوەرییا پترییا دەنگدەران بدەستڤەئینن.
ل ھەرێما كوردستانێ و ژبەركو ئەم دروست د چەمكێ دیموكراسیێ نەگەھشتینە، ئەڤ پرۆسەیە ژی ب لەنگی دەرباز دبیت و لێ ھەر چاوا بیت، دناڤبەرا ئەگەر ھەلبژاردەیا ئایا ھەلبژارتن بھێنەكرنێ یان نەھێنەكرنێ؟ پێنەڤێت ھەلبژارتن باشترە و ھەر چنەبیت، دەنگدەری مافێ گازندێ نامینیت، ژبەركو ئەو بوویە بەشەك ژ دانانا سیستمێ نوویێ برێڤەبرنێ، چ باش چ خراب.
دنۆكەدا كێمتر ژ ھەیڤەكێ مایە، ئەم دێ بەرەڤ بانگەشەیا ھەلبژارتنان چین و ھەر كاندیدەك و ھەر لایەنەك دێ بانگەشەیێ بۆ خوە و قەوارەیێ خوە یێ سیاسی كەت و ئەڤە تشتەكێ رەوایە، لێ یا نەرەوا، ئەم ڤێ بانگەشێ و ڤێ پرۆسا دیموكراسی نە شیرین بكەین و بێ بەھا بكەین.
ئەڤ بێ بەھاكرنا ھەنێ ژی، دەما ئەم رێكێن كرێتكرنا یێ بەرامبەر دگرینە بەر و ناڤزراندنێ ب كەسێن ھەڤرك دكەین، ل سەر حسابا خوە ئینانە پێشێ. بۆ ڤێ ژی، نە بتنێ وی كەسێ بەربژێر، بەلكو جارنا مالباتا وی ژی دكەڤیتە بەر ڤان ھێرش و ناڤزراندنێن نە رەوا و مە نموونە ل ھەلبژارتنێن بوری ھەنە، چاوان ھندەك دھاتنە ھێك بارانكرن، یان دبوونە بابەتێ سوشیال میدیایەكا رێكخستی و ناڤزراندن ب كەساتییا وی دھاتەكرنێ، كو مخابن وێنە دراندن، شێواندنا وێنێن بەربژێرا و تایبەت ل بادینان یا بوویە كەلتورەكێ بەرچاڤ و یا من دڤێت بێژم، ئەڤ نەشیرینكرنا ھەنێ، بێی ئەم ھەست پێبكەین، ناكویێن مە زێدەتر لێدكەت و ژ بەھایێ ڤێ پرۆسەیا دیموكراسی كێم دكەت، كو ئەم كورد ژ ھەمی گەلان زێدەتر، پێدڤی ب دیموكراسیێ و و ئێكدو قەبویلكرنێی نە.
