عەشیرەت ئانکو هۆز، پێکهاتێ رهــ و ریشالێن کومەلگەهێ یە و شانازییا ناسناما مەیا کەسایەتی یە. هەلبەت هەبوونا چەندین هۆزێن جیاواز دناڤا جڤاکێ مەدا، دەربڕینە ژ هەبوونا هندەک کەلتور و نەریتێن جیاواز، هەبوونا دەڤۆکێن جودا. بێگۆمان ئەڤە ژی زەنگینیا فرە ڕەنگ و دەنگێن جودایە و تشتەکێ سروشتی یێ خوداییە.
عەشیرەت پێناسەیەکا پیرۆزا مرۆڤییە بەلێ نەمەزنتر ژ ناسناڤێ مەیێ پیروزێ کوردی وەک کورد
عەشیرەتگەریێ دشێین بکەینە ئالاڤێن پێکڤەژیانەکا جوان و مفای ژ هێز و جیاوازیێن ڤان عەشیرەتان وەربگرین، وەکو رەنگڤەدانەکا شارستانی و پێشکەفتی ب تایبەت د رێکا خۆرتکرنا پەیوەندیێن جڤاکی و خزمایەتی دا، چونکی وەک ئەم نەتەوا کورد نەشێین خو وەک جڤاکەکێ روژئاڤا پێناسە بکەین و خو لادەین ژ رەهــ و ریشالێن عەشیرەتگەریێ. بەلکی یا گرنگ ئەوە ئەم وەک هەڤد و نیاسین سیمایێ ڤێ چەندێ توخبکەین، وەک رێزگرتن ل هەبوونا جیاوازییان هەڤدو بەرز رابگرین، وەکە هێزا هەڤگرتنێ و پێکڤە ژیانێ هەڤدو هەمبێز بکەین، وەکە هێمایێ کومەلگەهەکێ زەنگین ژ چاند و زمان و کەلتورێ کوردەواری ل قەلەم ب دەین.
دیسان عەشیرەت پێناسەیەکا پیرۆزا مرۆڤییە بەلێ نەمەزنتر ژ ناسناڤێ مەیێ پیروزێ کوردی وەک کورد، لەوما یا گرنگ و خالا ل سەر راوەستیانێ ئەوە خو ژ دەمارگیرییا عەشیرەتگەریێ ب پارێزین و نەکەینە ئالاڤێ خو مەزن دیتن ل سەر عەشیرەتا دی، ئەڤ چەندە پاشڤەمانەکا زیقە نەمازە دڤی سەردەمیدا کو عەشیرتگەری ببیتە هێلا هەڤڕکیێن جڤاکی و سیاسی.
ئەڤ چەندە توڤێ کەرب و کین و شەڕەنگێزیێ د ئێخیتە ناڤ چینێن جڤاکی و سەرکێشیێ دکێشیت بو ژێکڤەبوون و پرت پرت کرنا کومەلگەهێ و ئێدی دێ ب عەشیرەتێ خوڕین و دادگەهــ و یاسا ژی دێ رولەکێ لاواز بینن.
راستە دشێین دگەلەک بواراندا مفای ژ عەشیرەتێ وەربگرین بۆ وێ ئێکێ کو ب رێکا کەسایەتیێن زانا و عاقلمەند و خودان سەربوڕ ئاریشێن جڤاکی چارەسەر بکەن، ژبەرکو زور جاران هندەک کێشێن جڤاکی گەلەک مەزن بوینە و گەھشتینە رادێ خینداری و کوشتن و تولڤەکرنێ، لێ ب رێگەچارەیێن عەشائیری چارەسەری ژ بۆ ڤان ئاریشان هاتینە دیتن و ئاگرێن ڤان کێشان زوی تەمراندییە و جارەکا دی ڤیان و براتی و دلوڤانی ئینایە باوەشا ژیانێ.
دڤێت هۆز وەک ستوینا پێکڤەژیان و حەژێکرن و براتی، ستوینا خوەڕاگرتنا جڤاکێ کوردی بۆ بەرەف پێش، نەکو تۆخکرنا سیمایێن عەشیرەتگەریێ بۆ هەڕفاندن و خرابکرنا دیوارێ پێکڤە گرێدایێ ژیانا مە، دیاردا ئەڤرو پتر مرۆڤی دئێشینیت ئەوژی راکرنا ئالایێ عەشیرەتگەریێ ل هەلکەفتان کو ب راستی ژی ئەڤ چەندە دەمارگیرۆیەکا زیقا عەشائیرییە و سیمایەکێ کرێتێ کومەلگەهێ مەیە و دچیتە دخانا پاشڤەمانێدا و ئەڤ چەندە دێ نەوەیەکێ دەمارگیر بەرهەم ئینیت و هەستا پێکڤەژیانێ و هەستا نەتەوەیی ژی دێ لدەف یا لاوازبیت.
