وەرزێ بێھنڤەدانێ و تا دەرگەھێ خوێندنگەیان ڤەدبیت، خوێندكار ل مالێ دمینیت و ژ خواندنێ دھێتە ڤەقەتییان و دەما دبیتە وەرزێ خواندنێ ژی، رۆلێ دەیبابان دھێت، كو زارۆكێن خوە بۆ ڤێ پرۆسەیێ بەرھەڤ بكەن.
راپۆرت: بادینان
ماموستایەك دبێژیت: ھەر ژ نووكە ئەركێ دیبابان دەستپێدكەت، ئەو ژی بەرھەڤركرنا زارۆكی بۆ خوێندنگەهێ، دەمێن وی یێن نڤستنێ و دویرخستنا وی ژ موبایلێ.
ئێك ژ دەیبابێن زارۆكان گوت: «پەروەردە و ھشیاركرنا زارۆكان گەلەك یا نازك و ھەستییارە، ژینگەھا زارۆك تێدا مەزن دبیت، ھەڤالێن زارۆكی و دێ چاوان زارۆك ھەست ب بەرپرساتیێ دكەت، ئەڤە ھەمی بابەتن و دڤێت دەیبابێن خوێندكاران لێ ھشیار بن.
ئازادێ بێ دل زێدەتر گوت: «ئەركێ دەیبابان گەلەكێ گرنگە، ئەو زارۆكێ خوە بەرھەڤ بكەت و ھەر ژ بابەتێ نڤستنا وی، بابەتێ موبایلێ، بابەتێ هەڤالێن وی و یا گرنگ دڤێت دەیباب هاری زارۆكێن خوە بكەن د ئەركێ مال دا و بەردەوام سەرەدانا خوێندنگەهێ بكەن و ل رەوشا وی بپرسن كا ئاستێ وی یێ خواندنێ یێ چاوانە و ئەگەر كێشەیەك هەبیت ژی ب هەماهەنگی دگەل ماموستایان، بهێتە چارەسەركرنێ.
ماموستایەك دبێژیت: «ئەم یێ بەرەڤ وەرزێ نویێ خواندنێ دچین و ئێكەم ئەركێ دكەڤیتە سەر ملێ دەیبابان د راستا زارۆكێن واندا، ئەو موبایلێ ژ زارۆكێن خوە دویر بكەن یان دەمەكێ رێكخستی بۆ دانن و هەر دەما خواندنێ دەستپێكر، دڤێت ب ئێكجاری موبایل ددەستاندا نەمینیت. نیشتمان زوبێر، زێدەتر گوت: «رۆلێ دەیبابان چ ژ رۆلێ ماموستایی كێمتر نینە د پەروەردەیا خوێندکاردا، ژبەركو پەروەردە و زانین تەمامكەرێن ئێكن و ئەگەر دەیباب یێ ھاریكار نەبیت و هەر ژ نووكە دگەل زارۆكێ خوە نەبیت و خواندنێ ل بەر شیرین بكەت، ئەو زارۆكێ یێ بەرهەڤ نابیت و دێ ماموستا گەلەك پێڤە ماندی بیت».
لدوور بەرهەڤكرنا خوێندكاران ژلایێ دەیبابانڤە، ماموستایەك دبێژیت: «ھەر ل دەستپێكا وەرزێ خواندنێ، ئەم ل كارگێڕییا خوێندنگەهێ، كومبوونەكێ دگەل دەیبابێن خوێندكاران ئەنجامددەین، ئەگەر دەیباب د ھاریكاربن، دێ زارۆكێن وان زێدەتر ب خواندنێ ڤە هێنەگرێدان». لدوور ئەركێ دەیبابان دنوكەدا، ماموستا حازم حسێن زێدەتر گوت: «دڤێت ھەر ژ نووكە دەمێ نڤستنا زارۆكی بهێتە رێكخستن، بەرهەڤكرنا كەلوپەلێن وی یێن خواندنێ و خشتەكێ رێكۆپێك بۆ بهێتە دانان و یا گرنگ ژی، دڤێت دەیبابان ئاگەهی ژ زارۆكێن خوە و موبایلێ هەبیت و ئەو دیڤچوونا زارۆكێن خوە بكەن، كا هەڤالێن وی كینە و دڤێت دەیباب بۆ خوە بكەنە بەرنامە و حەفتیێ جارەكێ ئێك ژوان سەرەدانا خوێندنگەهێ بكەن «.
