دیدار: بادینان
گەلەك رەوشەنبیر و ناڤدار و زانایێن كورد هەنە، مخابن بەرهەمێن وان نەهاتینە چاپكرن و گەلەك ژ وان یێن هاتینە ژبیركرن و بەرهەمێ وان ژی دگەل ناڤێ وان دهێتە ژبیركرن.
مەلا یاسین رێكانی كو بەرهەمەكێ شیعری یێ باش ل پاش خوە هێلایە، خوشبەختانە نەڤیێ وی جەگەر كەمال رێكانێ خوە لێ دكەتە خودان و دیڤچوونێ بۆ دكەت و ژیانا وی و هەلویستێن وی یێن و دەستنڤیسێن وی، دناڤ پەرتووكەكێ دا چاپ دكەت.
بۆ نزیك ھایداربوون ل سەر ڤێ پەرتووكێ، نڤیسەرێ وێ دبێژیت: «ئەڤ پەرتووکە ل دۆر ژیاننامە و هەلویستێن وێرەکانە یێن زانایێ راستگۆ و نشتمانپەروەر (مەلا یاسین رێکانی)یە، کو ناڤهاتی ئێک ژ کەسایەتیێن ناڤدارێن دەڤەرا بەهدینانە و ل سالا (1934) ل گوندێ (بەنستان) هاتییە سەردونیایێ و ل 2005 وەغەرا دووماهیێ کریە و ل گورستانا شێلادزێ هاتیە ڤەشارتن».
جەگەر كەمال زێدەتر گوت: «مەلا یاسین ژ بلی کو زانایەکێ ئایینی یێ بەرکەتی بویە، دهەمان دەمدا ئەو هەلبەستڤانەکێ ژێهاتی و دەستهەل ژی بوویە و خودان هەستەکا نەتەوەیی یا بهێز بوویه، هەمی قوناغ و کارێن وی ل گوندێ وی بەنستان، بامەڕنێ، شێلادزێ، دهۆک، موسل، بەغدا بووینە و مە دڤێ پەرتووکێدا بەحسێ چەندین هەلویستێن وی یێن نەتەوەیی کریە.
مەرەم ژ بەرهەڤکرنا ڤێ پەرتووکێ، ئەوبوو کو ئەم خەبات و ماندیبوونا ڤان کەسایەتیان ژبیرنەکەین و شانازیێ پێ بکەین، چونکی ئەو ستێرێن گەشن ل ئاسمانێ شانازیا مللەتێ مە و فەرە دیرۆکا وان بهێته ئەرشیفکرن و بۆ بەرەبابێن داهاتی بهێتە دیارکرن.
لدوور پەرتووكێ و قەبارێ وێ جەگەری گوت: «پەرتووک ژ چاپکریێن پارێزگەها دهۆکێ و هەماهەنگی دگەل رێڤەبەریا راگەهاندن و چاپ و بەلاڤکرنێ یە و ل سەر شەش تەوەران هاتییە دابەشکرن و 290 لاپەران ل قەبارێ 17×24 بخۆڤە دگریت.
دیزاینا بەرگی ژ لایێ کاک مللەت محەمەد ڤە بۆ هاتیە کرن و تیپلێدان و دەرهێنانا ناڤەڕۆکێ هەر من ب خۆ بۆ کرییە».
