سەردار هێتوتی
دهوک، خالا پێکڤەگرێدانا سێ پارچەیێت ئاخا کوردستانێیە. ئەو دیالکتا خەلکێ دهۆکێ پێ دئاخڤیت، دشیاندایە ببیتە دیالکتا سەرەکی بۆ زمانێ ستاندەرد یان جۆت ستاندەرد، چونکی هەموو خەلکێ کوردستانێ ژڤێ دیالکتێ فێم دکەن. د مالکا کورمانجی دایە و سۆرانی زمانێت هەولێرێ و هژمارەکا باش یا خەلکێ دیتر ژی ژێ فێم دکەن. بەس دپرسم بۆچی هەتا نوکە هێزا ئەدەبیاتێ ل دهۆکێ د خالەکا لاوازدایە؟ بۆچی دهۆک نەشیا بیتە ناڤەندا کۆمڤەکرنا ئەدەبنڤیسێت کورد؟ ئاراستێ ئەدەبیاتێ ل دهۆکێ بەرەڤ کیڤەیە؟ ب دەهان پرسیارێت دیتر ژی خۆ د سەرێ مرۆڤی دا لڤینن.
ل پارێزگەهێ هژمارەکا هەرە مەزن و بەرچاڤ ژ نڤیسەرێت بیاڤێ ئەدەبیاتێ وەک (چیرۆک، کورتە چیرۆک، رۆمان و هەلبەستان) هەنە، شیاینە ب بەرهەمێت خۆ ببنە خۆدان ناڤ، وان دەست نەداهێلانە و هێشتا ژی ب پشتەکا کۆڤل یێ دمەشن.
پاکی یە ناهێلیت دهۆک رۆلێ خۆ بگێریت؟ مانێ ل ڤێرە فیلمە فێستیڤال ساڵانە بڕێڤە دچیت و ب ملیۆنان دینار ژێ دهێنە مەزاختن، پا بۆچی فێستڤالەکا وەکی یا گەلاوێژ ل دهۆکێ ناهێتە بڕێڤەبرن؟ دگەل کو دڤێت رۆلێ وان دساڵێت بووری دا بلند بنرخینین، لێ دڤێت ل سەری کار بۆ سەر ژنوو ئاڤاکرنا ئێکەتیا نڤیسەران بهێتەکرن، دڤێت کەسێت خۆدان هێز و حەز و شیان، یێت سەردەمانە بکەڤنە د رێزێت بڕێڤەبرنا ڤێ ئێکەتیێ دا، هەروەسا کار لسەر وەزارەتا رەوشەنبیری بهێتەکرن کو دهۆک چ کێمتر نینە ژ سلێمانیێ و سنە، کو هەر ئێک ژ وان بووینە ناڤەندێت ئەدەب و موزیکێ.
نڤیسەرێت دهۆکێ ئەڤێت خەمخۆر بێی پاراستنا بەرژەوەندێت بەرتەسکێت هەڤالینیێ رابنەڤە و بکەڤنە د قادا خزمەتا ئەدەبیاتا کوردی، دا ل ڤی باژێرێ جوان و دهۆکێ بکەنە ناڤەندەکا کوردستانی بۆ ئەدەبێ کوردی.
راستە هندەک کارێت جوان هاتینەکرن، خەلکەکی خۆ پێ وەستاندییە، وان ڤیایە دهۆک یا هیشیاربیت، لێ دیارە ئەوێت دبیاڤێ ئەدەبی دا بریار بدەست نەشیاینە یان نەڤێت یان رێگرن بۆ هندێ ل باژێرێ جوانیێ نڤیسەرێت کوردێت هەر چار پارچا ئێک بگرن و ب کوردی ب بەژن و بالا کورداتیێ بێژن.
فەرە بودچەیەکێ تایبەت بۆ بەرهەمێت ئەدەبی ل ڤێ پارێزگەهێ بێتە دەستنیشانکرن و فەرتر ئەوە، دەولەمەندێت دهۆکێ بهێنە تێکخستن و پشتگیریێ ژ بەرهەمێت نڤیسەرا بکەن، چونکی پتریا داهاتێ وان ژ سایا ئەولەهیا کوردستانێیە.
من هیڤیە د سالێت بهێتدا، دهۆکێ ل ریزا باژێرێت جیهانی یێت گرنگیێ ب ئەدەبیاتێ ددەن ببین.
