ئا: ئه‌یاز هه‌ركی
ئەگەر بەرواریا ب سێڤێن خوە یێن سۆر یا بەرنیاس بیت و ئەرمشتێ ب هنارێن خوە یێن مز، پێنەڤێت ئاكرێ ب هژیرێن خوە ل پێشە و نە بتنێ ل بادینان، بەلكو ل سەرانسەری هەرێما كوردستانێ. پرسیار لڤێرە، ئایا نهێنییا ناڤودەنگییا هژیرا ئاكرێ چییە؟ بۆ بەرسڤدانێ ژی ئێك ژ خەلكێ ئاكرێ و فرۆشیارێن هژیرا بڤی رەنگی بەرسڤێ ددەت: «بێگۆمان باژێڕێ ئاكرێ ب هژیرێن باش و ب تام یا ناڤداره و جۆداهی دگه‌ل هژیرێن ده‌ڤه‌رێن دی یێن كوردستانێ هه‌یه. دڤی وەرزێ چێبوونا هژیراندا و تایبەت ئەڤێن گەشتا ئاكرێ دكەن، كەس ناڤەگەریتە دەڤەرا خوە ئەگەر سەلكەكا هژیران دگەل خوەدا نەبەت، چ بۆ دیاری بن یان بۆ وان بخوە».
سەبارەت ب جورێ هژیران، ئەڤێن زێدەتر حەز ل سەر هەی، كا كیشكن؟ عەلی ئاكرێیی گوت: «ل ده‌ڤه‌را ئاكرێ چه‌ندین جۆرێن هژیران هەنە، لێ هژیرێن ب ناڤودەنگ، وه‌ك هژیرا (یه‌حیا به‌گ و شاكری و سۆرخاڵ) و ئەڤە ژی ژ جۆرێن باش و ب تامن».
دەما مە پرسیارا بهایێ هژیران ژێكری، ڤی فرۆشیاری گوت: «دەما شنوی هژیر دەركەفتین و بۆ خێڤەی داخوازی ل سەر هەی، كیلو ب (16) هزار دیناران هاتیە فرۆشتنێ، لێ نووكە یێن ئەرزان بووین، ژبەركو وەرزێ چێبوونا وێیە».
