وەلات ئەحمەد ئورەماری
رەنگە ئەم هەمی تورێن كومەلایەتی بكار دئینین، هەر ئێك ژ مە لدوڤ حەزا خوە تێكەلیێ دگەلدا دكەت و هندەك دەمێ خوە یێ ڤالا پێ تژی دكەن و هندەك ژی پەیوەندیێن خوە یێن كومەلایەتی پێ بهێز دكەن و هندەكێن دی ژی پێزانینان لدەف خوە زێدە دكەن. ژبەركو ژی چ سانسورەك ل سەر سوشیال میدیایێ بگشتی نینە، هەمی كەس دشێن بكەڤنە ناڤ و پوستان بلاڤ بكەن و كومێنتان بنڤیسن و بابەتان لایك بكەن و سەرەرای وان هەمی بابەتێن جوان یێن دهێنە بلاڤكرنێ و مفا بەخش، لێ هەمی گاڤان بابەتێن دهێنە ئازراندن ب دلێ هەمیان نابن. بوویە گەلەك جاران دێ پەیڤێن كرێت كەنە بەرچاڤێن مرۆڤی! ئەرێ مە مافێ ڤێ چەندێ هەیە ئەم ناڤزراندنێ بەرامبەر كەسێن دی بكەین، ژبەركو هزركرنێن مە وەك یێن وان نینن؟ باشە خوە ئەگەر هزرێن مە ژی وەك ئێك نەبن، بوچی ئەم پەنایێ بۆ پەیڤێن كرێت دبەین و هەستێن ئێك و دوو بریندار بكەین؟! ئەڤ چەندا هەنێ ژی بێی ئەم هزرێ تێدا بكەین دبیتە ئەگەرێ شكاندنا هەستان و پەیڤا تە یا جوان بیت بەرامبەر كەسێن دی، ئەڤە بۆ تە نیشانا هێزەكا مەزنە و دڤێت ژبیر نەكەین ژی هەمی كەس دشێن ئاخفتنێن كرێت بێژن، لێ هەمی كەسن نەشێن خوە ل بەر وێ كریتێیێ بگرن!.
هەمی كەس دشێن ئاخفتنێن كرێت بێژن، لێ هەمی كەسن نەشێن خوە ل بەر وێ كریتێیێ بگرن!
هەروەسا دڤێت بزانین ئەو پەیڤێن كرێت، ئەو نیشانا بێ هزرییا تەیە و ئەڤە دگەل هندەك جورێ مرۆڤان یێ هەی كو دێ پێش وەخت بێژن ئەڤ مرۆڤێ هەنێ یێ دەق شكێنە یان ئەزمانێ وی یێ رەشە و هیڤیدارم شووینا ئەم رەق دگەل ئێك باخڤین و سەرەدەریێ بكەین، ئەم ب جوانی، رێزگرتن و ئێك دوو قەبیلكرن دگەل ئێكدا بین و ئەڤە بۆ مە هەمەییان وەسانە. رەنگە هەر ئێك ژمە هندەك كێماسی د رەفتارێن خوەدا هەبن چ دگەل هەڤالێن خوە یان كەس و كارێن خوە یان ژی تا دگەل كەسێن بیانی و هیچ جارەكێ ئەڤ جورێ رەفتارێ رەنگێ مرۆڤی د چاڤێن كەسێن بەرامبەردا جوان ناكەت و بەرۆڤاژی خەلك دێ خوە ژ مرۆڤی دەتە پاش.
