باوەری ب ئەنجامێن هەلبژارتنان، مەزنترین كوسپەیە ل بەرامبەری لایەنێن هەڤرك و دەنگدەری بخوە ژی. رەنگە ئەڤا ئەز ژێ بەحسدكەم، زێدەتر بۆ كومەلگەهێ مەیێ كوردی بیت و تایبەت ژی ل هەرێما كوردستانێ و گومانا هاوولاتییا یا بەردەوام، ل سەر پاقژییا رێڤەچوونا ڤێ پرۆسێ، بخوە و دەما ئەنجام بدلێ وی دەرنەكەڤن. دێ بینی گەلەك هاوولاتییان ترس و گومانا هەی، یاری ب دەنگێن وان بهێتەكرنێ، یان دەنگێن وان بهێنە دزین و نەهێنە ھژمارتنێ، یان سندوق ب دەنگێن ساختە بهێتە تژیكرنێ، یان كرین و فرۆشتن ب دەنگان بهێتەكرنێ و چەندین ترس و گومانێن دی، كو وی پاشگەز بكەن، ئێك باوەری ب ئەنجامێن دەنگان نەهێت و دوو پێشوەخت بریارا خوە بدەت نەچیتە دەنگدانێ!
سەرەرای ڤان هەمی ترس و دوودلی و گومانان، دڤیابا ئەو یێ گەشبینتر بیت بۆ چوونا دەنگدانێ و دەنگێ خوە ب ئازادانە بدەت، ژبەركو ئەڤ گەرا هەلبژاتنان، گەلەك جوداترە ژ یێن دەرباز بووی و ئەڤە ژ گەلەك روویانڤە هاریكارە، كو د بەرژەوەندییا دەنگدەری بخوەدا بیت، ژروویێ بەلانسا سیاسیڤە دێ گوھورین هەبن، شوینا ئێك بازنەیێ هەلبژارتنان، نوكە هەرێما كوردستانێ ل سەر چوار بازنەییان هاتییە دابەشكرن و ئەڤ دابەشكرنە ژی ژ گەلەك روویانڤە باشە، ژ روویێ دەستنیشانكرنا بەربژێری، قەوارێ سیاسی ل بەربژێرێ گونجای بگەریت كو باوەرییا خەلكی بدەستڤەبینیت.
ژ روویێ خزمەتكرنێ ڤە، قەوارەیێن سیاسی پێگیردكەت بەرنامێ خوە دارێژیت كو خۆشگوزەرانیێ بۆ هاوولاتی دروست بكەت و وەك دەنگدەرێ ھشیار ژی، راستی مە پەرلەمانەكێ بهێز دڤێت، خوە ل كێشەییێن سیاسی بكەتە خودان.
وەك ئەم دبینین، كێشێن هەڵویستی یێن چووینە د قوناغەكا نویدا، چ دگەل حكومەتا مەركەزی بن یان ژی دگەل وەلاتێن هەرێمی بن و كی بەرپرسە ژ بەرسینگرتنا ڤان كێشەییان؟ پێنەڤێت، بەشەكێ وێ یێ گرنگ دەنگدەر بخوەیە و دڤێت وی ئەو باوەری هەبیت، دەنگێ وی دێ گوھورانكاریێن سیاسی، بەلانسا سیاسی دروست كەت و دڤێت دەنگدەر نەكەڤیتە بەر سوزێن نەبەرئاقلێن قەوارەیێن سیاسی و نەژی بكەڤیتە بەر سوزدارییا عەشیرەتێ و بنەمالێ و چەند ئەو دەنگێ خوە بدەتە بەرنامەیێن باش و قەوارەیێ سیاسییێ باش، ئەو یێ ئایندەكێ باش گەرەنتی دكەت.
