فەوزی ئورەیی
هەلبژاردن پرۆسەیەكا دیموكراسییە و پرانییا وەلاتێن باوەری ب دیموكراسیێ هەین، پێگیریێ پێ دكەن و دناڤ دەستوورێ وان وەلاتاندا، دەولەت دهێتە نەچاركرن، ئەنجامێن دەنگدانێ پەسەند بكەت و خۆشبەختانە ئەڤ پرۆسەیە ل هەرێما مە ژی دهێتە ئەنجامدان و لدویڤ ئەنجامێن دەنگدانێ، حكومەت دهێتە پێكئینان و جڤاتا پارێزگەهێ دهێتە پێكئینان و هەلبژارتن باشترین رێكارن بۆ دیموکراسیبوونێ ل هەر وەلاتەكی و هەر گوھورانكاری و پێشڤەچوونا پەیدا ببیت ژی، دێ هەر برێكێن هەلبژارتنان بیت.
كەسێن خودان باوەرنامە، كەسێن لێهاتی و خودان شییان نەشێن ركابەریێ بكەن، ژبەركو رەنگەكێ دییێ ركابەریی یێ دروست دبیت
لێ پرسیار لڤێرە ئەڤەیە، ئایا پەنابرن بۆ عەشیرێ و كرینا دەنگان ب پارەی و پێدانا دەستكەفتان، دێ هەمان ئەنجام هەبن؟ هەرچەندە رەنگە ھندەك كەس هەبن بێژن، ئەڤە مافێ هەر قەوارەكێ سیاسییە ب هەر رێكا هەبیت دەنگێن خوە زێدە بكەت.
لێ یا دروست، هەر كەسەك لدویڤ شیانێن خوە، لێهاتییا خوە بشێت كەسەكێ چالاك بیت و باوەرییا پترین خەلك بدەستخوەڤە بینیت، ئەو بهێتە هەلبژارتن و سەرەرای كو ئەڤ چەندە لدەف مە ناهێتە دیتنێ، كەسێن خودان باوەرنامە، كەسێن لێهاتی و خودان شییان نەشێن ركابەریێ بكەن، ژبەركو رەنگەكێ دییێ ركابەریی یێ دروست دبیت و ئەڤ پرۆسا ئەم ب دیموكراسیێ ب ناڤ دكەین، دیموكراسییا مە هەمی دكەڤیتە بەر گومانێ و دێ بینی شوینا ركابەری ل سەر شیانان بیت، ركابەری ل سەر خزمەتكرنێ بیت و كی یێ باشە بچیتە پەرلەمانی، حزبێن مە جورەكێ دییێ ركابەریێ یێ دروستكری، دناڤ عەشیرەتێ بخوەدا، یان كو رۆلێ ڤی كەسی دناڤ عەشیرەتێدا زێدەترە ژ ئەڤێ دی و دەرئەنجام ژی، شوینا ئەم دەرگەهەكێ دیموكراسیێ ڤەكەین، حكومەتێ لدویڤ وێ پرۆسا دیموكراسی پێكبینین، ئەم دەرگەهێ ركابەریێ و نەڤییانێ دهێلینە ل تاق، ئەم یێ مللەتێ خوە بەرەڤ تونێلەكا تاری ڤە دبەین، ژبەركو دلمان دناڤبەرا كەساندا دروست دبیت، دناڤبەرا بنەمالاندا و دناڤبەرا گونداندا و دناڤبەرا عەشیرەتاندا و پرسیار ئایا ئەڤە بوچی؟
