بلبل شێخ عەبدوڵڵا: دا مە پەرلەمانەكێ بهێز هەبیت، دڤێت پەرلەمانتارێن بهێز هەبن

هەر كەسێ بەرنامەیەكێ وی دیتبیت، دێ زانیت كەسەكێ چەندێ ئازایە و چاوان دەستێ خوە ددانیتە سەركێشەییان، تایبەت ئەو كێشێن گرێدایی ژیانا رۆژانە یا خەلكی. دەما مە گوتیێ، خەلك ئەندامێن پەرلەمانی وەسا ناسدكەن، بتنێ بەرنامێ حزبێن خوەیێن سیاسی برێڤە دبەن و هەر گاڤا لایەنێ وان یێ سیاسی گوتێ دەستێ خوە بلند بكەن، ئەو بلند دكەن؟ گوت: «پەرلەمان نە بتنێ ئەو تشتە یێ دناڤ ھولا پەرلەمانیدا دهێتە دیتن، پەرلەمان ل سەر چەندین لیژنان یێ دابەشكرییە و تا یاسایەك دچیتە ناڤا ھولا پەرلەمانی بۆ دەنگدانێ ل سەر، دكەڤیتە بەر چەندین كێشە و بێشان و ئەگەر ئەندام پەرلەمان ل سەر بنەمایێ عەشیرێ و دەنگێ حزبێ بتنێ گەھشتبیتە پەرلەمانی، ئەو دێ چاوان شێت دیتنا خو ل سەر بابەتان دەت! وەك ئەم دزانین، بابەتێن سیاسی بتنێ دناڤ پەرلەمانیدا دكەڤنە بەر ئێكلاكرنێ و ژخوە بابەتێن دی كو ب ژیانا خەلكی و ئایندێ وی یێ رەوشەنبیری و كومەلایەتی و ئابوریڤە د گرێدایی، ئەو هەمی دناڤ لیژناندا دهێنە شرۆڤەكرن و ئێكلاكرن و ژلایەكێ دیڤە، ئەو ئەندام پەرلەمانێ دەنگان دكریت، دێ چ ئومێدەك هەبیت ئەو بشێت گوھورینان بكەت؟

دیدار: بامەرنی

*بلبل شێخ عەبدوڵڵا ب پێشكێشكارەكێ وێرەك دهێتە ناسكرنێ، دێ شێی بەحسا كارێ خوە یێ راگەهاندنێ كەی؟ 
-هەر ژ سالا 2005ێ وەرە ئەز هاتیمە ناڤ راگەهاندنێ و كارێن من ل دەستپێكێ دگەل (تەلەفزیونا PUK  بوو، من وەك پەیامنێری كار كرییە، فلمێن بەلگەیی، بەرنامێن راستەوخو یێن جڤاكی و یێن ساخلەمی و من دگەل تەلەفزیونا گەلێ كوردستان یا عەسمانی كاركرییە و پاشی دگەل بادینان سات و بەرنامێ ئێڤارا بادینان، كو بۆ ماوێ (4) سالان ل سەر ئێك من پێشكێشدكر، ئەوی بەرنامەی سەدایەكا مەزن دناڤ بینەریدا دروست كر و ئەو بەرنامە ژ بەرهەڤكرن و پێشكێشكرنا من بوو.
*تە بەحسا بەرنامێ ئێڤارا بادینان كر، جوداھییا وی دگەل بەرنامێن دی چبوو؟
-بەرنامێ ئێڤارا بادینان، ئێك ژوان بەرنامان بوو، یێ شیایی بینەرەكێ مەزن بۆ تەلەفزیونێ دروست بكەت، ژبەر وان بابەتێن مە تێدا د ئازراندن، هەمی رۆژان مە كەسەكێ بەرپرس مێهڤان دكر و مە دئێخستە بەر پرسیاران، مە دانوستاندن ل سەر بابەتان دكر، هەمی بابەت مە بەحس دكرن، هەر بابەتەك ژی لدویڤ تایبەتمەندییا وی كەسی بوو یێ مە مێهڤان دكر.
*تە گوت مە كەسێن ئێكێ، رێڤەبەر و بەرپرسێن حكومی مێهڤاندكرن، ئایا ئەڤێن هەنێ لدویڤ داخوازییا وە دهاتن؟
-هاتنا وان یا ب ساناھی نەبوو، گەلەك دهاتن ژی و دگەل مە دكەفتنە دانوستاندنێ و بەحسا كار و چالاكیێن خوە دكرن و راستی بیت، گەلەك نەدهاتن یان خوە ژ داخوازییا مە ڤەدزین و هەبووینە گوتییە دێ ئامادە بم و ل خولەكێن دووماھیێ ژ دەستپێكرنا بەرنامەی ئامادە نەبوویە و مە كورسییا ڤالا ل جهێ وی هێلایە و مە تەلەفون وەرگرتینە و مە گلە و گازندێن خەلكی وەرگرتینە و ئەو پرسیارە هەمی بۆ وی د ئاراستەكری بوون و سەد پرسیار و گومان ل دەف وی و جهێ وی دروست دبن، ئەڤە ژی ب خرابی ل سەر وان بخوە دزڤری، ژبەركو ئەو رێڤەبەرە و دڤێت ئەو بەرسڤا گلە و گازندێن هاوولاتییان بدەت و ئەگەر كێماسییەك ل رێڤەبەرییا ئەو لێ هەبیت، ل سەر وی پێدڤییە ئەو ئەگەران دیار بكەت و هەبوویە ژی هاتییە بەرنامەی و پشتی بەرنامەی ب چەند رۆژان ژ جهێ وی هاتییە لادان، بتنێ كو د بەرنامێ مەدا بەشداربوو.
*پرسیارا هەردەم هاوولاتییان مژویل دكەت، ئەرێ چاوان بلبل دشێت ڤان بابەتان ب ئازرینیت، ما ئەو ژخوە ناترسیت، ما كەس وی ناگریت؟
-دەمێ تە بڤێت پەیامەكێ بگەھینی و هاوولاتی ل سەر مافێن وی بینییە سەرخەت و رایا گشتی ل سەر بابەتان دروست بكەی، پێنەڤێت دێ بەرژەوەندیێن ھندەكان تێكچن و هەمی بابەت بدلێ دەستهەلاتێ نابن، لڤێرە ژی یان دڤێت خوە بێدەنگ بكەی، یان ژی وێرەكییێ بدەیە خوە و ل مافێن خەلكی بگەری و ژڤێ لێگەریانێ، بەلێ چەندین جاران ژلایێ دەزگەهێن ئەمنیڤە ئەز یێ هاتیمە گازیكرن و گرتن و بدەستێن ھندەكان ئەزیێ هاتیمە قوتان ژی و هەبوویە بەرپرسێ مەلبەندی تەلەفوونا من كریە و گوتیە من وەرە مالا من یا تایبەت و ئەڤ شەڤە قەستا مالا خوە نەكەی.
*تە بەرنامێ خوە چاوان بەرهەڤ دكر؟
-مە تیمەك هەبوو، ژ بۆ حەفتیێ هەمیێ مە پلانا خوە دادرێشت، مە ب مێهڤانێ خوە رادگەهاند و هاوولاتی پەیوەندی بمە دكرن كا ئەم چ پرسیار دگەل ب ئازرینین، ب راستی ژی گازندەیێن خەلكی، گەلەك كێم و كاسی هەبوون، خزمەتگوزاری د گەلەك بیاڤاندا د كێمن و دادپەروەری نینە و كێشا مەزن، هاوولاتی یان نەدگەھشتە جهێ مەبەست یان رێ پێ نەدهاتە دان گلە و گازندێن خوە بگەھینیت.