زێدەتر ژ (50) توخمێن تری ل فێستیڤالا تری و ھنگڤینی هاتبوونە نمایشكرن

هاوولاتیەكی گوت: ژنوی من ئەڤ هەمی جورێن تری دیتن و دبێژی ئەز نە خەلكێ پارێزگەها دھوكێ مە. نە بتنێ ڤی هاوولاتی، بەلكو گەلەك ژوان كەسێن ل فێستیڤالا ئەڤ سالە یا تری و ھنگیڤینی ئامادە بووین، سەرسورمانیا خوە ژ ڤان هەمی توخمێن تری دیار دكر و دڤییان هەر چ جورەكێ هاتییە نمایشكرن، تام بكەن، خوە هەكە ب خارنا تلیەكا تری بتنێ ژی بیت. ژخوە ھنگڤین لایەنەكێ دی یێ فێستیڤالێ بوو و ھنگڤینیێ دەڤەرا چیایی، ھنگڤینێ دەشتێ و چەندین جور و تشتێ خۆش. 
فرۆشیارەكی ژی گوت: ئەڤ جورە فێستیڤالە بۆ پارێزگەها مە د گرنگن، نە بتنێ بۆ نمایشكرنا بەرهەمێ جوتیاران، كو پارێزگەها دھوكێ ب جوگرافییا خوە یا چیایی یا بەرنیاسە و ئەڤە ژی هاریكارە بۆ بەرهەمئینانا چەندین بەرهەمێن جووتكاریێ و دا ژ نزیك سەروبەری ڤێ فێستیڤالێ بزانین، چەند جووتیار، چەند جورێن تری، كێ مافێ بەشداریێ هەبوو و كێ نەبوو، دگەل مەدا (د. ئەمجەد عوبەید) رێڤەبەرێ باغداریێ ل دھوكێ.
دیدار: رۆژڤان

*ئەڤە چ فێستیڤال بوو و گرنگییا وێ بۆ دھوكێ د چ دایە؟
-ڤان جورە فێستیڤالا گەلەك مفایێن خوە یێن هەین، ئەگەر بەحسا سەقایێ دھوكێ بكەین، بۆ ڤان هەردوو بەرهەمان (تری و ھنگڤینی) گەلەك یێ گونجایە و ئەگەر جووتیار زێدەتر چاڤێ خوە بدەتێ، دێ بەرهەمێ باش و ب كوالیتەكا باش دەركەڤیت و سەبارەت فێستیڤالێ ئەڤە خولا (17) بۆ و سال بۆ سالێ بەرهەمێ باشتر و پویتەدانەكا باشتر پێ دهێتەدان.

*چ لایەن تێدا د بەشدار بوون؟
-بۆ فێستیڤالەكا ھوسا، چەندین لایەن خوە لێدكەنە خودان، فێستیڤال ل ژێر سەرپەرشتییا رێڤەبەرییا باغداریێ بوو و پشكا شیرەتێن چاندنێ و پشكا پاراستنا دەرامەتی یێن گرێدایی رێڤەبەرییا چاندنێ و ب سپونسەرییا فاملی مول و پارێزگەها دھوكێ و دەزگەهێن مە یێن راگەهاندنێ ژی ریكلامەكا باش بۆ كرن، جووتیار بخوە ژی لایەنەكێ سەرخستنا ڤێ فێستیڤالێ یە، ئەگەر ئەو نەبیت فێستیڤال دێ یا لەنگ بیت.
*كێ ماف هەبوو بەرهەمێ خوە نمایش بكەت و بۆ مە بەحسا جورێن تری و ھنگڤینی بكە، ئەڤێن د فێستیڤالێدا هاتینە نمایشكرن؟
-بۆ بەشداریێ مە لیژنە هەبوون و دڤیابا ئەڤ جووتیارێ حەزا بەشداربوویێ هەی، بەرهەمێ وی لدویڤ ستاندەردێ مەبایە و ئەگەر مە بەرهەمێ باش ل جهەكی دیتبایە مە ژ خودانێ وێ داخاز دكر بۆ رۆژا فێستیڤالێ بهێلیت و بۆ ئەڤ سالە (20) جووتیارێن تری و (20) هەنگەڤانان بەشداری كربوو و هەرچەندە ل دھوكی نزیكی (90) توخمێن تری هەنە، لێ زێدەتری (50) توخمێن تری هاتبوو نمایشكرن و ئەو ھنگڤینیێ هاتیە بەشداریكرن، هنگڤینیێ چیایی بوو و یێ داران بوو و یێ ب خودانكرنێ ژی بوو.

*هندەكان گازندە هەبوون كو گەلەك ریكلام بۆ نەهاتبوو كرن، مەبەست ژێ كو خەلكەك ژ دەرڤەی پارێزگەها دھوكێ بزانیت كو ئەڤ جورێ فێستیڤالێ دێهێتە گێران؟
-ئەز بەرۆڤاژی دبینم ژبەركو ریكلامەكا باش بۆ هاتبوو كرنێ، چ ژلایێ فاملی مول بخوەڤە، یان رێڤەبەری و ئەو پشكێن مە ژێ بەحسكری و بەلگە ژی مە مێهڤان هەبوون چ ل ناڤ باژێری یان دەرڤەی باژێری و تا ژ بەسرا ژی هاتبوون.

*وە ل بەر نینە فێستیڤالێ ببەنە جهەكێ گشتی تر، بۆ نموونە ل سەنتەرێ باژێری بهێتە گێران و رۆژێن فێستیڤالێ ژی بهێنە زێدەكرن؟
-ئەم بەینە جهەكێ گشتی، وەك پاركا نەوروز، دا دەرفەت بۆ جووتیاران هەبیت زێدەتر بەشداریێ بكەن و بەرهەمێ خوە ب فرۆشن ژی و سەرەدانكەر ژی زێدەتر لێبهێن و شینا رۆژەكێ بلا سێ رۆژ بن و ئێك پێنەحەسابیت كەسەكێ دی ژی ئاگەهدار بكەت.