تفەنگ نائومێد نابێت!

حەسەن جومعە

1
لەوەتەی کەوتوومەتە قوژبنێکی
ئەم گەردوونەوە
لەسەر پشتی نهێنییەک
راکشاوم!
2
گشت ئێوارەیەک،
دڵم لە باخچەیەکی غەمگیندا
جێدەمێنێت و
جەستەیشم بەرەو کۆڵانێکی هەمیشە بێدار
رێ دەگرێتە بەر

3
پەنجەرەکەم گیرۆدەی قووڵترین تاریکییە
هەر بۆیە رووناکیم
بۆ شرۆڤە ناکرێت.

4
وەختێک شەو دادێ و
چۆلەکەکانی سەردار قۆخی حەوشەکەمان
لە جریوە دەکەون
تەنیایی دووبارە بەر شانم دەکەوێ.

5
هەر جارێک 
کە ئاوڕ لە کاتژمێر دەدەمەوە
هەست دەکەم
هەنگاوێکی تر لە مردن نزیک دەبمەوە.

6
دیمەنی هەموو جەنگەکان
لە چاوەکانی مندا
کۆتاییان دێت، ئیدی من چۆن فریای
پێکەنینێک بکەوم!

7
کە بیر لە گیانەڵای باڵندەیەکی بەندکراوی 
نێو قەفەس دەکەمەوە
لە نێو گریانێکی بە خوڕدا 
دەتوێمەوە.


8
تا پەتی سێدارە 
لە فەرهەنگی مرۆڤدا نەسڕێتەوە
من پێیەکانم لەم قوڕی
 شیوەنە دەرناهێنم.


9
هەمیشە دەڵێم:
تاکو سنوور شەڕی گەورەی نێوان
مرۆڤەکان بێت
ئەوا تفەنگ هیچ کات
نائومێد نابێت!