جەمال بەرواری
قوناغا بەری سەرھلدانێ، بهەمی رەنگەكی جوداھییا خوە هەبوویە ژ قوناغا پشتی سەرهلدانێ و دێ هەولدەم د تەمەنێ خوە یێ رادیوویا بەغدادا، ھندەك وێستگەهێن خوە دگەل هونەرمەندێ مەزن (تەحسین تاها) بەحس بكەم، كو رەنگە گەلەك كەس ڤان نهێنییان نەزانن، ئەوژی، كێ سترانێن تەحسین تاهای ل ئێزگێ كوردی ل بەغدا قەدەغەكرن؟ پەیڤێن كێ بوون تەحسین تاها گەهاندییە گوپیتكێ؟ تەحسین تاها بوچی ل غەریبییا وەغەر كر؟
ژیێ من دناڤ ئێزگی رادیویا بەغدادا 30 سالێن كاركرنێ بوو، چەند تەحسین تاها هاتبایە بەغدا، مە چاڤ ب ئێك دكەڤت و چ سترانەكا وی نەهاتیە قەدەغەكرن، بتنێ سترانا (دستار) نەبیت، پەیڤێن وێ ژی یێن شاعیرێ مەزنێ كورد (د. بەدرخان سندی) بوون و بۆ ماوێ چار سالان و رۆژانە مە سترانا دستار ددانا سەر ئێزگەی و ڤێ سترانێ تەحسین تاها گەهاندە گوپیتكێ، مخابن هندەك كەسێن دیڤەلانكێن رژێمێ، راپۆرت ل سەر ڤێ سترانێ بلندكرن و هاتە قەدەغەكرن و ئەڤەژی هندەك ژ پەیڤێن (دستاری):
بهێرە دستار
بهێرە دستار بهێرە بهێرە
خەمێت مە گەلەك گرانن
دەنگێ دستاری گرینە و نالێنە
ئاخ و فیغان و هەوارن
دستار و دێ تو بگێرینە
خەم و دەنگێ تە هەڤالن
جارەكێ خەما بهێلە
ما نابی جارەك تە نا بن
ما نابی جارەك جۆدابن
دستار و دانی تو هیركە
دێ بێژە بلا بزانن
بهێرە دستار بهێرە
پێخاس و برس و هەژارن
نە ئێكە دستار نە ئێكە
هەژدە جار هزار هزارن
بەلێ پا چبكین دستار
ل چوار جهار ئەڤرو دبەلاڤن
دەما بۆ ئێكەم جار من ناڤێ تەحسین تاهای گو لێبووی و من ناسكری، ل سالێن شێستان بوو، ئەو هێشتا قوتابیێ پەیمانگەها ھونەرێن جوان بوو ل بەغدا. ل سالێن حەفێتایان من تەحسین تاها ل ئێزگێ كوردی ل بەغدا دیت و ئەم بووینە هەڤال. تەحسین تاها كوردەكێ پاقژ بوو، ئەو خەباتا وی دناڤ جەرگێ دوژمنێ دا كری، بەرامبەر خەباتا پێشمەرگەیەكی بوو ل سەرنگەرێن تێكوشینێدا و زێدەتر، ئەڤە هەمی ژ سەخمەراتی مافێن گەلێ كورد و هەر سترانەكا وی گوتی، ژبۆ دوزا كوردی دگوت، هەر ھوزانەكا وی د هەلبژارت، پەیڤێن وێ گوللە و تیر بوون و دوەشاندنە سینگێ دوژمنی، سترانێن وی (دێ هێمەڤە، ھۆ بێریێ، خەون، راوەستن راوەستن، ئەی فەلەك)، ئەڤ سترانێن هەنێ ب ئاشكەرایی بەحسا پێشمەرگەیی بوون و پرانییا سترانێن وی ژ پەیڤێن (د. بەدرخان سندی، موئەیەد تەیب، رێكێش ئامێدی) بوون.
دووماھی جارا من تەحسین تاها تێدا دیتی، پشتی سەرھلدانا 1991ێ بوو ل هاڤینگەها سیلاڤێ، لێ دیتنەك دامایی و ماندیبوون پێڤە دیار بوو، ئاماژێن نە رازیبوونێ د ئاخفتنێن ویدا هەبوون و خوە دیت ل ناڤ مالا خوە كەس پیتەی نادەتێ و ھزرا چوونا دەرەڤێ وەلاتی كەتبوو سەرێ وی و داخوازەك ژمن كر، مخابن ئەز نەگەھشتم بۆ بجھـ بینم، ئەوژی هەمی سترانێن وی یێن ل ئێزگێ بەغدا هاتینە توماركرن، بۆ فرێكەم، مخابن ئەز نەگەھشتم ڤێ بۆ بكەم، تەحسین تاها چوو و دەنگێ وی ما، تەحسین تاها شورەشەك بوو دناڤ جەرگێ دوژمنیدا و ب دەهان و سەدان كەس وی یێن ھشیار كرین و هەستا نەتەوەیی یا لدەف دروست كری، گورێ تە تژی گول و گولزار بیت و رحا تە شاد بیت.
