ئا: ئاڤدێر
هونەرمەند ملكێ خوە نینن، هندی ملكێ جەماوەرێ خوە و هەر لڤین و بزاڤەكا وان ژی، حەژێكەرێن وان دئینتە سەر خەت. د وێنەیەكیدا ل باژێرێ میلانۆ ل ئیتالیا، هونەرمەندێ ناڤدارێ كورد (عەمەر گوندی) پوستەكی د ئەكاوەنتێ خوە یێ فەیسبۆكیدا بلاڤكریە و گوتییە (ژ دابونەریتێن سەیر لڤی باژێری، دەمێ مرۆڤ سێ جاران ل سەر ڤی نەخەشەیی بزڤریت، دێ مرۆڤ گەهیتە هیڤی و داخوازیێن خوە و ئەگەر خوە سەد سال ژی دەرباز بن، دێ مرۆڤ هەر گەهیتە ڤی باژێریڤە) و پشتی مە وێنێ هونەرمەندێ خوە ل سەر وی نەخەشی دیتی، مە ڤییا بزانین دوان چركەیاندا وی چ ھزردكرن، گوت: «ئەرێ تو دزانی سالانە چەند كەس قەستا ڤی جهی دكەن، چ وەك گەشتیاری بیت یان ژی وەك بیروباوەر؟ ھزركرنا من ژی ئەڤە بوو، ئەرێ مە دەهان جهێن هوسان یێن هەین، چ مەزار بن یان پەرستگەھـ بن و ژخوە هندی بێژی مە دارێن بناڤودەنگ یێن هەین و هەر ئێكێ ناڤەك ل سەرە، ئەگەر ئەم وەبەرهێنانێ تێدا بكەین، دێ شوینوارێن مە ژی هێنە پاراستن و دێ گەشتیار ژی زێدەتر قەستا باژێرێ مەكەن».
