نورهان عەلی
دڤی سەردەمیدا، بابەتێ مافێ ژنان و یەكسانییا دناڤبەرا ژنان و زەلاماندا، گەلەك دهێتە بەحسكرنێ. چ رۆژ نین ئەگەر ل سەر تورێن كومەلایەتی پۆستەك یان چەند پۆست ل سەر مافێ ژنان ب بەرچاڤێن مرۆڤی نەكەڤن، دناڤ رۆژنامە و گوڤاراندا، دناڤ بەرنامێن رێكخراو و سازیێن تایبەت ب ژنانڤە و لێ ئایا راستی بیت، مافێن ژنان ئەون یێن ئەڤ لایەنە بۆ دخوازن، یان ژی مافێن ژنان ئەوە دەرفەتێن خوە پێشخستنێ بۆ بهێنە ڤەكرن؟
زور جار دێ بینین، كچ و ژن دێ بێژن جڤاك پالدەر و پشتەڤان نینە و رێگرە، دێ بێژن خێزان رێكێ نادەت كار بكەین! ئەز دبینم ئەڤە بتنێ بەهانەیە، كچ و ژن بۆ خوە دگرن، ژبەركو تا مرۆڤ دكارەكیدا شارەزا نەبیت، مرۆڤ نەشێت چ كاران بدەستخوەڤە بینیت و لێ ئەگەر مرۆڤی شیانێن خوە بەرەڤ پێش برن، زانینێن خوە زێدەكرن، هینگێ كار ژی دێ بدەست مرۆڤی كەڤن و ئەڤ كچ و ژنا هەنێ بخوە ژی گوهێ خوە نادەتە گوتنێن نەرێنی، ژبەركو یا خو ب زانینێ زەنگین كری و بتنێ شیانێن وێ دێ وێ ژ هەر تشتەكی پارێزن.
خالەكا دی من دڤێت بێژم، چ جارەكێ كەس زانینێ ب خێر نادەتە مرۆڤی و دڤێت ژن لدویڤ زانینێ بگەریت و خوە پێبگەهینیت و هەر دەما ژنێ شییا خوە ئاڤا بكەت ژ روویێ جڤاكی و ژ روویێ زانستیڤە و خوە رەوشەنبیر كر، ھینگێ چ تشتەك ل بەر وێ ب زەحمەت نابن و هەر ئاریشا بكەڤیتە بەرسینگا وێ، ب شێوەیەكێ ساناھیتر دێ چارەسەر كەت.
رەنگە كچەك هەبیت بێژت ئەز نەشێم بەردەوامیێ بدەمە خواندنێ، چ وەك تەمەن یان ئاست؟ لڤێرە دڤێت بزانین، سەركەفتنا ڤێ كچا هەنێ نە بتنێ د چوونا زانكوییێ دایە دا كچەكا زانا و رەوشەنبیر بیت، دشێت برێكا د مالپەرێن ئینتەرنێتێ خوە پێبگەھینیت، كێتبان بخوینیت، رۆژنامە و گوڤارێن دكەڤنە بەردەستێن وێ بخوینیت و یا گرنگ خوە فێر بكەت و زانینێن خوە زێدە بكەت و د هەمی بیاڤەكیدا خوە رەوشەنبیر بكەت، ئەنجام ژی مافێن وێ بخوە دێ د پاراستی بن، خێزانا وێ دێ یا سەركەفتی بیت و ئەگەر بۆ دایك ژی، دێ باشتر چاڤدێری و پەروەردەیا زارۆكێن خوە كەت.
