ئا: ئه‌یاز هه‌ركی
ژبەركو (نەعامە) ل كوردستانێ نەبووینە، پێنەڤێت ب خودانكرنا وان ل كوردستانێ دێ تشتەكێ سەیر بیت، لێ ل دەف (كوڤان شەمسەددین) چ تشتەكێ سەیر نینە. لدوور بیرۆكا ڤەكرنا ڤی پرۆژەی، كوڤانی گوت: «من گەلەك حەژ ڤی بالندەی دكر، هەر چەندە ئەز یێ پشت راست نەبووم كو دێ دەڤەرا مە ژینگەهەكا گونجایی بیت بۆ ب خودانكرنا وان یان نە، لێ من دیڤچوون بۆ كرن و من پێزانینێن خوە ل سەر زێدەكرن و ل دەستپێكێ من چەند نەعامەك بتنێ ئینان و پشتی من دیتی دێ شێت خوە دگەل ڤێ ژینگەهێ گونجینیت، ئێدی من دەست ب پرۆژەیێ خوە یێ ب خودانكرنا وان كر».
دەما مە گوتیێ چ ئاستەنگ هەنە، گوت: «ئەڤ بالندە حەژ سەرمایێ ناكەت و ئەم زڤستانێ ناهێلین وان سار بیت و خوارنا وان ئەم بۆ دابین دكەین و ژبەر حەژێكرنا وان، ئەز گەلەك چاڤێ خوە ددەمێ و نوكە رۆژانە خەلك و گەشتیار قەست دكەنێ، ژبەركو بالندەكێ نەیێ دەڤەرێیە و رەنگە خەلكی بتنێ د تیڤی و وێنەیان دا یێ دیتی».
سەبارەت ب ڤی بالندەی و تشتێ سەیر لدەف وی چییە، یێ ئەم ژێ نەزانین؟ كوڤانی گوت: «نەعامە بخوە بالندەكێ كێم ئاقلە، لێ هندەك تایبەتمەندیێن خوە یێن هەین، دەما ژ خودیێ خوە پەریشان دبیت، بۆ دەمەكێ درێژ ناچیتە دەف و ئەگەر دەرفەتا خوە ژی بینیت، دێ هێرشی مرۆڤان كەت و خەلك ژێ دترسیت».
