لە میدیای تورکییەوە

ئەردۆغان: دوای لوبنان ناتانیاهۆ چاوی لە ئەناتۆلیایە

ئەردۆغان سەرۆك كۆماری توركیا لە رێوڕەسمی كردنەوەی ساڵی نوێی یاسادانان لە پەرلەمانی توركیا وتی: من بە روونی پێتان دەڵێم، ئەو شوێنەی دوای لوبنان ناتانیاهۆ چاوی لەسەر دادەنێت، زێدی ئێمە دەبێت، ناتانیاهۆ خەون بە ئەناتۆلیاوە دەبینێت. بانگەواز بۆ ئەو كەسانە دەكەم كە دەڵێن توركیا بێلایەن بێت و ئەوانەی دەڵێن حەماس رێكخراوێكی تیرۆریستییە؛ ئەوەی ئێمە رووبەڕووی دەبینەوە دەوڵەت نییە، بەڵكو رەوەیەكە لە بكوژان و خوێن خۆران.
ئەردۆغان وتی: ئێمە لەبەردەم تۆڕێكی داگیركاریداین كە بەنیازە هەموو هەرێمەكە بخاتەژێر دەستی خۆی. هەركەسێك كە یەك تۆز ویژدانی هەبێت ناتوانێت لە بەرامبەر تۆڕێكی كۆمەڵكوژی لەو شێوەیەدا بێدەنگ بێت. ئەوانەی بێدەنگن، سبەی چۆن سەیری رووخساری منداڵەكانتان دەكەن؟ دەستدرێژی ئیسرائیل، توركیاش دەگرێتەوە. ئێمە بەو هەموو ئامرازانەی كە هەمانە، بۆ نیشتمان و سەربەخۆیی خۆمان، بەردەوام دەبین لە دژی ئەم دەستدرێژییە.
ئەرۆدغان تەئكیدی كردەوە، تێچووی هەرچییەك بێت، توركیا دژی ئیسرائیل دەوەستێتەوە و جیهان بانگهێشتی ئەم هەڵوێستە شەرەفمەندە دەكات. توركیا هەموو هەوڵێك دەدات بۆ دامەزراندنی بەرەیەكی مرۆیی.
میللیەت

بەمزوانە كۆڕبەندێكی ئابووریی عیراقی - توركی لە بەغدا دەبەسترێت

لیژنەی هێزەكانی بازاڕ داوا دەكات كۆڕبەندێكی هاوبەشی عیراقی توركی لە بەغدا ببەسترێت، ئەو لیژنەیە بە فەرمانی دیوانی سەرۆك وەزیرانی عیراق پێكهێنراوە و پێكهاتووە لە كۆمەڵەی بانكە ئەهلییەكان، فیدراسیۆنی ژوورە بازرگانییەكان، ئەنجومەنی بازرگانیی عیراقی-توركی، یەكێتیی بەڵێندەرانی عیراق.
لیژنەكە كۆڕێكی هاوبەشی نێوان توركیا و عیراقی ئەنجامداوە بە میوانداری راوێژكاری دارایی سەرۆك وەزیرانی عیراق و لە بەیاننامەیەكدا دەڵێت «پێشنیاری پەرەپێدانی پەیوەندییە ئابوورییەكانیان لەگەڵ توركیا كردووە لەڕێگەی بەستنی كۆڕبەندێكی هاوبەشی عیراق و توركیا بەسەرپەرشتی سەرۆك وەزیران لە بەغدا لە پەراوێزی سەردانەكەی وەزیری بازرگانیی توركیا بۆ بەغدا كە بڕیارە لە مانگی  تشرینی دووەمی داهاتوودا ئەنجام بدرێت.
تورك پرێس

 

ئەم ئاگرە بە لوبنان كۆتایی نایەت

هاكان فیدان وەزیری دەرەوەی توركیا رایگەیاند، ئیسرائیل بەرەی جەنگی گواستۆتەوە بۆ لوبنان و «ناتانیاهۆ زۆر مەبەستیەتی شەڕەكە لە ناوچەكەدا بڵاوبكاتەوە».
فیدان رایگەیاند، ستراتیژییەكانی ناتانیاهۆ هەم وڵاتەكەی خۆی و هەم هاوپەیمانەكانی دەكێشنە ناو ئاگرێكی گەورەوە و ئارەزووی بڵاوكردنەوەی شەڕەكەی هەیە.
وتیشی «پرسی غەززە وەك تاقیكردنەوەیەك، ئەوە نیشان دەدات كە سیستمی نێودەوڵەتی بەتایبەت ئۆرگانە گرنگەكانی نەتەوەیەكگرتووەكان هەندێكجار كار ناكات و هەندێك جار مایەپووچ دەبێت». فیدان جەختی لەوە كردۆتەوە كە جینۆسایدی غەززە كارەساتە، بەڵام كارەساتی گەورەتر دووڕوویی سیستمی نێودەوڵەتییە، باسی لەوەشكردووە، ئەم دووڕووییە رێگە خۆش دەكات بۆ جینۆساید و ناڕێكی و بێ یاسایی هاوشێوەی دیكە و ئەگەر ئەم هەڵە سیستماتیكە راست نەكەینەوە، رووبەڕووی زۆر ناوچەی كێشەدار دەبینەوە كە هاوشێوەی غەززەیە.
فیدان ئاماژەی بەوەشكردووە، ئەوەی ساڵێك لەمەوبەر وتوویەتی، هاتە دی. فیدان دەڵێت «ئێمە گوتمان ئەگەر ئیسرائیل رانەگیرێت ئەم شەڕە دەگوازێتەوە بۆ شوێنەكانی تری غەززە و فەلەستین». فیدان بە ئاماژەدان بەوەی كە ئێستا ئیسرائیل دوای غەززە بەرەكەی گواستووەتەوە بۆ لوبنان، هێما بۆ ئەوەدەكات «ئەمە بۆ زۆرێك لە ئەكتەرەكان شتێكی سەرسوڕهێنەر نەبوو، ئەم ئۆپەراسیۆنە لە ساڵی داهاتوودا بەرەو كوێ دەڕوات؟ ئەوە پێكەوە دەیبینین».
ئاكشەم

 

پزیشكیان: بەڵێنمان پێدرابوو ئاگربەست لە غەززە بەرقەرار بكەن

 
مەسعود پزیشكیان سەرۆك كۆماری ئیسلامیی ئێران رایگەیاند: بەڵێنمان پێدرابوو ئاگربەست لە غەززە بگیرێتەبەر ئەگەر وەڵامی تیرۆركردنی هەنیە نەدەینەوە، بەڵام هەم ئەمریكا و هەم ئەوروپا بەڵێنەكانیان جێبەجێ نەكرد.
پزیشكیان تەئكیدی كردەوە، سەركردەكانی ئەمریكا و ئەوروپا بەڵێنیان پێدابووین كە ئەگەر ئێران وەڵامی تیرۆركردنی ئیسماعیل هەنیە سەرۆكی مەكتەبی سیاسیی حەماس نەداتەوە، ئاگربەست لە غەززە رابگەیەنن، بەڵام ئەوان ئەمەیان جێبەجێنەكرد و ئەمریكا و یەكێتیی ئەوروپا بەڵێنەكانیان نەبردەسەر.
پزیشكیان  بە ئاماژەدان  بە دەسدرێژییەكانی ئیسرائیل لە ناوچەكە و لایەنگرانی رۆژئاوایی، وتوویەتی: تاوانەكانی رژێمی زایۆنی جێگای قبوڵ نییە و بێوەڵام نامێننەوە.
حورییەت