دوێنێ لە پارێزگای هەڵەبجە، دووەمین كەرنەڤاڵی فراوانی یەكێتیی نیشتمانیی كوردستان، بۆ بانگەشە و ناساندنی كاندیدەكانی لیستی 129ی یەكێتی، بۆ هەڵبژاردنی خولی شەشەمی پەرلەمانی كوردستان، بەڕێوەچوو.
یەكێتی، كە قسەیەكی كرد، جێبەجێی دەكات
لە سەرەتای كەرنەڤاڵەكەدا، كاندیدەكانی لیستی 129ی یەكێتی لە پارێزگای هەڵەبجە، ناسێنران، پاشان، بافڵ جەلال تاڵەبانی سەرۆكی یەكێتیی نیشتمانیی كوردستان، لە پەیامێكیدا بۆ خەڵكی سنووری پارێزگای هەڵەبجە و قەزا و ناحیە و گوندەكانی دەوروبەری، لە كەشێكی پڕ جۆش و خرۆشی یەكێتییانەدا، وتی: خەڵكی هەڵەبجەی ئازیز... شاری ئاشتی... دڵی كوردستان... زۆر سوپاستان دەكەم كە دەرفەتتان داوم ئەمڕۆ دوو وشەتان لەگەڵ باس بكەم. سەرەتاش داوای لێبووردنی لەو كەسانە كرد كە بواری هاتنەناو هۆڵی رێوڕەسمەكەیان نەبووە و لەبەر قەرەباڵغی. پاشان روو لە جەماوەرەكە وتی: هەڤاڵان.. باش دەزانن ئەم یەكێتییە چۆنە، كە قسەیەكی كرد، جێبەجێی دەكات، وتیشی: زاب خودی، منیش باش دەزانم ئەگەر بەڵێنتان بدەمێ ئەو وەهاب هەڵەبجەییە بكەمە پارێزگاری بارزان، ئەوا ئەیكەم، ئەگەرچی خۆی نایكات، بەڵام بمانەوێت ئەیكەین، بۆیە دڵنیابن بە پشتیوانیی خوای گەورە و هەموو دەنگدەرانی كوردستان، كۆتایی بەو دەسەڵاتە ناشیرینە خۆسەپێنە دەهێنین.
لەبیرتان بێت بەڵێنیان پێتاندابوو كە هەریەكەتان پشكێكتان هەبێت لە داهاتی نەوت، ئەی كوا پشكەكەتان؟
پاشان رایگەیاند: لەم شارە پیرۆزەوە با پەیامێك بگەیەنین بە میللەتەكەی خۆمان و وتی: یەكەمجار بۆ كوردستانی عیراق، دواتر بۆ هەر چوار پارچەی كوردستان كە ئەمڕۆ تاكە حزب كە خەبات بكات بۆ هەرچوار پارچەی كوردستان، بەرامبەر نەیارەكانمان و دوژمنەكانمان بەبێ ترس و بە پشتیوانیی خوای گەورە، یەكێتیی نیشتمانیی كوردستانە، حزبەكەی مام جەلال-ە، حزبی شەهیدانە. دووپاتیشیكردەوە: ئەم دەسەڵاتە نەك هەر كۆتایی پێدەهێنین، بەڵكو دەیڕوخێنین.
لە 19 ساڵدا، 17 ساڵ و نیوی سەرۆكی وەزیران لای حزبێك بووە
لە بەشێكی دیكەی پەیامەكەیدا، رایگەیاند: ئەم بەهەشتەی ئێمە هەمانە، خاكێكی جوان، پڕ لە ئاو، خاكمان هەیە، غازمان هەیە، نەوتمان هەیە، ئەو هەموو خەڵكە خوێندەوار و زیرەكەمان هەیە، یەك پرسیار لەخۆتان بكەن، رەوایە ئەمڕۆ دۆخی كوردستان وابێت؟ بۆیە وتی: بۆئەوەی چاكی بكەینەوە، دەبێت ئەو دەسەڵاتە كۆتایی پێبهێنین.
وڵات بێ خوا، وڵات نییە...
وڵات بێ دین، وڵات نییە
جەختیشی لەسەر ئەوە كردەوە كە لە 19 ساڵدا، 17 ساڵ و نیوی سەرۆكی وەزیران لای حزبێك بووە، بەڵام دەبێت ئەو پرسیارە بكەین كەی كوردستان بەرەو پێشەوە رۆیشت؟ ئەو خزمەتەی كە كراوە، كەی كرا؟ ئەو ساڵانە نەبوو كە یەكێتی بەهێز بوو؟ ئەو ساڵانە نەبوو كە جەنابی مام جەلال لە ژیاندا بوو؟ بەڵێ وایە، هەموو كەسێك ئەوە دەزانێت، بەڵام بەداخەوە مام جەلال نەخۆش كەوت و كۆچی دوایی كرد، كاك كۆسرەت و هێرۆخان نەخۆش كەوتن و دووركەوتنەوە، نەیارەكانمان زۆر دڵیان خۆش بوو، وایاندەزانی یەكێتیی نیشتمانیی كوردستان، كۆتایی پێدێت، خۆتان بینیتان چەندین حزب جیابوونەوە لە ئێمە، گۆڕان و ئەو حزبانە، پارتیش خەنجەری بۆ تیژكردین، لەجیاتی ئەوەی هەوڵبدات بۆ یەكڕیزی و بەرنامەیەك دابنێت بۆ چاككردنەوەی دۆخەكە، كەچی هەوڵیاندا بۆ بچووككردنەوەی هەموو حزبەكان، تا جیاوازییان لەناودا دروست بكەن، ئەوەش بۆ یەك ئامانج، هەتا گیرفانیان پڕبكەن، بۆیە دەپرسین ئەرێ بەس نییە ئەم گیرفان پڕكردنە؟ مووچە بۆچی نایەت بۆ كوردستان؟ كاك قوباد چوو بۆ بەغدا، منیشیان نارد بۆ بەغدا، بە پشتیوانیی خوای گەورە و یەكێتی، بودجەمان تێپەڕاند، بۆیە هیچ كێشەیەك نییە، بەڵام مووچە لەبەر یەك هۆكار نایەت بۆ كوردستان، چونكە دەیانەوێت پارەكە لە یەك بانكەوە بێت بۆ كوردستان، تا لەوێش قازانج بكەن و خوێنی ئێوە بخۆن، بە پشتیوانیی خوای گەورە، ئەگەر ئێمە ئەو دەنگە بەدەستبهێنین كە پێویستە بەدەستی بهێنین، هەموو ئەو وەزیرانەی كە ئەم وڵاتەیان كاولكرد، وەكو وەزیری ناوخۆ، وەزیری شارەوانی، وەكو جەنابی كاك مەسرور، با خانەنشینییەكەیان لە (هەژماری من) وەربگرن.
وتیشی: دەمەوێت دڵنیاتان بكەمەوە كە راست دەكەم لەگەڵتان، ئاومان نییە لە هەولێر، ئەو هەموو نەوتە لە ژێر زەوی هێنرایە دەرەوە، ئەگەر لەبیرتان بێت بەڵێنیان پێتان دابوو كە هەریەكەتان پشكێكتان هەبێت لە داهاتەكەی، ئەی كوا پشكەكەتان؟ ئەو هەموو نەوتە دەرهێنرا، ئەو هەموو غازە هەیە، لە 1991ەوە سەدام لەم ناوە نەماوە، ئێستاش كارەبامان نییە، مەعقولە؟ بۆیە هەمووتان تێگەیشتوون.
ئێستا یەك یەكێتی بەهێز هەیە كە گەڕاوەتەوە بۆ رێبازەكەی جەنابی مام جەلال
راشیگەیاند: گرفتەكەی كورد ئەوەبوو، ئێمە وەكو یەكێتیی نیشتمانیی كوردستان، گرفتمان هەبوو، خۆشبەختانە ئەمڕۆ ئێمە گرفتمان نییە، هەرگیز هێندەی ئەمڕۆ یەكڕیز نەبووین و هەرگیز هێندەی ئەمڕۆ بەهێز نەبووین، سەیری ئەو هەڤاڵانەی خۆمان بكەن كە لە ریزی یەكەم دانیشتوون، سوێند بەخوا پێنج ساڵ لەمەوبەر هەرگیز نەیاندەتوانی بەو جۆرە دانیشن پێكەوە، چونكە هەریەكەمان لە تەكەتولێكی جیابووین، بەخۆشمەوە، یان هەموومان هێزێكی تایبەتمان هەبوو، بەڵام ئێستا خۆشبەختانە نە تەكەتول ماوە و نە هێزی جیا، ئێستا یەك یەكێتی بەهێز هەیە كە گەڕاوەتەوە بۆ رێبازەكەی جەنابی مام جەلال، هێندەی ئەوەش گرنگ بەرنامەی وایە، كە بەرنامەكەی مام جەلال-یش تەواوبكەین، چونكە بەرنامەی مام جەلال، ئەم گەندەڵی و ستەمە نەبوو كە لەئێوە دەكرێت، كە رۆژبەڕۆژ ئەولایەی وڵات ئەڕوات بەرەو سیستمێكی پۆلیسیی ناشیرین، بۆیە كۆتایی پێبهێنن.
پەیامێک بۆ مامۆستایانی ئایینی
وتیشی: دەمەوێت لێرەوە پەیامێكی تایبەت بنێرم، بۆ مامۆستا ئایینییەكانمان، دەمەوێت پێتان بڵێم كە ئێمە وەكو یەكێتیی نیشتمانیی كوردستان، وەكو حزبی تر نین، باوەڕمان بەوە نییە دەستبخەینە كاروباری مزگەوتەكانتانەوە و هەموو پێنجشەممەیەك نووسراوێكتان بۆ بنێرین و بڵێین دەبێت ئێوە بەوجۆرە قسەبكەن و ئەگەر بە قسەمان نەكەن، كێشەیەكتان بۆ بدۆزینەوە و دوورتان بخەینەوە لە مزگەوتەكانتان، چونكە وەك دەبینن ئەوان دەست دەخەنە ناو ئەوەشەوە، من بەڵێنتان دەدەمێ كە یەكێتی، هەرگیز ئەوە ناكات، وەزیری ئەوقافێك دادەنێین كە بزانێت خوا چییە، كە بزانێت میللەتی ئێمە موسڵمانە، مامۆستایان ئێمە پشتیوانتان دەبین، ئێوە سەركردەمان بن، پێشمان بكەون، ئێمە دواتان دەكەوین، وڵات بێ خوا، وڵات نییە، وڵات بێ دین، وڵات نییە، هەركەسێك كە پەیوەندیی هەبێت بە یەكێتییەوە یان هەیبووبێت، هەرچی دەزگایەكمان هەبێت لە یەكێتی كە دژی ئایینە پیرۆزەكەی ئێمە قسە دەكات، هەموویمان دوورخستۆتەوە و هەموو دەزگاكانمان كاولكردووە، وتیشی: بەیەكەوە دەتوانین رەوشتی میللەتەكەمان بپارێزین، چۆن ئێمە لە سلێمانی توانیومانە چەند ئیجرائاتێك بكەین، بە پشتیوانیی خوای گەورە و بە پشتیوانیی جەنابتان، ئینشائەڵڵا هەموو كوردستان پاك دەكەینەوە.
هەروەها روو لە مامۆستایانی ئایینی وتی: گەنجەكانمان بارودۆخیان باش نییە، هەموو فێری تلیاك دەبن و فێری خواردنەوە دەبن، دەبێت بەیەكەوە بەرنامەیەك دابنێین بۆ چارەسەری ئەوە، بەڵام دەپرسم بێ زەحمەت بۆچی سەرۆك وەزیران و وەزیری ناوخۆ باسی ئەم شتانە ناكەن؟ باش دەیزانن، بەڵام حەزیان لەوەیە و ئەوەیان دەوێت، ئەگەرنا دەستێوەردانیان نەدەكرد لەناو مزگەوتەكان و شوێنە پیرۆزەكانمان، یان شاری گەورەیان دروست نەدەكرد پڕبێت لە بەدڕەوشتی و «بەشانازییشەوە» ئەو شارە نوێنەری هەیە! و وتەبێژی هەیە.
ئاماژەی بەوەش دا: ئەو بەڵێنی پشتیوانییە دەدەم بە مامۆستاكانمان، یەك داواكارییم لێیان هەیە، چاودێر بن بەسەرمانەوە، یارمەتیمان بدەن، قسە بۆ یەكڕیزیی میللەتەكەمان بكەن، قسە بۆ ئەوە بكەن كە راستییە، هەر ئەوەمان دەوێت لێتان، ئایینەكەمان بپارێزن، هەر ئەوەمان دەوێت لێتان، یەكێتی بە هەموو هێز و توانایەوە پشتیوانی ئێوەیە.
وتیشی: بە پشتیوانیی خوای گەورە، ئەو دەسەڵاتە خۆسەپێنەرە دەڕووخێنین، راشیگەیاند: سەركردەی حزبەكانی تر ناتوانن ئاوا راشكاوانە گفتوگۆتان لەگەڵدا بكەن، بۆیە وتی: لێرەوە من چالێنجی سەرۆك وەزیران و سەرۆكی هەموو حزبەكان دەكەم كە دەڵێن خەڵك دەنگ نادات لە كوردستان، بۆیە دەڵێم وەرن با شتێك بكەین خەڵك دەنگ بدات، ئەگەر لە دەنگ ناترسن، ئالێرەوە لە هەڵەبجەی شەهید لە چ كەناڵێكی تەلەفزیۆن و لە چ رۆژنامەیەكەوە دەتەوێت وەك هەموو وڵاتانی پێشكەوتووی جیهان وەك ئەمریكا و بەریتانیا، وەرە كاك مەسرور با دیبەیت بكەین، لەبەرچاوی خوای گەورە و میهرەبان، چالێنجت دەكەم، دواتر بەیەكەوە دادەنیشین دەڵێین كێی تر بێت، با سەرۆكی حزبەكان بێنە دیبەیتەكە، ئێمە ناترسین لە دیبەیت.
لە كۆتاییشدا سەرۆك بافڵ وتی: دوا قسەم بۆتان ئەوەیە، هاوكارمان بن، دەنگ كۆبكەنەوە، خەڵك ئاشت بكەنەوە و بڵێن یەكێتیی ئەمڕۆ، یەكێتییەكەی جەنابی مام جەلال-ە، یەكێتیی ئەمڕۆ بۆ خزمەتی خەڵكە و ئەو دەسەڵاتە بۆگەنە، گەندەڵە دەڕوخێنێت.
