دوێنێ، لە شاری كۆیە، سێیەمین كەرنەڤاڵی گەورە و فراوانی یەكێتیی نیشتمانیی كوردستان بۆ بانگەشە و ناساندنی كاندیدەكانی لیستی (١٢٩)ی یەکێتی بۆ هەڵبژاردنی خولی شەشەمی پەرلەمان كوردستان، بەڕێوەچوو.
لە سەرەتای كەرنەڤاڵەكەدا، كاندیدەكانی یەكێتی لە بازنەی پارێزگای هەولێر، هاتنە سەر ستەیج و ناسێنران.
پاشان، بافڵ جەلال تاڵەبانی سەرۆكی یەكێتیی نیشتمانیی كوردستان، وتەیەكی پڕ لە جۆش و خرۆشی پێشكەشی ئامادەبووان و خەڵكی كوردستان کرد و چەندین پەیامیشی ئاڕاستە كرد و وتی: كۆیە گیان شاری شەهیدان، شاری رۆشنبیر و نووسەران، شاری قارەمانەكان، كۆبان كوڕم ئەمە شاری مام جەلال-ە، وتیشی: هەڤاڵان زۆر زۆر خۆشحاڵم كە ئەمڕۆ ئەم دەرفەتەتان داوەتە من بێمە خزمەتتان، خوالێخۆشبوو عومەر دەبابە كاتێك ئێمە لە بەریتانیا بووین منداڵ بووین، گرنگی كۆیەی بۆ ئێمە باس كرد، فێری كردین خەڵكی كۆیە چەند قارەمان و بەتوانان، چەند رۆشنبیر و دووربینن، كۆیە وتی هەر یەكێتییە و هەر یەكێتی دەبێت، هەر سەوز بووە و هەر سەوز دەبێت، بەو یەكێتیبوون و سەوزبوونە؛ كۆیە و خەڵكەكەی باجێكی قورسیان داوە، غەدری سەیر لە ئێوە كراوە، زۆر سەیر، لەبیرتانە ئەو هەموو نەوتە شیرینە هەبوو لە كۆیە كە وەكو خەڵكەكەی شیرینە، پێش ئەوەی بە بەرنامە نەوتەكەمان سەقەت بكەن، هەموو كوردستان پڕۆژەی تێدا جێبەجێ دەكرا بە نەوتەكەی كۆیە، بەڵام بە داخەوە كە بیرە نەوتەكانیان سەقەت كردین، ئێستا دەڵێن دەبێت كۆیە بە داهاتی خۆی؛ خۆی بژێنێت. چ داهاتێك ئێوە هەموو نەوتەكەیتان خوارد، سەیری گەنجەكانمان بكەن، ماشەڵڵاتان لێ بێت لەم كەرنەڤاڵەدا گەنجی زۆر تێدایە، دەیانەوێت گەنجەكانمان بێهیوا بكەن لە كۆیە، دەیانەوێت گەنجەكانی كۆیە بچن لە شوێن و شاری دیكە كاربكەن، وەك بڵێی شوێن نەبێت لە شارەكەی خۆیان كاری تێدا بكەن!.
سەرۆك بافڵ جەلال تاڵەبانی: ئێمە بووین كە چووین بۆ بەغدا و توانیمان مووچە بۆ ئێوە دابین بكەین
ئاماژەی بەوەشكرد ئێمە وەك یەكێتیی نیشتمانیی كوردستان زۆر بیرمان لێكردووەتەوە كە هەر یەكێتی-یە دەتوانێت ئەم بارودۆخە چاك بكاتەوە، وەكو كاك كۆسرەت دەیوت و دەیڵێت: «هەر یەكێتی و بەس». بۆچی یەكێتی و بەس؟، من پێتان دەڵێم بۆ، لەبەر ئەوەی ئەم هەموو ساڵە حوكمڕانی ئەم وڵاتە بە دەست حزبێكی ترە، چییان بۆ كردن؟، بەڵێ وایە هیچیان بۆ نەكردن، باشە چی روودەدات ئەگەر ئەو عەقڵیەتە بگۆڕن؟ نایگۆڕن؟. دوای شەش ساڵ جەنابی سەرۆك وەزیران دێت بۆ ئەم شارە پیرۆزە و دەڵێت جادەیەكتان بۆ دروست دەكەم!، خەڵكی كۆیە زۆر زیرەكن، رۆشنبیرن و خوێندەوارن، بۆیە ئەو كڵاوە ناچێتە سەری خەڵكی كۆیە، بۆچی پێشتر ئەو جادەیەت دروست نەكرد بێزەحمەت؟!، وتیشی: تەبعەن كە یەكێتیی نیشتمانیی كوردستان، توانی ئەم دەسەڵاتە خۆسەپێنەرە كۆتایی پێبهێنێت، ئێمە وەك یەكێتی وا سیاسەت ناكەین، هەموو كوردستان هی ئێوەیە، كورد یەكن، ئەوەی كە دەیكەین لە زاخۆوە تا گەرمیان و خانەقین، بە یەكچاو سەیری میللەتی خۆمان دەكەین و ئەم سیاسەتە سەقەتەی ئێستای هەڤاڵانی حوكمڕان هەڵدەگێڕینەوە.
لە درێژەی وتەكانیدا، سەرۆكی یەكێتی، ئەوەی خستەڕوو زۆر كەس پرسیارم لێدەكات كە بۆچی بافڵ تۆ ئەوەندە توندیت لەسەر غازی كوردستان؟، پێیان دەڵێم هەرگیز غازەكەیان تەسلیم ناكەم، قەت، ئەو غازە هی میللەتی كوردە، هی ئێوەیە، هی گیرفانی كەس نییە، هی گیرفانی هیچ بنەماڵەیەك نییە، ئەو سیاسەتە سەقەتەی بەكاریان دەهێنا بۆ نەوت، هەرگیز نابێت دووبارە بێتەوە بۆ غاز، كۆتایی پێدەهێنین.
سەرۆك بافڵ جەلال تاڵەبانی: نە هەژماری منە نە هەژماری ئێوەیە، با بە ناوی خۆی ناوی بەرین (هەژماری مەسرور)
سەرۆك بافڵ، لە ئاماژەكردن بە شێوازی چارەسەركردنی كێشەكان، وتی: چۆن كێشەكانی كۆیە چارەسەردەكەین، هەڤاڵان تكاتان لێدەكەم هاوارەكانتانم زۆر بەدڵە، بەڵام گوێ لە من بگرن قسەكانم جددین، لە كۆیە قسەكانم جیاوازە، دووبارەی دەكەمەوە چۆن كێشەكانی ئەم شارە خۆشەویستە چارەسەردەكرێت؟ هەر بە ئێمە دەكرێت، حزبەكانی تر تاقیكراونەتەوە، چەند كەسێك هەبوون لەناو یەكێتی، هەندێكی بەتەمەن، هەندێكی گەنجتر، هەندێكیشی دەركران، بۆ كە لە دەسەڵاتدا بوون هیچتان نەكرد؟!، ئەگەر ئێوە دەنگ بدەن بە یەكێتیی نیشتمانیی كوردستان، هەموو هێز و قووەتی خۆمان بەكاردەهێنین زاب خودێ، زاب خودێ تا كۆیە ئەم شارە پیرۆزە بكەینە ئیدارەیەكی سەربەخۆ. وتیشی: یەكێتیی نیشتمانیی كوردستان وەكو حزبی تر نییە، ئێمە گوێتان لێدەگرین، لەم چەند رۆژەدا هەزاران كۆمێنت نووسراوە لەسەر مەوزوعێك، تەبعەن دوێنێ هەندێك لە حزبەكانی تر قسەیان كردووە، هەموو تیمە ئیعلامییەكانیان خەریكی ئەوە دەبوون كۆمێنت بسڕنەوە، بۆ خاتری خوا لە كۆمێنتیشدا نابێت رەئی خۆمان دەربڕین، ئێمەی یەكێتی وانین، زۆر پەیامم بۆ هاتووە لەسەر بابەتێكی گرنگ كە پێیدەڵێن (هەژماری من)، وەڵڵا نە هەژماری منە نە هەژماری ئێوەیە، با بە ناوی خۆی ناوی بەرین (هەژماری مەسرور)، با راستگۆ بین، لەمەشدا دەیانەوێت پارە لە ئێوە بخۆن، لەمەشدا دەیانەوێت خوێنی ئێوە بمژن، با پێتان بڵێم ئەو هەژماری مەسرورە، هیچ ئیستیفادەیەكی نییە بۆ ئێمە و مەیكەن، بڕۆن تەوتین بكەن. ئێمە بووین كە چووین بۆ بەغدا و توانیمان مووچە بۆ ئێوە دابین بكەین و جیای بكەینەوە لە ئەوان، تا ئیتر بە ئارەزووی خۆیان یاری پێ نەكەن.
وەرە با لەبەرچاوی هەموو میللەتی كورد با ئێمە دیبەیت بكەین،بزانین بەرنامەی كاممان بۆ كوردستان باشترە
سەبارەت بەو پەیامەشی كە ئاڕاستەی مەسرور بارزانی كردبوو بۆ دیبەیت، سەرۆك بافڵ، وتی: لەم چەند رۆژەدا پەیامێكم نارد بۆ كاك مەسرور، وتم وەرە با وەكو هەموو وڵاتێك دانیشین لەبەردەم تەلەفزیۆن بە شەرت و شروت و بە رێز و بە ئیحترامەوە دیبەیت بكەین، تەبعەن یەكێك كە هەر نازانم كێیە، جوابی دایەوە لەجیاتی كاك مەسرور و وتی «ئەگەر دەتانەوێت رۆژێك بێن تەوقەیەكی لەگەڵ بكەن». هەی حوشتر ئەمە خۆشەویستان ناكات، ئێمە یەك میللەتین، ئێمە یەك ئامانجمان هەیە بەخێرێ، بەم قسانە، بەم فشەكەرییە، بەم لووتبەرزییە، ئێوە خۆشەویست نابن. ئا لێرە لە كۆیە چالنجەكەم دووبارە دەكەمەوە، چونكە من دەزانم كاك مەسرور پیاوێكی ترسنۆك نییە، لەجیاتی ئەو جوابیان داوەتەوە، چالنجەكەم دووبارە دەكەمەوە و دەڵێم كاك مەسرور وەرە با لەبەر چاوی هەموو میللەتی كورد با ئێمە دیبەیت بكەین، بزانین بەرنامەی كاممان بۆ كوردستان باشترە.
لەكۆتایی وتەكانیشیدا، سەرۆكی یەكێتی، رایگەیاند: هەڤاڵان ئەمە كۆیەیە، قارەمانەكانی یەكێتی زۆربەیان خەڵكی كۆیە بوون، ئا لێرە با ئێمە بەڵێنێك بدەین بە میللەتەكەمان كە لە كۆیەوە وەكو عومەر دەبابە و دەبابەكەی كە تێكیشكاند بەبەرد، لێرەوە دەڕۆین بۆ هەولێر، بۆ بادینان، بۆ هەموو كوردستان و سەوزی دەكەینەوە و ئەو دەسەڵاتە بۆگەنە كۆتایی پێدەهێنین، بڕۆنە پێشەوە، جوابیان دەدەینەوە بە هەڵبژاردن و بە دەنگ، هەرگیز ئەمەیان نەبینیوە لە ژیانیاندا و تۆقیون لە جەماوەری یەكێتی.
بۆ پێشەوە یەكێتی، بۆ پێشەوە كورد و كوردستان، هەر كوردستان بۆ پێشەوە، كوردستان یان نەمان.
#129
