مستەفا بامەرنی
هەلبژارتن مافەکێ دستوری یێ هەر هاوولاتیەکی یە و هەروەسا ئەرکەکێ نیشتیمانی یە، یا گرنگە بەشداربوونا مە یا کارا بیت و دئاستێ هیڤیێن مە و پاشەرۆژا زارۆکێن مەدا بیت. دڤێ پروسا دیموکراسی و چارەنڤێسازدا، گرنگیا هەلبژارتنا یا گرێدایی هشیاری و باوەرییا دەنگدەرییە. هەمی دەما دەنگدەر بدەنگدانێ دشێتن گوهورینێ د نەخشێ سیاسی یێ وولاتێ خودا بکەت و نوێنەرێن هەژی و دلسوز بۆ خو هەلبژێریت. هندی دەنگدەر یێ بهێز و ئازاد بیت، دێ بنگەهێ دیموکرسیێ د وولاتیدا یێ خورتر بیت. دەنگدان دەرفەتەکا زێرینە، کو هاووەلاتی بشێت نوێنەرێن خو یێن راست و درست هەلبژێریت و یا گرنگە ژی، هاوەلاتی بزانیت بوچی دێ دەنگێ خو دەت و دێ دەتە کێ؟
هەروەسا شاشیەکا مەزنە دەمێ ئەم دەنگێ خو لسەر بنگەهێ خزماتی، ئەشیرەتیێ و هەڤالینیێ دەین، بەلکی دڤێت ئەم دەنگێ خو بدەینە کەسەکێ هەژی و دلسوز و هەروەسا د ئاستێ نوێنەرتیا ملەتێ خودا بیت و خەما وی یا سەرەکی بتنێ خزمەتکرنا مللەتی بیت. گەلەک نورمالە هەر ئێک ژمە خودان بیرو باوەریێن جودا بیت و سەر ب پارتەکا سیاسی ڤەبیت و هندەک ژمە ژی دبێ لایەن بن، لێ ئەرکێ مە هەمیا ئەوە کو ئەم هەمی پێکڤە خو بەرپرس بزانین، بەرامبەر وولاتێ خوە و پاشەرۆژا خوە.
دەمێ بەربژێر سوزا ددەنە هاوەلاتییا و پشتی ئەو دبنە نوێنەرێن مللەتی و سوزێن خو بجهـ نا ئینن، بێ گومان دێ هاوەلاتی هەست ب بێ ئومێدیێ کەتن و دێ بێژیت پێدڤی ناکەت ئەز بچمە دەنگدانێ، مانێ کەسێ بومە چ نەکر و بتنێ بۆ خویە!!! نێ ئەڤە نەیا دروستە و یا باش ئەوە کو هاوەلاتی دوبارە هزرا خو باش بکەت و بەشدارییەکا مەزن د هەلبژارتنا دا بکەت و هوسا دێ وێ ڤالاتیا ل ناڤبەرا وی و نوێنەرێ وی دا باشتر پر کەت، چنکو چەند ئاستێ دەنگدانێ یێ بلند بیت، دێ هەڤڕکی یا دژوارتر بیت و ئەنجامژی دێ دباشتر بن.
چارەنڤێسی مللەتی یێ گرێدای هشیاری و بەشدارییا بەرفرەها هاوولاتییە د هەلبژارتنادا، هەروەسا بەشداربوون د هەلبژارتنادا رامانا وێ ئەوە کو هاوەلاتی گرنگی و سەنگا دەنگێ خو دزانیت و بڤی دەنگی، دێ پاشەرۆژەکا گەش بۆ زاروکێن خو دابین کەتن.
دەنگدەرێ هێژا ئەڤە نە جارا ئێکێیە ئەم بەشداری هەلبژارتنا دبین و بدرێژاهیا ڤان (22) سیهو دو سالێن چویی، گەلەک جارا هەلبژارتن یێن هاتینە کرن، نێ ئەز دبینم ڤێ جارێ یا جیاوازە، چنکو هەمی پارت و لایەنێن سیاسی و هەروەسا بەربژێرێن سەربەخو ژی پتر و رژدتر یێ خەباتێ دکەن و خو نێزیکی هاوولاتی دکەن، هەلبەت ئەڤ چەندە ژی ژبۆ بدەست ڤە ئینانا دەنگێ هاوەلاتی یە و ئەڤەژی یا رەوایە، لێ ئەڤ نێزیک بونە رامانا وێ بدرستی ئەوە کو هوینن یێ بریارێ د دەن کا کی دێ بیتە نوێنەرێ هەوە ل پەرلەمانێ کوردستانێ، هەروەسا ژبیر نەکە، کو هەر دەنگدەرە (گزیری دکەتە وەزیر و وەزیری ژی دکەتە گزیر) و دڤێت دەنگدەر ل ئەرك و بەرپرساتییا خوە رابیت بەرامبەری پاشەرۆژا وەلاتێ خوە و ئایندێ خوە و یێ زارۆكێن خوە و کا چاوا ل ئێکەمین هەلبژارتنێن هەرێما کوردستانێ ل سالا 1992 ئەم هەمی پێکڤە بگەرمی و شاهی و بهەستەکا نەتەوەیی چوینە سەر سندوقێن دەنگدانێ، ڤێ جارێژی وەک دلسوزیەک بۆ خوینا شەهیدان و ئەنفالکرییا و خەبات و ماندیبوون و دەربەدەری و قوربانیدانا سالەها سالا ژ پێخەمەتی ئازدی و رزگارییا گەلێ مە، دڤێت ئەم پێشوازیەکا گەرم ل هەلبژارتنا بکەین و ب دەنگێ خوە ڤان هەلبژارتنا پیرۆز بکەین.
